Read Goan Konkani 1Tim 6 Bible Online

1Tim 6 - Goan Konkani bible

1Tim 6

¹Jeam mon’xanchê manir gulam’ponnachea bhesachem zum asa, team somestamnim apleam dhoniank sogllo man favo mhonn somzun cholchem; toxem kelear Devachea nanvachi ani amche xikovnnechi konnuch ninda korunk pavchim nant.

²Dhoni amchea bhavartacho zalear, to aploch bhav mhonn nib gheun gulamamnim tachi beporva korchi nhoi; ufrattim tãnnim odik vhoddê zotnaien tachi seva korchi, kiteak gulamanchê chakrecho adav kaddtat tim teach bhavartachim ani mogachim bhavbhoinn. Hanvem sanglam tem xikoi ani pallunk lai.

³Konn-konn vegllem kitem xikoitat ani Jezu Krista, amchea Somiachi, osôl xikovnn ani Devachê khorê bhoktik pavoita ti xikovnn manun ghenant.

⁴Oslim mon’xam gorvan ful’leant ani sarkim nennar. Tancho sobhav oso ki kitea-i vixim vad-vivad korinastana ani utram dhorun zhogddim korinastana tanchean ravum nozo. Dekhun tankam nattkai bhogta, tim zhogddim manddtat, ekamekak okman kortat, ekamekacho dubhav dhorun bhonvtat,

⁵thambonastanam vad kortat. Osleank budh-ginean na, sotachi ollokh-ui na. Devachi bhokti korun apnnank khub girestkai mellteli mhonn somzotat.

⁶Devache bhokte borabor, dadosponn khub adavachem.

⁷Sonvsarant ietana kitem ami gheun aileanv? Kãich nhoi! Sonvsar soddun vetanam kitem tori ami gheun veteleanv? Kãich nhoi!

⁸Mhonn-tôch amkam jevunk-khaunk ani nhesunk-pangrunk aslear, itlean ami dhadoxi zaunchem.

⁹Girest zaunk sôdtat tim tallnnek ani devcharachea fasak sampoddtat, kiteak nirbudhi ani noxttadik vondovnneô tankam oddun vhortat; osleô vondovnneô mon’xank nisonttonak ani ghorttannak pavoitat.

¹⁰Soglleam vaittanchem mull mhon’llear girestkaiechi axa; osli axa dhorun, kãi zannam bhavarta thaun koddsorun geleant ani oxem sobar koxtt-dogd aplea mathear tãnnim oddun haddleat.

¹¹Punn tum, Devachea bhokta, osleô vostu soddun di. Apnnak manovlolo Devan tuka kela tea bhesacher jiet rav; Tachi khori bhokti korit rav; bhavarta pormannem chol ani bhavam-bhoinnincho môg kôr; koxttam-dogdank sosnnikaien fuddo kôr; soglleank dulobaien vagoi.

¹²Bhavartachem borem zhuz zhuzot rau, Devan tuka apoila tea pormonnem, sobar govaiam mukhar tunvem bhavartachem ut’tom’ ucharonn korun, sasnnik jivit tuka mell’lam tantunt thir rau.

¹³Soglleak jivprann dita tea Deva mukhar ani Pons Pilata hujir govai diun ut’tom’ ucharonn kelam tea Jezu Krista mukhar hanv tuka oso hukum’ ghaltam:

¹⁴Jezu Krist, amcho Somi, dobajean dixtti poddo-sôr, chuki virêt ani guneanv nastana tuje kaide pall.

¹⁵Apnnem nemlolea kallar Taka porgôtt kortolo

¹⁶Ekloch omôr asa To, ogom’ uzvaddant ravpi, mon’xan polleunk naslolo, polleunk-ui zainam toslo, Ekloch sogtta-sorvancho Bhagevont Odhikari! Toch to razancho Raza ani dhoniancho Dhoni! Taka man ani podvi sasnnachea sasnnak! Amen!

¹⁷Gorvan fulona zaunk, ani othir gireskaiancher aplo bhorvonso dovrina zaunk punn amcheam gorzank zai titlem amkam Dev bhorpur dita dekhun, Tacher aplo visvas dovrunk, hea sonvsarachi girestkai asleleank xikoi.

¹⁸Borem tem korunk, boream kornneamnim girest zaunk, udar kallzan ierank vanttun diunk tankam adnea kor.

¹⁹Oxem korun tim aplea fuddarak omolik bhanddarachi ghôtt buniad ghalun dovortelim, ani hê porim apnnak mell’lam tea sasnnik jivitant thir rautelim.

²⁰Timot mhojea pritichea, tujê adhin kela to tthevo rakh; Devachê bhokticher add ani ôrth-naslole vad-vivad vattai; osle vad-vivad konn-konn zannvai mhonn somzotat, punn khorench mhollear tantum zannvai bilkul na.

²¹Osli polki zannvai dhorun kãi zannamnim bhavartuch soddun dilo. Devachi doiallai tumam-somestam sovem asum.