Read Goan Konkani 2 Tim 1 Bible Online

2 Tim 1 - Goan Konkani bible

2 Tim 1

¹Jezu Krista sovem asa tea jivitache bhasavnnek lagun, Devachê khuxê pormannem Jezu Kristacho apostl, Hanv Paulu

²Timota, mhojea opurbaiechea putak, hem potr boroitam. Dev amcho Bap ani Jezu Krist, amcho Somi, Apli doiallai, kaklut ani xanti tuka bhogunk dium.

³Mhojeam magnneamnim thambo-nastana rat-dis tuzo ugddas kortam tedna hanv Devak dhin’vastam; Mhojeam purvozamnim kelam toxench, hanv-ui nitoll ontoskornnan Tachi seva-bhokti kortam.

⁴Tujeam dukancho mhaka boro ugddas asa, ani tuka novean polleun dhadoxi zaunk hanv axetam.

⁵Ddhông-naslolo tuzo bhavart mhojea monant asa. Tujê adim Lois tujê ajiek ani Eunike tujê avoik aslo toch bhavart tuka-i asa mhonn mhaka kosloch dubhav na.

⁶Heach khatir, hanvem tujer hat dovorle tedna zo vorgunn Devan tuka dila, tacho uzo odik peroi mhonn tuka ugddas kortam.

⁷Kiteak Devan amkam dila to Atmo amkam bhezudd korina, punn Devacho Atmo amkam ghottaien bhôrta, bhavam-bhoinnincho môg amcheam kallzamnim vaddoita, ani amcheô vaitt vondovnneo domavunk xokti dita.

⁸Mhonntôch amchea Somiacho govai koso ubo ravunk lojenaka, vô hanv Tachê khatir bondkhonnint poddlam mhonn mhojê-i pasot lojenaka. Portench zalear, Dev dito bollar patieun, xubhvhortomana khatir koxtt ani dhumalle sõsun tuzo bhag ghe,

⁹Amcheam kornneam pasot nhoi, punn xarti pavounche Aple ieuzônnek ani doiallaek lagun, Tannem amchi soddvônn kelea ani Apli khaxea porza zaunk amkam apoileant; soglleam kallam-iugam adim, Jezu Krista sovem amkam Tannem hi doiallai dilea.

¹⁰punn atam mornnacho bhosm kelo ani xubhvhortomana vorvim omor jivit bhogunk amkam favo kelem to amcho Soddvonnar Jezu Krist sonvsarar dixtti poddlo tedna Devan hi doiallai amkam ugddapi kelea. Mornnacho bhosm kelo ani xubhvhortomana vorvim omor jivit bhogunk amkam favo kelam

¹¹Hem xubhvhortoman porgottunk ani xikounk Devan mhaka apostl nemla.

¹²Teach pasot hanv he koxtt bhôgtam; tori hanvem kalliz soddunk na, kiteak konnacher hanvem visvas tthevla tem hanv borem zannom, ani mhaka rakhunk dil’lo tthevo to Dis ie porian samballunk Taka tank asa mhonn mhaka dubhavuch na.

¹³Jezu Kristacher amcho bhavart asa ani Tachea ekcharant ami ekamekacho môg kortanv mhonn monant dhorun tuka sangtam: mhojê koddsun tum xiklai tench dolleam mukhar dovrun tum-vuim dusreank xikoi.

¹⁴Tujê adhin kel’lo tthevo amchê sovem jietolea Povitr Atmeachea bollan rakhun dovor.

¹⁵Aziechea prantantle sogllech mhaka soddun geleat mhonn tum zannoi; tanchê modem Fijel ani Hermojen.

¹⁶Amcho Somi Onexiforachea kuttumbak kaklut dakhoum mhonn magtam, kiteak tannem mhaka zaitê pavtti dhir dila ani mhojeam sankllinchi taka loz disunk na.

¹⁷Itlench nhoi, punn to Romak pavlo toso, mhaka mellunk tannem zaito bhar ghetlo ani xekim mhaka sodun kaddlo.

¹⁸Tea Disa Somiachi doia bhogunk toch Somi taka favo korum. Efezant tannem mhaka kitlo adar dilo to tum boro zannoi.