Read Goan Konkani 2 Tim 2 Bible Online

2 Tim 2 - Goan Konkani bible

2 Tim 2

¹Hea pasot, tum, puta mhojea, Jezu Krista sovem mellta tê doiallaientli ghottai ghe.

²Ani jem sobar govaiam hujir tunvem mhojê koddlem aikolãi, tem tum herank-ui xikounk purte zauncheam khatrecheam mon’xanchê adhin kôr.

³Jezu Kristacho bollvont soinik za ani tuka ietat team koxttank dhiran fuddo kôr.

⁴Soinik koso seva korto konnuch, hea jivitacheam ieram rattimnim kednanch ghusollna, apnnak soinikachê sevek ghetla tea senapotik taka manonk zai.

⁵Toxench, pelvan’ke-cheam nemam pormannem tantum vantto ghetlea xivai, khõicheach pelvanak inam’ mellona

⁶Têch porim, pikechem foll soglleam-vôn poilim koxtt korto xetkamteak mellunk zai.

⁷Hanv sangtam tachê vixim boro niall kôr ani Somi soglleachi tuka somzonni ditolo.

⁸Hanv porgott kortam tea xubhvor-tomana pormannem, Davidachê kullientlo zolmol’lea, Devan mel’leantlo punorjivont kel’lea Jezu Kristacho ugddas monant dhôr.

⁹Hea xubhvor-tomana pasot hanv koxtt bhôgtam ani guneanvkar zal’lê porim mhaka sankllimnim porian bandlo. Punn Devachem utor konnacheanuch bandun ghalunk zaina.

¹⁰Hea pasot, Devan vinchlelank sasnnik mhoime soit, Jezu Krista sovem mellta tem taronn tankam mell’che khatir, hanv hem sogllem tankam lagun sosnnikaien bhôgtam.

¹¹Hem utor khatrechem: Tachea vangdda meleanv zalear, Tachea vangdda jietelenv.

¹²Thir-ghott ami ravleanv zalear, Tachea vangdda-i raj kortelenv. Taka ami sôddlo zalear, To-i amkam soddun dit’lo.

¹³Ami ovisvaxi zalear, To mat visvas samballtolo: kiteak Apnnench dil’lem utor Tachean kodinch moddum nozo!

¹⁴Aikoteleancho nas zauncho zaun, ani-anink kiteakuch upkaronant team utram vixim, tãnnim vivad korche nhoi mhonn bhavarteank ugddas kôr ani Somiachea nanvan tankam xiddkai.

¹⁵Sot viskottaun sangun, loz bhògchi poddona toslea vavraddea bhaxen, Devak manovlolo monis zaunk, tujench Devak somorponn korunk zata titlo vhaurun proitn kôr.

¹⁶Deva thaun mon’xank odik-odik pois vhortat tosleô otmeak faideacheo nhoi teo bekar gozali vattai;

¹⁷tosli tanchi boddboddnni angant posortolea ghaia sarki. Osleam mon’xam modem Himenêv ani Filet asat;

¹⁸bhavarteanchem punorjivontponn zaunuch gelam mhonn sangun, te apunnuch sota thaun koddsorche koddsorun, tãnnim oslê xikovnnen kãi zannancho bhavart moddun uddoilo.

¹⁹Punn “Apnnachim konn tim Dev ollkhota”ani “jim konn Somiachem nanv ghetat, tãnnim khotteponn pois korchem.”, oxem ticher boroup asun, Devan ghal’li bunead thir-ghôtt togta.

²⁰Eka vhoddlea ghorant torê-torechim aidonam astat: thoddim bhangarachim ani rupeachim, ani thoddim lankddachim ani matiechim; thoddim vixex somoiar vaporpachim, ani thoddim sodam vaporpachim.

²¹Oxem, jim konn voir sangloleô khotteô xikovnnô soddun xud’dh ravtat tim, Devak bhettoil’lim ani aplea Dhoniak upegachim aidonam zatat ani Tachea koslea-i borea kamak tim aitim astat tim kherit baxechim aidonnam zaunk pavtelim.

²²Tornnê piraiecheô vaitt vondovnneo domaun dovor; sodam Devak manovlolo zaunk tujem dhean-mon lai; bhavartant thir rav; bhavam-bhoinnincho môg kôr ani soglleam kodde xantin jie. Somiachem Nanv xud’dh-nirmoll kallzan ghetat tanchê borabôr heam soglleam sugunnanchi zotnaien vatt dhôr.

²³Ôrth-naslele ani xisti-bhaile vivad vattai; tankam lagun tonddak tondd zata mhonn tum zannoi.

²⁴Somiacho chakôr zhogddekar zauncho nhoi, punn soglleam thãi thôndd, boreponnan ani sosnnikaien dusreank xikovnn dita toslo.

²⁵Apli khuxi pallunk, soitanan dhorun dovorl’leank tachea fasantlim suttche khatir Dev ghoddie tanchem mon bodlun, sotachi ollok gheunk pavunk favo korit mhonn Devacho chakor apleam virôdheank sarkea margar haddta

²⁶Tedna tim portun soirannar ietelim ani devcharachea fasantlim tim sutt’telim, kiteak mhon’llear devchar khorench apli khuxi tãnnim pallchi mhonn tankam dhorun asa.