Read Goan Konkani 2 Tim 3 Bible Online

2 Tim 3 - Goan Konkani bible

2 Tim 3

¹Hem mat tuvem zanno zaunchem: nimanneam disamnim êk bhirankull kall ieuncho asa.

²Mon’xam zatelim aplem dhean-mon apnnancheruch dovortat toslim, girestkaiechê axechim, gorvi, mosti-modondh, galli marpi avoibapaichem aikonant toslim, onupkari, bhokti naslelim;

³tim moipas naslelim, darunn kallzachim, boglantti, kamchari, nixttur, sogllea boreponnacher virudh zatelim;

⁴tim ghatki, bezobabdar, boddaien fuglolim, Deva poros chodd kuddicheam sukhancho môg korpi zatelim.

⁵Tim devbhokticheam mon’xanchem sovong ghetelim, punn tanchea jivitant khore devbhoktichem boll dixtti poddchench na. Osleam mon’xam thaun pois rav.

⁶Oslim kãi zannam kuttumbamnim rigun, apleam patkanchea bharan chèpleleam ani veg-veglleam vondov-nneamnim oddon veteleam holkott bailank bhuloun aplea zallant dhôrtat.

⁷Oslim kãi zannam aikun xikunk sôdtat, punn kednanch sot ollkhunk pavonant.

⁸Zoxem Jan’nes ani Jambres Moizesacher uprasle, toxench him mon’xam sotacher uprastat. Tanchim monam kusddim zaleant ani tancho bhavart khotto zala.

⁹Punn chôdd vêll tankam ies mellchona, kiteak zoxem team dogam zannanchi, toxench hanchi-i pisai soglleank ugddapi zatoli.

¹⁰Punn tum, Timota, hanv kitem xikoitam tem tum boro zannoi. Toxench hanv koso choltam, mhojea jivitacho hetu konn, mhozo bhavart koslo, hem sogott tunvem dekhlãi; kitlê sosnnikaien hanvem tras ghetleat, kitlo hanv mhojeam bhavam-bhoinnincho môg kortam, ani kitlo thir hanv ravlam, hem-i tuka tthavem.

¹¹Antiokient, Ikoniumant ani Listrent hanvem bhôgleat team koxtt-dumalleanchi khobor tuka asa. Kosle mhonn dhumalle hanvem bhôgleat! Tori team soglleantlo Somian mhaka nivarlo.

¹²Jezu Krista sovem khorea bhoktiponnan jieunk sôdtat tim sogllim dhumallo sõstelinch!

¹³Punn tim khottim ani bhulovnnar mon’xam, dusreank fosoun ani apunnuch fosovon, odik-odik paxtt zaun vetelim.

¹⁴Tum zalear, jem tum xiklai ani jem tunvem mandun ghetlãi, tantum ghôtt rav. Tem konna koddsun tum xiklai tem monant dhôr.

¹⁵Bhurgeponnar-san tum xiklai tim Povitr Pustokam, Krista Jezucher asa tea bhavarta udexim, soddvonnek pavoum ietat.

¹⁶Sogllem Povitr Pustok Devachea preronnan boroilam; xikovnn diunk, chuki kaddun dakhounk, lokak nittaier haddunk, tankam Devak man’ta toslea jivitachê vatter fuddem vhorunk, tem upkarta.

¹⁷Taka lagun, Devachi seva korta to ut’tom zata ani koslea-i borea kamak purto zaunk pavta.