Read Goan Konkani 2 Tim 4 Bible Online

2 Tim 4 - Goan Konkani bible

2 Tim 4

¹Deva mukhar ani jiveanchea ani mel’leanchea Nitidara, Jezu Krista mukhar, Tachem dobajik iennem ani Tachem Raj monant dhorun, hanv tuka ho kukum ghaltam

²Tacho sondex porgott kor; lokak to manom vo na manom tum to tanchea kanar ghalit rav; khotteam xikovnnancher vad korun sotacho uzvadd ghal; khoddi kaddun dakhoi; tanchea gineanak ulo mar, punn soglle sosnnikaien xikovnn diunchea monan toxem kor.

³Monxam rokh-bori xikovnn mandun gheunchi nant to kall ieuncho asa. Aple kan khorzon dovorto axen, apnnank man’tat tosle ekar-ek guru tim vinchun kaddtelim.

⁴Aple kan sotak bhere korun, gopam-talam aikunk tim bhonvtelim.

⁵Punn tum zalear zagrut rav, ietat title koxtt-dogd dhir gheun sons, bori khobor porgottunk bhar ghe, tuje seveche kaide zotnaien pall.

⁶Mhoje vatten, ek bolidan koxem mozo jiv zalach ani sonvsar soddun vecho mhozo vell pavla

⁷Xevott porian hanv borem zhuz zhuzlam, dhanvchi asli ti vatt hanvem dhanvun kaddlea, bhavartant hanv thir ravlam.

⁸Atam, tea disak mhaka ditolo to , ani fokot nhoich mhaka punn Tachea dobajik ienneak otrektat titleankui ditolo to, Apnnak manovto korta tea jivitachea zoitacho mokutt Devan mhaka dovol’lolo asa.

⁹Hea sonvsarache axek lagun, Demas mhaka soddun Tesaloniek gelo; Kresens Galasiek ani Tit Dalmasiek gela dekhun, zata title vegim mhoje xim ie.

¹¹Ekloch Luk mhoje sorxim asa. Markuk tuje borabor gheun ie, kiteak to mhojea vaurant bhov adaracho.

¹²Tikikusak hanvem Efesak daddla.

¹³Troasant Karpusakodde mhojea matheachem avronn hanv dovrun ailam ietana gheun ie; toxench mhoje kovlle ani bhov-korun mhojim boroupachim barik chamachim potram.

¹⁴Alexandr, kansaran mhaka khub vaitt kelam; tacheam kortubanchem farikponn Somi taka ditolo.

¹⁵Tum-vuim tache xim chotur rav, kiteak amchea niropacher to samko virudh zalo.

¹⁶Poile pautt mon’subidara mukhar mhaka ubo kelo tedna, mhoje vatten konnuch ulounk na. Hachi khast Dev tankam laina zaum.

¹⁷Mhoje udexim xubvor-tomanachi purnn porgottni zaunche khatir, ani soglleam videxeamnim tem aikunche khatir, Somi mhoje vatten ubo raulo ani Tannem mhaka boll dilem. Mhonntoch Somian mhaka xinvanchea tonddantlo nivarlo.

¹⁸Sogllea noxttantlo Somi mhaka nivartolo ani Aplea sorginchea Rajeant pavoun To mhaka taronn ditolo. Taka mhoima sasnnachea sasnnak! Amen.

¹⁹Priskak, Akilak ani Onesiforachea ghorcheank hanvem vicharlam mhonn sang.

²⁰Erast Korintak raula. Trofim’ boro na zalo ani Miletant taka pattim dovrun hanv ailom.

²¹Hinvallea adim taktin hanga ieunk proitn kor. Eubul, Prudens, Lin ani Kladia, hancho ani soglleam bhavam-bhoinnincho tumkam nomoskar.

²²Somi Jezu Krist tumche sovem asum. Tachi doiallai tumi sodam bhogum.