Read Goan Konkani Tit 1 Bible Online

Tit 1 - Goan Konkani bible

Tit 1

¹Hanv Paulu, Devacho sevôk ani Jezu Kristacho apostl, amchea ekach bhavartant mhojea khorea puta Titak Deva Bapachi ani amchea Soddvonnara Jezu Kristachi doiallai ani xanti magtam. Apnnem vinchun kaddleleank bhavartan vaddonk adhar diunk Devan mhaka nemla. Tankam hanvem khorê bhoktik pavoita tea sotachi ollokh diunchi mhonn Tannem mhaka dhaddla. Sasnnik jivitacho bhorvanso tancheam kallzamnim upzounchem kam’ Devan mhojê adhin kelam. Dev kednanch konnak fottoina; tôr Tannem kallachê survatek thaun hem jivit bhasail’lem. Punn tacho iukt vêll pavtôch, Deva, amchea Tarokan, Aplo sondêx fankoilo; ani Tannem mhaka dil’lea hukuma pormannem hanv to porgôtt kortam.

⁵Tuka Kretant pattim dovrunk karonn hem: thõi jem kitem opurtem urlam, tem tunvem purtem korchem ani dor-eka nogrant tunvem zannte nemche. Hanvem tuka sanglam tem monant dhôr:

⁶dôr-êk zannto guneanv-naslolo zauncho ani taka êkuch potinn aschi; tachim bhurgim zaunk zai bhavarti, ani tim pamprel vô avoibapaichem aikonant mhonn konnench tancher dad diunk zaina toslim.

⁷Ek sobhecho fuddari, Devachea vauracho karbhari to dekhun, to guneanva mekllo zauncho, to modondh vo ragist zauncho nhoi nhoi mhonn bebdo vo zobordost vo duddvanche axecho zauncho nhoi.

⁸Portench, to porkeancho poramôs korta toslo zauncho ani bholeponnan bhòrlolo; to moriadik zaunk zai, Devak man’ta toslea jivitacho ani Tachê bhokticho, ani apnnakuch domaunk zanno aslolo.

⁹Xikoilam tea pormannem bhavartacho nirôp ghôtt samballta toslo to zaunk zai; oxem to oputt sarki xikovnn diun herank updesunk xoktolo ani ticher add uloiteleam kodde vivadunk zanno zatolo.

¹⁰Kiteak attponant toslim, suki boddai uloitat toslim ani bhulovnnim zaitim zannam asat, bhov-korun sunotichea pongddachim.

¹¹Tankam ogim korunk zai: holkea faideachê axek lagun, xikounk favona toslem xikoun, akheam ghorabeancho bhavart tim gondhollak ghaltat.

¹²Tanchê bhitorlea eklean, tanchêch modlea eka vortea zannaran oxem mhonnlelem asa: “Kretkaram sodanch fottkirim, noxtteô mon’zati, samkinch allxi potti-im.”

¹³Ani hem mhonnop sarkem. Dekhun khoraien tankam bobatt kôr ani tankam bhavartant ghott kôr.

¹⁴Toxem tim Judevancheam kanniank ani sotachea marga velim koddsorleant tosleam mon’xank kan diunk pavchim nant.

¹⁵Jim konn apunnuch xud’dh-nirmoll, tankam sogllem xud’dh-nirmoll; punn bhoxttol’leank ani bhavart nasleleank kitench xud’dh-nirmoll na, kiteak tanchem mon ani ontoskornn bhoxttoleant.

¹⁶Apunn Devak ollkhotat mhonn sangtat, punn apleam kortubamnim Taka ollkhonant mhonn dakhoitat; khorench ollxikonnim, Devacher kolpotat ani kosleach borea kamak upkaronant toslim mon’xam tim.