Read Goan Konkani Tit 2 Bible Online

Tit 2 - Goan Konkani bible

Tit 2

¹Punn tum tujê pallien osol ani dhodd xikovnnek kitem lagta tench xikoi.

²Zannteam dadleank somadonache, somjikaieche, xanne zaunk; toxench aplea bhavartan, pritimogan ani sosnnikaien thir-dhodd zaunk xikoi.

³Têch porim zannteô bailô bhoktivont jivitacheô zauncheô; tãnnim chaddiô sangcheô nhoi ani bebdikai korchi nhoi; tãnnim borê dekhichi vatt dusreank xikoichi;

⁴tanchê koddchem tornneam bailamnim ap-aplea ghovacho môg korunk ani apleam bhurgeanchi opurbai korunk xikchem;

⁵têch porim Devachea utrak beman zaunche khatir, tannim moriadicheô, nirmoll jivitacheô, aplea ghora-daracheô, moipaxi, ani ap-aplea ghovak khalteô zauncheô.

⁶Toxench tornneam dadleank mannsugen cholunk budh di.

⁷Soglleanch vattamnim boream kornneanchi dêkh di; soroll monan ani fikirin tuji xikovnn di;

⁸Koslich khôdd sampddo na zaun, amcheam dusmanank loz bhògche khatir, tujem ulovp itlem borem ani sarkem zaum-di, ki konnachean amcher kitench vaitt ulounk zaunchem na.

⁹Apleam dhoniank sogttant khaltim zaunk zai mhonn, tankam portea-portem dinastana, tãnnim tankam khuxi korchim mhonn gulamank xikoi.

¹⁰Tãnnim tanchem kãich chorun kaddchem nhoi; portench zalear, soglleam kamamnim apunn sarkim khatrechim mhonn tãnnim dakhoun-chem. Hê bhaxen Deva amchea Soddvonnarachê xikovnnek soglleam vattamnim tim man haddtelim.

¹¹Amcho Vorto Dev ani Soddvonnar, Jezu Krist mhoimen dixtti podd’tolo tedna, tea sukhest bhorvonxean polleun rautana, obhokti jivit ani sonvsari vonddavnneo soddun diunk ani ami mannsugechem ani Devak mantelem ani bhokti jivit jieunk xikoito ani somest mon’xank soddvonn dito Apli doiallai Devan ugddapi kelea.

¹⁴Sorv torechea khotteponantlim amkam soddounk, ani amkam xud’dh-nirmoll khud’ Apli khaxa porza korunk ani boreô kornneô korunk sodam aitim asunk Tannem amchê pasot Apnnachench bolidan kelem.

¹⁵Hem sogllem tankam sang, tankam ghottai di ani sogllea odhikaran tankam bobatt kôr. Konnench tuji beporva korchi nhoi.