Read Goan Konkani Flm 1 Bible Online

Flm 1 - Goan Konkani bible

Flm 1

¹Hanv Paulu, Jezu Krista pasot bondkhonnint poddlolo, ani amcho bhav Timot tuka, Filemon, Jezuchê sevent amchea mogachea vangddeak,

²Toxench noman kortanv Apfiek, amchê bhoinnik, ani Arkipusak, amchê bhaxen bhavarta khatir itle koxtt gheteleak, ani tujea ghorant zomtelê povitr-sobhek noman kortanv.

³Dev amcho Bap ani Jezu Krist amcho Somi tumkam Apli doiallai ani xanti bhogunk dium.

⁴Mhojeam magnneamnim tumcho ugddas kortam titlê-i pavtti mhojea Devak dhin’vastam,

⁵kiteak Devacheam soglleam bhoktam sovem tumchea moga vixim ani Somia Jezucher tumkam bhavart asa te vixim, hanvem aikolam.

⁶Tumcho ani amcho êkuch bhavart; tôr ho bhavart dakhounk Krista pasot kitlem borem amchean korunk zata tachi purnn ollokh amkam mellum mhonn ami magtanv.

⁷Tujea mogachi khobor aikun mhaka vhôdd sontôs bhòglo ani ghottai mell’li; amcheam bhavam-bhoinnin-chim-i kallzam tunvem, mhojea bhava, somadhan keleãi.

⁸Hea pasot, Krista sovem dhir gheun, mhojean tuka tuzo kaido pallunk hukum’ ghalunk zatalo;

⁹tori, hanv Paulu, mhatarê piraiek pavlolo ek monis ani tea-vôn odik atam Jezu Krista khatir bondkhonnint poddlolo, mogan ulo martam tedna,

¹⁰bondkhonnint astana hanvem zolm dil’lea mhojea puta Onezima khatir hanv tuka ulo martam

¹¹Eka vellar to tuka faideacho zaunk na; punn atam, mhaka faideak poddlo toso, tuka-i to faideacho zatolo.

¹²Hanv taka tujê-xim portun dhaddtam; taka dhaddun, êkê bhaxen, mhojem kallizuch dhaddtam.

¹³Xubhvhortomana khatir hanv bondkhonnint astana, khuxen tum mhaka adar dita asloi tech tuje suater mhaka adar diunk, taka hanga mhojê-xim dovrunk mhoji khuxi asli.

¹⁴Punn tuji maniotai nastana kitench korunk mhaka borem disunk na; tuzo upkar tujê ap-khuxecho zauncho ani tuka boll korun nhoi.

¹⁵Tujexim Onesimus porot ascheak, thoddea kallak, tuje thaun pois urlo ghoddie zait.

¹⁶punn atam gulam’ koso nhoi, tôr gulama poros odik vorto, êk opurbaiecho bhav koso: mhakach tachi itli opurbai zalear, ek monis koso ani Somia sovem êk bhav koso to tuka kitlo odik opurbaiecho zauncho na?

¹⁷Tôr amchê modem asa tea ekcharak tum mol ditai zalear, mhaka tumger moipasan gheto asloi, teach moipasan taka-i ghe.

¹⁸Tannem zôr tuka koslem nuksann haddlam vô to tuka kitem dennem asa zalear, tem mhojea hixeobak lai.

¹⁹Hanv, Paulu, mhojeach hatan hem boroun ditam: hanv farik kortolom. Tuka hanvem tujea rinnacho ugddas korchi goroz na: mhojê kodde tuka asa tem rinn mhollear mhojê vorvim tuka mell’lam tem bhavartachem jivit.

²⁰Tôr, mhojea bhava, Somia khatir tujer patieun ravtam. Krista sovem mhozo jiv somadhan kôr.

²¹Hem boroitana hanv magtam tem tum kortoloi mhonn mhaka khatri asa; khorem mhollear, tea-vôn chodd kortoloi mhonn hanv borem zannom.

²²Teach borabôr anink êk upkar magtam: mhaka-i ravunk ilo zago dixi? kiteak tumam-soglleanchim magnnim aikun, Dev mhaka tumchê-xim portun pavoitolo mhonn mhaka visvas asa.

²³Epafras Jezu Krista khatir mhojê borabôr bondkhonnint asa: to tuka noman korta.

²⁴Têch bhaxen mhoje sohokari Marku, Aristark, Demas ani Luk tuka noman kortat.

²⁵Somia Jezu Kristachi doiallai tumam-somestank bhogunk mellum.