Read Goan Konkani Heb 1 Bible Online

Heb 1 - Goan Konkani bible

Heb 1

¹Zaitê pavtti ani veg-vegllê toren magam provadeam vorvim Dev amcheam purvozam kodde uloilo.

²Punn heam xevottacheam disamnim, hea amchea kallar, Aplea Puta vorvim To amchê lagim uloilo. Devan Taka soglleam vostuncho daiji kela, Tachêch vorvim soglli srixtti rochlea.

³To Devachê mhoimecho porzôll ani Devacho sopurnn rupkar. Aplea bollixtt utran akho sonvsar To samballta; ani, mon’xank patkantli xud’dhi zôddlea uprant, sorgar choddun thôr Devachea uzvea hatak bosla.

⁴Jitlem devdutancheam nanvam poros xrextt nanv Devan Taka dilem, titlo To tanchê poros vorto.

⁵Khorench Devan kednanch khõicheach dutak mhonnunk na: “Tum Mhozo Put, az Hanvem Tuka zolm dila.” Toxench khõicheach devduta sombondim Devan sangunk na “Hanv Tacho Bapui zatolom ani To zatolo Mhozo Put.”

⁶Punn Aplea Malgoddea Putak sonvsarant pattoitana, Tannem mhonn’lem: “Soglle devdut Taka saxttangim poddum.”

⁷Devdutam vixim Devan sanglem: “Apleam dutank varea sarke ani Apleam sevokank ujeacheam agtteam sarke To korta.”

⁸Punn Aplea Putak zalear, Dev oxem mhonnta: “Tujem xinvason, Deva, sasnnachea-sasnnak togtelem,” ani “Promanikponnan Tum razvôtt choloitoloi.

⁹Promannikponnacho Tum môg kortai ani khotteponnak vittetai. Hea pasot soglleam Tujeam vangddeam modlo voir kaddun, Deva, Tujea Devan, anondan bhôrtelea telan Tuka makhlo.”

¹⁰Tea bhair Povitr Pustokar oxem boroil’lem asa: “Tunvem, Dhonia, prithum’ rochlear kallanche kall zaun gele, sôrg-ui Tujeam hatanchem kam”;

¹¹tim sorun vetelim, Tum ekloch urtoloi; pornneam vostram vori tim kotteun vetelim,

¹²ani zhoron gel’leam angavleam vori Tum tim kaddun uddoitoloi, ani novim vostram ghaltoloi. Punn Tum asai tosoch astoloi, Tujeam vorsank ont-par na!

¹³Khõicheach devdutak Devan kednanch mhonnunk na: “Mhojea uzveak bos. Tujeam dusmanank Hanv Tujeam pãiam tolla ghaltam.”

¹⁴Devdut konn tôr? Te soglle atme; te Devachi chakri kortat, ani taronn gheunchim asat tankam adar diunk Dev tankam pattoita.