Read Goan Konkani Heb 10 Bible Online

Heb 10 - Goan Konkani bible

Heb 10

¹Dev fuddarak diuncho aslo team denneanchem Somurtint khorem sorup na; Somurt tanchi fokot êk savlli. Ti portun-portun, vorsachea vorsa, tech-tech iodn bhetounk formaita. Toxem zalear Deva sorxem ieunk sodteleank sopurnn korunk Somurtik podvi na.

²Karonn Devak bhôztat tim êkêch pavttin xud’dh zal’lim zalear, tanchea ontoskornnant kosleach patkacho bhar ascho naslo ani oxem, iodn sodankal bhettovpachem bond zato aslem.

³Punn portench, team iodnam vorvim vorsachea vorsa patkancho ugddas zata.

⁴Kiteak boilanchea ani bokddeanchea rogtak patkam kaddun uddounk koslich podvi na.

⁵Heach pasot sonvsarant bhitôr sortana Jezun oxem mhonn’lem: “Iodn ani bhettovnneô Tuka naka zalim, punn Mhaka Tunvem êk kudd toiar keli;

⁶hom’ ani patkam pasot boliô Tuka manonk nant.

⁷Tednam Hanvem mhonn’lem: ho polle Hanv ietam. Pustokachea kovlleacher Mhojê vixim oxem boroilelem asa. Tuji khuxi korunk, Deva, Hanv ietam.”

⁸Voir sanglam toxem, jim danam Somurt vopunk formaita — mhonngê “iodn ani bhettovnneô, hom’ ani patkam pasot boliô”, tim — To mhonnta — “Tuka naka zalim” ani “Tuka manonk nant”;

⁹uprant To oxem sangta: “Ho polle Hanv ietam! Tuji khuxi korunk Hanv ietam!” Oxem Dev Adlea Korarant formail’le soglle iodn rod’d korta ani tanchê svater Novea Koraracho, Jezu Kristacho, êkuch iôdn sthapun dovorta.

¹⁰Jezu Kristan hi Devachi khuxi mandun ghetli dekhun, Tannem sorvkallim Apnnachêch kuddicho tê êkêch pavttim iôdn kel’lean, amkam povitrtai mell’lea.

¹¹Ani koxêch bhaxen patkam kaddun uddounk xokonant tosle portun-portun tech-tech iodn somorpun Adlea Koraracho dôr-êk iadnik apli seva-riti pallunk dispottim Devmondirant asta.

¹²Kristan zalear, patkam khatir Apnnachoch êkuch sasnnak sufoll iôdn bhettoilo ani To atam Devachea uzveak bosla.

¹³Ani oso, tedna thaun, Jezu Apleam pãiam tolla, Dev Apleam dusmanank ghaltolo tê ghoddiechi vatt, polleit asa.

¹⁴Mhonntôch, tê êkêch bhettovnnê vorvim povitr keleant tankam Tannem sasnnak sopurnnaiek pavoileant.

¹⁵Ani hachê vixim Povitr Atmo-i amkam govai dita; poilim To mhonnta:

¹⁶“Team disam uprant — uloita to Sorvespor - Hanv tanchê kodde korar kortolom to oslo: tanchea kallzant Hanv Mhoje nem’-kaide ghaltolom ani tanchea monant te rigoitolom.”

¹⁷Uprant To mhonnta: “Tancheam patkancho ani khotteam kortubancho hea fuddem Hanv anink ugddas korcho na.”

¹⁸Oxem tôr, patkanchem bhogsonnem mell’lam mhonntôch, patkam khatir ani-anink bhettovnni na.

¹⁹Mhonntôch, mhojeam bhavam-bhoinnimnô, Jezun Aplem rogot vikrailem mhonnun, Gabhareant provês korunk amkam purnn sot’tea asa.

²⁰Tannem amkam podd’do pinzun, mhonngê Aplê kuddichea somorponna vorvim, êk novi vatt ugddun dili; hi novi vatt mhon’llear khud Krist.

²¹Oso Devachea Ghoracho karbhar cholounk êk xrêxtt Iadnik amkam asa.

²²Oxem tôr, khorea monan, poripurnn bhavartan, amchea guneanva-mekllem ontos-kornnachea kallzan ani amcheô kuddi nitoll udkan dhuun, provês korum-ia.

²³Ami uchartanv to bhorvanso thirponnim samballum-ia, kiteak Dev Aplê bhasavnnek visvaxi mhonn amkam khatri asa.

²⁴Pritimôg dakhounk ani boreô kornneô korunk ekamekak hurba diunk vavrum-ia.

²⁵Zomati bhorun ektthãi zaunchi amchê modem sonvoi asa ti thoddim zannam môddtat. Ami toxem korchem nhoi. Portench zalear, jitlo “Somiacho Dis” lagim pavta mhonn polletanv, titlim ami ekamekak dhir dium-ia.

²⁶Amkam sotacho uzvadd mell’la astana ami ap-khuxen patkam korit ravleanv zalear, heam patkam pasot dusro kosloch anink iôdn na.

²⁷Ekuch urlam tem hem: ieunchi asa ti bhoikôr zhôddti ani Devacheam dusmanancho bhosm kortolem tem ujeachem agttem.

²⁸Moizesachê Somurticher konn-ui add vochtit zalear ani dogam vô tegam sakxidaranchê govaiken tancho guneanv ruzu zait zalear, koslich doia nastana tankam jivexim martat.

²⁹Oxem zalear, jim Devachea Putak apleam pãiam tolla mostitat, jim apnnank povitr kel’lem tem Korarachem rogot opovitr mhonn lêkhtat, ani jim Povitr Atmeak, Devachê doiallaiechea hea Denneak, okman kortat, tosleam monxank kitli odik khôr khast favo zaunchi na?

³⁰“Hanv sudd ghetolonch; Hanv tankam farik kortolom”: him utram Konnem mhon’lleant tim ami zannonv. Tannench oxem-i mhonn’lam: “Sorvespor Aplê porjechi zhôddti kortolo.”

³¹Jivea Devachea hatant poddunk kitlem bhirankull!

³²Devacho uzvadd tumkam mell’lolo tedna, tumkam zaite koxtt-dogd sõsunk poddle, punn tanchê modem tumi thir ravleant, team adleam disancho tumi ugddas dhorat.

³³Thoddê pavtti tumkam sobhêmazar opman kela ani jastiamnim koxttaileant. Kedna-kedna osle koxtt bhôgtoleanchea bhagak tumi asleat.

³⁴Hôi, bondkhonnint aslim tancheam koxttamnim tumi vantto ghetlo; ani tumkam aslem titlem-i kaddun vhelem tedna, tumi tem khuxalkaien soddun dilem, kiteak tumchê lagim odik unch molachi ani sodankal togta tosli girestkai asa mhonn tumi zanno asleat.

³⁵Tôr atam tumchem kalljidarponn soddun dium nakat, kiteak taka vhoddlo inam’ asa.

³⁶Devachi khuxi korun, Tannem bhasailam tem tumi ghetelet zalear, tumkam sosnnikaiechi goroz asa. Kiteak Povitr Pustok oxem sangta:

³⁷“Thoddoch vêll urla, bhov thoddo vêll, ieuncho asa To ietolo; To uxir korcho na.

³⁸Mhaka manovlelim Mhojim bhoktam bhavartant thir ravun Jivit zôddtelim; punn tim pattim sorun gelear, Mhaka tim man’vochim nant.”

³⁹Ami pattim sorun Jivit hogddavpi mon’xam nhoi; punn portench, bhavartant thir ravun soddvônn zôddtanv toslim mon’xam ami.