Read Goan Konkani Heb 11 Bible Online

Heb 11 - Goan Konkani bible

Heb 11

¹Bhavart asop mhonngê, bhorvonxean rautanv team vostunchi khatri ani amkam dixtti poddonant team vostuncho visvas.

²Khoreponnim tanchea bhavartak lagun Devan amcheam purvileank manun ghetlim.

³Akhi srixtti Devan ekach utran rochun haddlea, ani oxem jem kitem dixtti poddta, tem sogllem dixtti poddona tantlem upzon ailam mhonn bhavartak lagun ami somzunk pavtanv.

⁴Bhavartak lagun Abelan Kainachea iodna-vôn vorto iôdn Devak bhettoilo ani hea bhavartan taka Devan Apnnak manovlolo kelo, kiteak khud Devan tachi bhettovnni manun ghetli. To melo zalear legun, bhavarta vorvim to ozun uloita.

⁵Bhavartak lagun Devan Enokak mornnantlo vattaun uklun vhelo, ani to konnakuch mellunk na, kiteak Devan taka ubarun vhelo. Karonn, taka uklun vhorchê adim, Enok Devak manovlolo monis mhonn Povitr Pustok sangta.

⁶Bhavarta virêt konnacheanuch Devak koxench manonk zaina, kiteak Deva-xim veteleamnim Dev asa mhonn ani Apnnak zotnaien sôdteleank To inam’ dita mhonn bhavart dhorunk zai.

⁷Bhavartak lagun Noan oxem kelem: ozun dixtti poddunk nasleleô vostu Devan taka gomoilea uprant, tannem Devachi xiddkavnni mandun ghetli, ani aplea ghoranneak vattaunchê khatir tannem tarum bandlem. Aplea bhavartan tannem sonvsaracher khastichem formonn marlem; ani jem Devak manovlelim zaunchem bhag bhavarta vorvim mon’xank mellta, tea bhagacho Noa daiji zalo.

⁸Bhavartak lagun Abraham’ apunn daiz koxem gheuncho aslo tea desant vochunk; ani apunn khõi veta tem nokllo zaun-ui to vattek laglo tedna, apnnak apoil’lea Devak to khalto zalo.

⁹Bhavartak lagun to Devan taka bhasail’lea desant porko koso jielo. Tache borabor, têch Devachê bhasav-nneche daiji zaun Izakan ani Jakoban tombumnim biradd kelem.

¹⁰Karonn to Devan ievjil’lea ani Devanuch ghôtt buneadir bandlelea xarak ravtalo.

¹¹Bhavartak lagun, Abraham zann’to zal’lo zalearui—Sarah legun vanztti asli zalearui—Dev Aplê bhasavnnek visvaxi ravtolo mhonn to patielo dekhun, Devan taka bapui zaum-so kelo.

¹²Heach khatir, mel’leam modem vochpachê piraiek pavlelea ekach mon’xa thaun mollba veleam noketram itli ani vellê velê renvecheam mezunk zainasleleam konniam porim sonsôt utpon zali.

¹³Him sogllim bhavart dhorun melim. Devan bhasail’leô vostu tim bhogunk pavlim nant, punn pois thaun teô polleun tim sontoslim, ani sonvsarant apunn porkim ani iatrekaram mhonn tãnnim ugteponnim sangun dilem.

¹⁴Oxem uloitat tim aplo khaxa dês apunn ozun sodit asat mhonn dakhoitat.

¹⁵Tanchem dhean-mon apunn soddun aileant tea desacher naslem; aslem zalear, thõisôr portun vochunk tanchean borem zatalem.

¹⁶Punn tim odik vortea desak axetalim, sorginchea desak otrektalim; dekhunuch Dev Apnnak tãnnim aplo Dev mhonn ulo marunk diunk pattim sorona, kiteak Devan tankam ek xar toiar kelam.

¹⁷Bhavartak lagun Abrahaman, Devan tachi porikxa keli tedna, Izakak vopun dilo.”Tujem nanv fuddem vhorteli ti sonsôt Izaka vorvim utpon zateli.”, oxem mhonn Devan sanglelem ani bhasavnneô kel’leô toch Abraham aplea ekleach putachem bolidan korunk kobul zalo.

¹⁹Mel’leank legun novean jivont korunk Devak xokti asa mhonn Abrahamak visvas aslo, ani êkê bhaxen mhonnun, tannem Izakak mel’leantloch porto ghetlo.

²⁰Bhavartak lagun Izakan fuddarak ieunchim aslim tim dennim Jakobak ani Ezauk mellchim mhonn tankam aplo axirvad dilo.

²¹Bhavartak lagun, aplê boddiecher bagon Devak bhôzun, Jakoban morchê adim Juzechea dôr-eklea putak aplo axirvad dilo.

²²Bhavartak lagun, mornnachê tornnir aslo tedna, Israelacheô put-dhuvô Ejiptantleô bhair sorun vochpache vixim uloun Juzen apleam haddanchem kitem-kat korchem tea vixim kaido ghalo.

²³Bhavartak lagun, Moizes zolmo-tôch, tin mhoine porian tachea avoibapain taka lipoun dovorlo. To sobit-sundôr ballôk mhonn tãnnim dekhlem ani patxaiachea hukumachi tankam bhirant disunk na.

²⁴Bhavartak lagun Moizesan, danddgo zatoch, apnnak Faraochê dhuvecho put mhonnlolo saf naka zalem.

²⁵Thoddo kall patkachem dadosponn bhogchê bodlek, Devachê porjê vangdda koxtt-dogd sõsunk tannem vinchun kaddlem.

²⁶Tache dolle fuddlea inamacher lail’le asle dekhun, Krista pasot kosle-i attevitte sõsunk Ejiptachê girestkaiê-vôn vortem bhag mhonn tannem manun ghetlem.

²⁷Bhavartak lagun patxaiachea ragachi bhirant dhorinastanam Moizes Ejiptantlo bhair sorlo; dixtti poddona tea Devak dekhlolê porim to thir ravlo.

²⁸Bhavartak lagun, tannem Pask somorombhlem ani, aplê porjê modem malgoddeank Bhosm-Kornnaran hat laina zaunk, tanchea darancher tannem rogot xitoddaunk lailem.

²⁹Bhavartak lagun, tãnnim Tambddo Doria suki zomin zal’lê porim utrailo; punn Ejiptkar toxench korunk sôdtana buddun mele.

³⁰Bhavartak lagun porjen sat dis kottam bhonvtonnim bhonvadde marlea uprant, Jerikochim kottam moddon poddlim.

³¹Bhavartak lagun, ti xindôll bail Rahab, bhedeank tinnem borê bhaxen ghetle dekhun, onbhavarteam borabôr morunk na.

³²Anink-ui hanvem sangchi goroz asa? Gideon, Barak, Samson, Jefta, toxench David, Samuel ani provadi, heam soglleanchi khobor korunk laglear, mhaka vêll ascho na.

³³Bhavartak lagun tãnnim raxttram jikun ghetlim, Devak man’ta toslea jivitachi chal tãnnim dhôrli, ani Devan bhasail’lem tem tankam mell’lem. Tãnnim xinvanchim tonddam dhamplim,

³⁴ujeachim agttim paloilim, ani zhuzant te torsadin morun poddunk nant. Te osokt asle, punn ghott zale, zhuzant bollixtt zale ani porkeam fouzank tãnnim pattim dhanvddaileô.

³⁵Kãi bailank tanche ghov mornnantle jivont zaun porte mell’le. Thoddeam zannamnim, apli suttka soddun diun, odik borea jivitak punorjivont zaunchê khatir moro porian koxtt-dogd bhôgle.

³⁶Kitleam zannamnim kenddnneô ani chhabkancho mar khelo, ani dusream kitleam zannank khoddeam-sankllimnim bandlim ani bondkhonnint uddoilim.

³⁷Tankam fatrailim, tankam khorvontin chirlim, torsadin tancho jiv kaddlo. Xellianchea ani bokddeanchea chama bhair ang pangrunk tankam anink kãi naslem. Lacharponnant, hal-upo-dreamnim ani dogdogamnim tim aple dis kaddtalim.

³⁸Khorench him mon’xam sonvsarak favo naslim. Nirvaxi zaun tim oronneamnim ani dongrancher bhonvtalim ani zomnicheam bhiaramnim ani khoddeamnim jietalim.

³⁹Heam soglleamnim bhavartak kedi mhonn vir-bhoktanchi sakxi dili! Tori Devan bhasail’lem tem tankam mellunk na;

⁴⁰kiteak amchê khatir Devan odik vorti ievzônn tharailea: tim sogllim fokot amchê borabôr sopurnnaiek pavlelim Tachi khuxi.