Read Goan Konkani Heb 12 Bible Online

Heb 12 - Goan Konkani bible

Heb 12

¹Tôr atam hi sakxidaranchi urpônz eka vhodda porzollit kupa vori amkam veddho ghalun asa mhonn ami polletanv. Mhonntôch aplea bharan amkam chepun dovorta tem sogott ani ghott chittkon rauta tem patok ami soddun dium-ia, ani amche mukhar dhanvun kaddpachi dhanvodd asa ti, thirponnan dhanvot ravum-ia.

²Jezucher amche dolle lavun dovrum-ia, kiteak To amchea bhavartacho Fuddari ani Sompadnnar. Apnnak mellchem asa tea sukh-sontosak lagun, loz mhonn pollenastana, Tannem khursachem moronn sõslem, ani atam To Devachea xinvasonachea uzveak bosla.

³Tannem koxê bhaxen Apnnacher add patkeancho virôdh sõslo tem niallat, ani oxem tumi pattim sorchem nhoi punn kalljidar zaunchem.

⁴Patkacher add zhuztana, tumkam ozun rogot varoi porian tumkam zhuzunk poddunk na.

⁵“Mhojea puta, Sorvespor tujeô chuki tuka dakhoita tedna, tum Taka chit di; ani To tuka zupatti dita tedna, tujem mon moddonk dium naka. Kiteak zancho Sorvespor môg korta, tankam xist laita, ani zankam Apleô put-dhuvô mhonn lêkhta, tankam to xikxa dita.”, oxem tumi Aplim bhurgim mhonn Dev dakhoun dita to dhir-ghottaiechim utram tumi visorleant.

⁷Dev tumkam Aplim bhurgim koxim vagoita mhonn somzun, tumi xist xikchê khatir xikxa sosnnikaien gheiat. Bapain xikxa diunk naslolim konn tori bhurgim astit?

⁸Dusream bhurgeam porim tumkam Tachi xikxa poddona zalear, tumi Tachim khaxa bhurgim nhoi: tumi oniz bhurgim.

⁹Amche soimbache khaxa bapui amkam xikxa ditale ani tori ami tankam man ditaleanv; tôr, amkam Jivit mellpak, amchea sorginchea Bapaik kitlo odik ami man diunk favo na zait?

¹⁰Amche soimbache bapui, heam thoddeam disanchea jivita pasot, apnnank borem distalem tea pormannem, amkam xikxa ditale; punn Dev, amkam Aplê povitrtaient vantto diunk aitim korche khatir, kitem khoreponnim amkam faideachem tem polleun, amkam xikxa dita.

¹¹Xikxa poddta tea vellar ti khuxalkaiechi vôst nhoi, punn xikxen aitim zaleant tim Devak man’ta toslea jivitache xanticho inam gheunk pavtat.

¹²Tôr tumche thoklele hat voir ubarat ani tumchim koddkoddtelim dompram ghott korat,

¹³ani nitt rostear tumchim panvlam ghalun fuddem vochat; oxem kitem longddem tem sandea-ganttintlem bhair poddchem na, punn portench zalear adlem boll taka melltelem.

¹⁴Soglleam mon’xam kodde xantin chol’lea bogor ani tumi povitrtaiechem jivit jielea bogor, konnachean Sorvesporak polleunk zaina.

¹⁵Devachi doiallai konnakuch chukona zaunk chotraien cholat. Tumchê modem koddsannicheô kombriô vaddona zaunk ani tras upzonk dina zaunk chotrai dhôrat ani hanche udexim zaiteam zannanchim monam vikan bolltat.

¹⁶Tumchê bhitôr pozddim-onitivont vô Esau porim sonvsari monachim konnuch aschim nhoi. Tannem eka jevnnachê bodlek malgoddea putache aple hok’k vikle.

¹⁷Ani uprant to aplea bapaicho axirvad gheunk sôdtalo tedna, bapain taka portilo mhonn tumi zannont; dukamnim roddun porian tannem to maglo, punn bapaicho tharav bodlunk tachean ghòddlem na.

¹⁸Oronneant Israel-porjek zal’lem toxem, sanspunk zatat tosleam vostum-xim tumi ieunk nant: Sinai dongrar aslo toso, hanga zollto uzo na, kallôk-andhar na, tufan na,

¹⁹tuturecho sad na, gaztolea talleacho avaz-ui na. Tedna ho Devacho tallo aikoteleamnim apnnank anink ek porian utor aikunk naka mhonn nettan sanglem.

²⁰Karonn, “Êk mon’zat porian dongrak afuddlear tika fatramnim marchi.”, oso Devan ghal’lo khôr kaido tanchean sõsun gheunk zainaslo.

²¹Ani tem dorxon itlem bhirankull aslem, ki Moizesan mhonn’lem: “Hanv ttharea bhielam, hanv koddkoddtam!”

²²Punn tumi Sion Dongrar, jivea Devachea xara, hixôb-naslele devdut porbek zomlo-aslea, sorginchea Jeruzaleak pavleant:

²³Sorgar nanvam boroilelim asat team Devacheam malgoddeam putam-dhuvanche povitr sobhek tumi pavleant. Soglleam monxakullachi nit korto Deva xim ani sopurnnaiek pavoileant team Devak manovloleam mon’xancheam otmeam sorxim tumi pavleant.

²⁴Jezu Novea Koraracho Modêst, Tache-xim tumi aileant; Abelachea rogta von odik chodd ani boreo vostu bhasaito, amkam xudh’ korto vikrailelea Jezuchea Rogta-xim tumi pavleant.

²⁵Mhonntôch chotrai dhôrat: Dev tumchê kodde uloita tedna Taka kan dinastana ravum nakat. Devacho sondêx sonvsarant porgott’talo tachem aikunk na tim tachê khastik chukunk nant; toxem tôr sorgar thaun amchê lagim uloita Taka ami kan dinanv zalear, koxim mhonn ami sutt’toleanv?

²⁶Tachea tallean tedna prithum’ kampoili; ani atam Tannem oxi bhas dil’li asa: “Hanv anink ekdam prithumuch nhoi punn akhi srixtti kampoitolom.”

²⁷“Anink ekdam” heam utranchi somzonni oxi: kampoil’leô vostu, teô rochleleô dekhun, nanch zatoleô,ani kampunk zainant teô vostu oxeôch urteleô.

²⁸Nas korunk zaina toslem raj ami ghetanv dekhun dhin’vaxi zaum-ia ani, adoran ani bhoktin, Devak man’ta tê bhaxen Taka bhozum-ia.

²⁹Kiteak amcho Dev mhollear bhosm korta toslo zollto uzo.