Read Goan Konkani Heb 13 Bible Online

Heb 13 - Goan Konkani bible

Heb 13

¹Ekamekachim bhavbhoinn koxim mogan jieiat.

²Porkeank tumger biradd diunk visrum nakat. Oxem korun, thoddeam zannamnim nokllo zaun Devacheam dutank apleam ghoramnim gheun tancho poramôs kelo.

³Koidi zal’leam borabôr tumi-i koidi zal’lê porim, bondkhonnint asleleancho ugddas korat; ani tumi-i piddapidd sonsteleam porim, piddapidd sõstat tancho ugddas korat,

⁴Soglleamnim lognak favo to man diuncho, ani lognachi baz khot nastana samballchi, kiteak pozddeanchi ani pordvareanchi Dev nit kortolo.

⁵Tumchea jivitant girestkaiechi axa dhorum nakat, ani tumchê kodde asa titleanuch dhadoxi zaiat, kiteak khud’dh Devan oxem sanglam: “Hanv tuka kednanch sôddcho na nhoi mhonn sanddcho-i na.”

⁶Tôr ami kalljidarponnan mhonnum-ia: “Sorvespor mhaka adar diupi.Tôr mhaka kosli bhirant? Monis mhaka kitem korunk xokta?”

⁷Tumkam Devachem utor porgott kelam team tumcheam vhoddilancho ugddas korat; te koxe jiele ani ontorle tem lokxant dhorun tanchea bhavartachi dêkh gheiat.

⁸Jezu Krist kednanch bodòlna: kal, az ani sodankal To tosoch!

⁹Veg-veglle atvech xikovnnen tumkam nitt rostea velim koddsoraunk dium nakat. Jevnna-khannache nem’ palltat tankanch te kiteakuch upkarunk nant, team nemamnim nhoi punn Devachê doiallaien tumchim kallzam mozbut kelear ekdom’ borem.

¹⁰Amkam amchi khaxa vedi asa ani Adlea Korarachea povitr-sthanant seva kortat tankam amchê vedicher bhettoil’lem khaunk hôk’k na.

¹¹Adlea Koraracho porom’-iadnik mon’zatinchem rogot patkanchea bhogsonnea khatir Gabhareant vhorta; punn team mon’zatincheô kuddi xara bhair vhorun lastat.

¹²Heach khatir Jezu Apunn-ui Aplea khaxa rogtan porjek povitr korunk xarachea darvonttea bhair koxtt sõsun melo.

¹³Tôr ami-i Tachê-xim xara bhair vochum-ia ani Tachea mornnachê lojent vantto gheum-ia.

¹⁴Kiteak hea sonvsarant togta toslem xar amkam na; amchem zaunchem asa tea xarachê vatter ami asanv.

¹⁵Tôr To Somi mhonn amcheam onttamnim ucharun, Devak Jezu vorvim nirontorim amcho vakhann’nnecho iôdn bhettoum-ia.

¹⁶Bhavponnachea mogan ekamekak adar diun borem korunk visrum nakat: kiteak osle iodn Devak manovtat.

¹⁷Tumche vhoddil bhar gheun tumchea jivachi kallji ghetat, kiteak tãnnim aplea vavracho Devak hixôb diunk zai; tôr tanchem utor aikat ani tankam khaltim ravat. Hê bhaxen, te aplo vavr khuxal monan kortele; na zalear, te aplo vavr kortele punn haskar-suskar soddun, ani hem tumkam faideachem zaunchem na.

¹⁸Amchê-i pasot magit ravat. Amchea ontoskornnant koslich chuk na mhonn amkam khatri asa ani ami kortanv titleant-ui sarkem tem korunk amchi thir khuxi.

¹⁹Ani zata titlê vegim tumchê-xim hanv porot pavunk khotkhotean prarthonam korat: oxi mhoji vinoti.

²⁰Apleam koxttanchea mornna udexim sasnnik korar staplo tea xellianchea vortea Gonvllea amchea Somia Jezuk Devan mornnantlo punorjivont kelo.

²¹Apli khuxi korunk tumkam goroz teo soglleo boreo vostu xanticho Dev tumkam dium, ani Apleak manovta tem amche sovem, Jezu Krista udexim To korum. Ani Teach Jezu Kristak sasnnachea sasnnak mhoima. Amen.

²²Mhojeam bhavam-bhoinnimnô, tumkam ghottai diunk boroil’lim him mhojim utram borê bhaxen gheiat mhonn hanv magtam; heach khatir hem potr hanvem lamb korunk na.

²³Amchea bhava Timotak bond-khonnintlo sôddlo mhonn tumkam khobor ditam. To rokddo pavot zalear, hanv tumkam polleunk ietolom tedna taka mhojê borabôr haddtolom.

²⁴Soglleam tumcheam fuddareank ani somest bhoktank noman kortam. Italiecheam bhoktancho-i tumkam nomoskar.

²⁵Sodanch tumi Devachi doiallai bhogum. Amen.