Read Goan Konkani Heb 2 Bible Online

Heb 2 - Goan Konkani bible

Heb 2

¹Hea khatir, ami lotton vochona zaunk, amkam xikoileant team sotank odik zotnaien ami lokx diunk zai.

²Devdutam vorvim amcheam purvozank porgott zal’lem utor visvas favo aslelem, tem môddlem vô taka kan diunk na titlei pauttim tãnnim favo ti khast ghetli zalear,

³hede soddvonnechi ami beporva korin zalear, koxim mhonn ami khastintlim sutt’telenv? Hi soddvônn khud Somia vorvim porgôtt zali ani Tachi porgôttnni aikoli tãnnim amkam tichi khatri dili,

⁴teach borabôr, khunnam, ochoriam ani jin’nosvar vismitam vorvim, toxench Aplê khuxê pormannem vanttleleam Povitr Atmeacheam denneam vorvim Devan Apli govaiki dakhoun dili.

⁵Êk novi prithum’, mhonngê mon’xanchea jivitachi êk novi manddavôll, ieunchi asa: tichi khobor ami hanga kortanv. Hê novê prithumecho odhikar Devan devdutanchê adhin korunk na.

⁶Povitr Pustokar êkê svater konn-eklean oxem sangun hea vixim govai dilea: “Monis konn Ga, Tunvem tacho ugddas korcheak?! Mon’xacho put konn, Tunvem tachi porva korcheak?!

⁷Tori astana Tunvem taka devdutam poros matso sokla dovorlai, mhoimecho ani manacho mukutt tachea mathear ghalai.

⁸Ani soglleô vostu Tunvem tacheam pãiam tolla ghaleôi.” Soglleô vostu mon’xacheam pãiam tolla ghaleô zalear, tachê khal ghalinastana kãich ek dovrunk na. Punn khorem mhonn’lear, soglleô vostu mon’xachea hata khal asat mhonn ami ozun pollenanv.

⁹Tori Devache doiallaie udexim ek-eklea monxam pasot, moronn bhogunk poddche khatir, devdutam-vôn matso lhan zal’lea Jezuk ami polletanv. Tannem moronn sõslem dekhun, atam mhoimecho ani manacho mukutt Tachea mathear ghal’lo asa.

¹⁰Dev sorv vostuncho Oromb ani Xevôtt; zaiteam Apleam putam-dhuvank mhoimek vhorunk Tachi ievzônn asli dekhun, mon’xank soddvonnechê vatten choloun vhorto Jezuk koxttam-dogdam vorvim, Tannem sompadnnek pavounk zai aslo.

¹¹Karonn mon’xank patkantlim xud’dh korta Taka ani Tannem xud’dh kel’leant tankam êkuch Bap asa. Heach khatir tankam Aplim bhavbhoinn mhonnunk To lojena.

¹²Dekhun To oxem Devak mhonnta: Mhojeam bhavam-bhoinnink Tujem Nanv porgott kortolom, tanchi zomat bhòrta tedna sobhêmazar Tuka vakhanntolom.:

¹³Oxem-i To sangta: “Tacher Hanv visvas tthevtolom.” Anink-ui To mhonnta: “Ho polle Hanv asam, ani Devan Mhaka dileant tim bhurgim”

¹⁴Sogllim bhurgim ekach rogta-masachim dekhun, Jezu teach tanchea masa-rogtacho zaun ailo. Oxem mornnacher podvi choloitalo tacho, mhonngê devcharacho, Aplea mornna udexim Tannem nas kelo,

¹⁵ani mornnachê bhirantin akhea aplea jivitant gulam’ponnant jietalim tankam Tannem suttka dili.

¹⁶Khorench, devdutank modôt korunk To ieunk na, punn Abrahamachê sonstik.

¹⁷Hea pasot, porjecheam patkanchem bhog-sonnem zoddun gheunchê khatir Devachea fuddean doiall ani visvaxi Porom’-Iadnik zaunk, sogttant Tannem apleam bhavam-bhoinnim sarko zaunchem poddlem.

¹⁸Koxttam-upodream vorvim Tachich poili porikxa zali dekhun, atam zanchi porikxa zata tankam adar diunk To xokta.