Read Goan Konkani Heb 3 Bible Online

Heb 3 - Goan Konkani bible

Heb 3

¹Bhavam-bhoinnimnô, Apli povitr porza zaunk Devan tumkam vinchun kaddleant. Mhonntôch, ami uchartanv tea bhavartacho Devan pattoil’lo Porom’-Iadnik To Jezu mhonn tumchem lokx dovrat.

²Moizes Devachea ak’khea ghoranneant Taka visvaxi aslo tosoch, To Apnnak nemla Taka visvaxi ravlo.

³Ghor bandta tea mon’xak ghora poros chôdd man favo tosoch Jezuk-ui Moizesa-vôn vorto man favo.

⁴Khorench, khõichea-i ghorak tacho bandpi asta, punn soglleô vostu bandun haddleat to mhonn’lear Dev.

⁵Dev fuddarak sangcho aslo team vostunchi govaiki diunk, chakôr koso Moizes, Devachea ghoranneant visvaxi ravlo.

⁶Toripunn Put koso Krist, visvaxi Devachea ghoranneacher visvaxi odhikari zalo, ani kalljidarponnan ani thiraen amcho bhorvanso ami samballin zalear, Devachem ghorannem tem aminch.

⁷Hea pasot, Povitr Atmo mhonnta toxem, Az tori Tacho tallo tumi aikoxeat zalear, Challis vorsam-bhôr Mhojim kortutvam dekhlim zalearui, porikxechea disa oronneant tumcheam purvozamnim Mhoji porikxa fiturponnan korunk sôdli, toxi fiturponnan zal’lea porim, tumchim kallzam nibor kori nakat. Tea pasot, hê pinddkecho Mhaka kanttallo ailo. ani Hanvem mhonn’lem: ‘Tanchim kallzam sodanch vankddi vatt dhôrtat. Mhojeam vattanchi tankam ollokhk naslea!’

¹¹Mhojea ragachea vellar ho soput Hanvem ghetlo: ‘Hanvem bhasail’lea tea visovachea desant tim kodinch bhitôr sorchim nant.’

¹²Bhavam-bhoinnimnô, itlem nibor ani noxttea kallzacho ki jivea Devakoddcho koddsortolo toslo, tumchê bhitôr konnuch asona zaunk chotraien ravat.

¹³Portench zalear, voir sanglam to “AZ”, mhonnlolo aicho dis, asot porian, tumi ekamekak disan’dis dhir diat, oxem patkak bhulon konnuch tumche bhitorlim nibor kallzachim zaunchim nant.

¹⁴Kiteak survatek thaun amkam visvas aslo, to ami xevottak porian thirponnim samballin zalear, ami Kristachim bhagidar zaleanv;

¹⁵Povitr Pustok oxem sangta nhoi? Az tori Tacho tallo tumi aikoxeat zalear, fiturechea disa tumche purvoz zale toxe tumchim kallzam nibor korinakat!

¹⁶Devacho tallo aikolo ani Tacher kolpolim tim konn zait? Moizesan Ejiptantlim bhair kaddun vhelim tim sogllim nhoi tim?

¹⁷Konnacho Devak challis vorsam porian kanttallo dislo? Patok kelem ani oronneant morun poddlim tanchoch Taka kanttallo ailo nhoi?

¹⁸“Hanvem bhasail’lea visov-somadhanachea desant tim kodinch bhitôr sorchim nant”: Oso Devan soput ghetlo tedna, konnachi khobor kortalo To? Tacher kolpol’lim tanchi nhoi?

¹⁹Mhonntôch, tim ovisvaxi zalim dekhun, tanchean bhitôr sorunk zaunk na mhonn ami polletanv.