Read Goan Konkani Heb 4 Bible Online

Heb 4 - Goan Konkani bible

Heb 4

¹Aplea visov-somadhanant bhitôr sorpachi ti Devachi bhasavnni ozun amkai togta, dekhun tea bhasail’lea visov-somdhanant bhitôr sorunk, amche modlo konnuch chukona zaunk ami chotrai dhôrchi.

²Khorench, tanchê bhaxen ami-i tich bori khobor aikolea, punn ti aikoli tedna, tãnnim ti bhavartan gheunk na dekhun, tãnnim aikol’li ti bori khobor, tankam kiteakuch upkarunk na,

³Karann, “Mhojea ragachea vellar Hanvem soput ghetlo: ‘Hanvem bhasail’lea visov-somadhanant tim kodinch bhitôr sorchim nant.’ ”, oxem Tannem mhonn’lam tea pormonnem, Sonvsar rochla tê meren Devacho vavr somplo zalearui, atam, bori khobor bhavartan sotmandun ghetat tim ami tea visov-somadhanant bhitôr sortanv.

⁴Kiteak êkê svater Povitr Pustokar satvea disachi khobor korun oxem mhonnlelem asa: “Aplo vavr sompoun, satvea disa Devan visôv-somadhan ghetlo.”

⁵Tori astana visov-somadhanachi gozal dusrê kodden oxi sangleli asa: “Hanvem bhasail’lea visov-somadhanachea desant tim kodinch bhitôr sorchim nant.”

⁶kãi zannank visov-somadhan bhogunk Dev ozun bhitôr sorunk dita ani Devachi bori khobor poili pavli, tanchea ovisvasak lagun, tankam visov-somadhanant bhitôr sorunk mellunk na dekhun,

⁷“Az tori Tacho tallo tumi aikat: tumchim kallzam nibor korum nakat!”voir sangleleach utramnim, zaitea kalla uprant, “AZ”, oxem Davidachê tonddim uloun, Dev anink êk dis tharaun dovorta.

⁸Joxuan tê porjek Devan bhasail’lo visov-somadhan dil’lo zalear, tea uprant anink eka disachi khobor Dev kednanch korcho naslo.

⁹Mhonntôch, zoxem Devacho visôv-somadhan, Aplea vavrantlo thamblo To, têch bhaxen, bhasail’lea visov-somadhanant bhitôr sortat tim aplea vavrantlim thambtat dekhun, Devan satvea disa visôv-somadhan ghetlo, toxench Devachê porjek-ui êk satvea disacho visôv-somadhan dovorlolo asa.

¹¹Toxem tôr, tea visov-somadhanant bhitôr sorunk nettan fuddem vochum-ia; na zalear, oxem tanchê bhaxen ovisvaxi zaun, tankam visov-somadhan chuklo toxem amchea modlea konnakuch to visov-somadhan chukona zaum.

¹²Khorench Devachem utor jivem ani suddsuddit. Tem don-ui vattamnim pazlelê torvari sarkem. Zõi mon’xacho prann ani otmo toxench sandhe ani mendu doxim zatat, thõi porian tem rigunk xokta. Mon’xachea kallzache otrek ani chintnam topasun, tanchê vixim aplo nivaddo dita.

¹³Deva mukhar lipon urta tosli koslich rochna na, punn Tachê nodrek sogllem vingllem ani ugtem, ani Takach ami amchea jivitacho hixôb diunk zai.

¹⁴Mhonntôch sorgar riglolo êk xrêxtt Porom’-Iadnik Jezu, Devacho Put asa dekhun, ami uchartanv to bhavart thirponnim samballum-ia.

¹⁵Khorench, amcheam tallnneam-osoktaiamnim amkam buzvonn diunk xokona toslo ek porom iadnik nhoi to punn patok mat bhairaun, amchê bhaxen soglleam jin’sancheam tallnneam-koxttamnim Tachi porikxa zali toslo Eklo amkam asa.

¹⁶Tôr Devachê doiallaiechea xinvasona-xim dhir gheun vochum-ia. Thõi, adarachi amkam samki goroz tedna, kaklut and doiallai amkam mellteli.