Read Goan Konkani Heb 5 Bible Online

Heb 5 - Goan Konkani bible

Heb 5

¹Khorench, mon’xanchê votin Devachi seva korunk, patkanchea bhogsonnea khatir danam ani iodn somorpunk dôr-êk porom’-iadnik loka modlo kaddlolo ani nemlolo asta.

²To apunnuch soglleam vattamnim osokt dekhun, nennarponnim jietat ani vatt chukun geleant tanchê thãi to dulobaien vagunk xokta.

³Ani porjecheam patkam khatir to iodn bhettoita têch porim, aplêache-i osoktaiê pasot tannem iodn bhettounk zai.

⁴Porom’-iadnik zauncho ho man konnachean apnnakuch gheunk zaina: Aaronak dilem toxem, Devan taka apovnnem diunk zai.

⁵Têch porim Kristan Porom’-Iadnik zaunchi mhoima Apnnench Apnnak gheunk na; punn Devan Taka oxem mhonn’lam: “Tum Mhozo Put, Hanvem Tuka aichea disa zolm dila.”

⁶Toxench anink êkê svater Devan Taka oxem mhonn’lam: “Melkixedeka porim, konn adlo- fuddlo nastana, Iadnik Tum sasnna-sasnnak!”

⁷Apnnak mornnantlo nivarunk Ekleach Devak tank asa dekhun, Aplea sonv-sarantlea jivitacheam disamnim, Jezun vhoddlean bob marun ani dukam golloun Devak magnnim ani prarthona kelim, To khalto ani visvaxi dekhun Devan Tachem aikolem.

⁸Ani Devacho Put zaun-ui, apleam koxttam-dogdam vorvim sodam Devachê khuxek khalto zaunk To xiklo.

⁹Ani Devan Taka sompadnnek pavoun ani Taka Melki-xedeka porim Porom’-Iadnik mhonnun porgottun, khalteponnan Apli khuxi korteleam soglleank To sasnnik sodd-vonnechem mull-karonn zalo.

¹¹Hê vixim zaitem sangchem asa; punn kitem-i somzunk tumi zodd monachim zaleant dekhun, tachi-i somzonni tumkam diunk kottin.

¹²Khorench, itlea mhonno-sor tumi dusreak xikovnn diunk zai asli; anink konnem tumkam Devacheam utranchi mullavi xikovnn novean diunchi goroz asa. Tumkam dudachi goroz ani nhoi nibor jevnnachi!

¹³Konnui dudacheruch asta to dudachem ball zaun, Apnnak manovlelim Dev amkam korta te xikounne vixim taka khobor nasta.

¹⁴Vaddlelim mon’xam nibor jevonn jevtat; borea ani vaitta modem ontôr ollkhunk tankam obheas ani onnbhôv asa.