Read Goan Konkani Heb 6 Bible Online

Heb 6 - Goan Konkani bible

Heb 6

¹Oxem atam Krista vixim mullavi xikovnn sanddun, odik sopurnn xikovnnecher lokx ghalun fuddem vochum-ia. Mullaveam sotanchi anink khobor korchi nhoi. Tim mullavim sotam mhonn’lear him: moronn haddtat tim kortubam soddun divop, Devacher bhavart dovrop,

²batismam vixim, hat dovorpa vixim, mel’leanchea punorji-vontponna vixim ani sasnnik zhoddte vixim xikovnn.

³Mhonntôch fuddem vochum-ia, ani Devachi khuxi zalear, hench korunk amcho hetu.

⁴Mon’xank zôr êk pavtt uzvaddak pavoilim, sorginchem dennem tãnnim chaklem, tankam Povitr Atmo mell’lo,

⁵Devachea utrachi gôddsann tãnnim chakli ani ieuncho asa tea kalla-iugachem boll tãnnim onnbhovlem,

⁶ani tori astana bhavartachea marga velim zôr tim koddsorlim — tôr osleank novean jivit-mon bodlunk portun haddunk zaunchench na: tim apnnancheruch khast magun Devachea Putak novean khursar martat, sobhêmazar Tacheô kenddnneo kortat.

⁷Khorench zomin, apnnacher portun-portun poddta tem pavsachem udok pieun, roiteleank adavachim zhaddam utpon korun, Devacho axirvad gheta.

⁸Punn ti kantte ani sorantte utpon korit zalear, ti kiteakuch upkarona ani tika Devacho xirap favo zaupachi zata. Dev ticho ujean nas kotolo.

⁹Punn tumi, priticheamnô, hê bhaxen ami uloileanv zalear-ui, tumchi gôt odik bori ani soddvonnechê vatter tumi asat mhonn amkam khatri asa.

¹⁰Dev onitivont nhoi. Tachea Nanva khatir tumcho vaur ani bhoktanchi seva korun ani ozun-ui seva korun, tumi dakhoilo to mog To visorcho na.

¹¹Borvanxeachi samki khatri tumkam mellunk, tumchê modlea zonn-eklean tich hurba dakhounk, amchi vhôdd axa.

¹²He baxen tumi allxi zaunchim nant punn aplea bhavartan ani thiraien Devan bhasail’lem daiz ghetat tanchi dêkh tumi ghetelet.

¹³Devan Abrahamak bhasavnni keli tedna, Apnna-vôn vhôdd konn na dekhun, “Khorench, Hanv tuka subham’ axirvadan bhôrtolom ani tuji sonsôt hispa bhair vaddoitolom.”, oxem mhonnun, Tannem Apnnacheach nanvan soput ghetlo.

¹⁵Abraham’ sosnnikaien thir zalo ani oxem, Devan bhasail’lem tem taka mell’lem.

¹⁶Mon’xam soput ghetat tedna, apnnam-vôn konn vhôdd asa tachea nanvan soput ghetat, ani kitem sanglem tem thiraita ani koslo-i vad soputa vorvim mitton ieta.

¹⁷Têch porim, Aplê ievzonnê vixim Apli khuxi kednanch Apunn bodôlcho na mhonn bhasavnneancheam daijeank Dev ugteponnim dakhounk sôdtalo dekhun, Tannem ti bhasavnni soput gheun thir keli.

¹⁸Mhonntôch atam bodlunk zainant tosleam Devan kel’leam don vostum mhonnge bhasavnne ani soputa vixim Devachean amkam fottounk zaina. Hea pasot amchê mukhar dovorlelea bhorvanxeacher amchem mon ghott lavun dovrunk, amkam, Tachea asrea khal ail’leank, vhôdd dhir mellta.

¹⁹Zoxem nangôr doriant hoddem thir-surokxit dovorta, toxem ho bhorvanso amchem jivit thir-surokxit samballta. Melkixedekachea jin’sacho sasnnak sthaplolo Jezu, amcho Porom’-Iadnik, Sorgim-Devmondirachea podd’deantlean vochun Gabhareant amchê pasot riglolo asa: thõi ami pavo-sôr ho amcho bhorvanso amchea jivitak surokxa dita.