Read Goan Konkani Heb 7 Bible Online

Heb 7 - Goan Konkani bible

Heb 7

¹Razancher zoit vhorun Abraham’ porto ietalo tedna, Melkixedek, Salemacho raza ani Bhov-Vortea Devacho iadnik taka mell’lo ani tannem Abrahamak axirvad dilo.

²Tedna Abrahaman apunn gheun ail’lo titleacho-i dhavo vantto taka dilo. Melkixedek, poilê svater tachea nanvacho ôrth, “Promannikponnacho Raza”; dusre suater, to Salemacho raza, mhonnge “Xanticho Raza”.

³Tachea bapaichi vô avoichi, nhoi mhonn tachea khõicheach purvozachi, khoboruch na; to kedna zolmolo vô kedna melo hachi-i khobor na. Tachem iadnikponn Devachea Putachea iadnikponna sarkem: sodankal Melkixedekachi itlich khobor urteli, ki to iadnik.

⁴Kedo vorto to! Amchea porzapoti Abrahaman porian zhuzachê soglle luttichea malacho dhavo vantto taka dilo.

⁵Soglli Israelachi porza Abrahamachi sonsôt, punn fokot Levichea kullantle ki iadnik zatat; tori, je iadnik asat, tankam Somurti pormannem porjê koddsun, mhonngê apleanch bhavam-bhoinnim koddsun, dhavo vantto vosul korcho kaido asa.

⁶Melkixedek Abrahamachê sonstintlo nhoi aslo. Tori astana, tannem Abrahama koddcho dhavo vantto ghetlo ani Devacheô bhasavnneo ghetlelea Abrahamak tannem axirvad dilo.

⁷Dubhava virêt axirvad dita to axirvad ghetelea poros vorto.

⁸Eke vatten iadnikank laun polletana, dhavo vantto ghetat te iadnik mornnadik sade monis; punn Melkixedekak laun pollelear, dhavo vantto vosol kelo to Melkixedek, Povitr Pustok sangta tea pormannem, jivoch aspi.

⁹Mhonntôch, oxem Levi dusream koddcho dhavo vantto vosul korta zalearui, jedna Abrahaman dhavo vantto farik kelo, tedna Levin-ui kelo, oxem zalem.

¹⁰Karonn Melkixedek Abrahamak mell’lo tedna, Levi, aplea purvoza Abrahamak zolmuncho aslo.

¹¹Porjek dil’li ti Somurt Levichea iadnikponnacher dhòrleli asli; tôr, Levichem iadnikponn porjek sopurnnaiek pavounk upkarlelem zalear, Aaronachea jin’nsachea iadnika bodlek, Melkixe-dekachea jin’nsacho anink dusro Iadnik kiteak mhonn ieunk zai aslo?

¹²Mhonntôch, iadnikponnachi bodôlnni asta tedna, Somurtichi-i bodôlnni jerul zaunk zai.

¹³Heô vostu amchea Somia vixim sangleleô asat, punn To dusrea kullantlo. Ani hea kullantlea eklean-ui kednanch vedichi seva korunk na. To Judachea kullantlo zolmolo mhonn soglleank khobor asa; ani Moizesan, iadnikanchi khobor kortana, hea kulla vixim kãich sangunk na.

¹⁵Melkixedeka sarko anink eklo Iadnik ubo asta tedna, ami kitem sanglam tem odik spoxtt zata.

¹⁶To Iadnik zalo tem mon’xacheam kaidea-nemam pormonnem nhoi punn ovinaxi jivitachea bollan To Iadnik zalo.

¹⁷Khorench Tachê vixim Povitr Pustokar oxi govaiki dil’li asa: “Melkixedeka porim konn adlo- fuddlo nastana Iadnik Tum sasnna-sasnnak!”

¹⁸Mhonntôch kitench sompadnnek pavounk somurtik xokti nasli dekhun, adlo kaido kaddun uddoilo, kiteak to osokt ani nirupegi aslo, ani êk odik vorto bhorvanso Devan ude-so kela, ani hea bhorvanxea vorvim amkam Deva sorxim vochunk provês mellta.

²⁰Tea bhair, hê vixim Devacho soput asa. Dusreank iadnik kel’le tedna oslo soput naslo.

²¹Punn Jezu Iadnik zalo kiteak Devan soput gheun Taka oxem mhonn’lem: “Sorvesporan soput dila, dil’lem utor To pattim gheuncho na: Iadnik Tum sasnna-sasnnak!”

²²Soput gheun Devan ho korar sthaplo dekhun, hea odik ut’tôm’ korarachi khatri Jezu zala,

²³Hache bhair, adlea Korarache iadnik zaite zann asle, kiteak ek-eklo morun vetalo ani oxem sodankal seva korunk uronaslo.

²⁴Punn Jezu sasnnak jivo asa dekhun Tachem iadnikponn sasnnak togta.

²⁵Hea pasot, atam ani sodankal Tachê udexim Deva sorxem vochunk sôdtat tanchê khatir Deva mukhar vinoti korunk To atam ani sodankal, sasnnak jivo asa dekhun To tankam taronn diunk xokta.

²⁶Khorench, Devak manovlelea, niropradi, nixkollonk, patki mon’xam thaun kuxin kaddlelea, sorga voir ubarlelea—oslea Porom’-Iadnikachi amkam goroz asli.

²⁷Tancheam patkam khatir, sorkallim Tannem, tê êkech pauttim Apnnachoch iôdn kelo dekhun, To her porom’-iadnikam sarko nhoi. Taka poilê svater apleam patkam khatir ani uprant porjecheam patkam khatir disan’dis iodn bhettounchi goroz na.

²⁸Devan dil’lê Somurtin nemlele iadnik soglle osokt monis; punn Somurti uprant toch Dev soput gheun sasnnak sompadnnek pavoil’lea Putak Iadnik nemta.