Read Goan Konkani Heb 8 Bible Online

Heb 8 - Goan Konkani bible

Heb 8

¹Ami sangun aileanv tantlem chodd mhotvachem mhonn’lear hem: sorgar, Bhov Vortea Devachea xinvaso-nachea uzveak boslolo Porom’-Iadnik amkam asa To,

²ani mon’xamnim nhoi punn khud Devan bandlelea osôl-khorea Tombucho mhonnge Gabhareacho Sevok To.

³Dôr-êk porom’-iadnik danam ani iodn somorpunk sthaplolo asta; hea-i Porom’-Iadnika lagim kitem-i tori somorpunk asunk zai.

⁴Ani Somurtin formail’lim danam bhettounk dusre iadnik astat dekhun, Jezu hea sonvsarant aslolo zalear, Somurti pormannem To iadnik nhoi asto aslo.

⁵Moizes Tombu tannunk vetalo tedna, Devan taka sanglem: “Dongrar tuka dakhoil’lo tea nomunea pormannem sogllem chotraien kôr.” Moizesa sombondim ghòddlem toxench, he iadnik kortat to, ho vaur sorgar kitem asa tachem fokot ek chitr ani savlli.

⁶Tôr atam, jitlo Adlea Korara von odik xrêxtt Koraracho Jezu, Modêst zaun asa, title tanche seve von odik xrextt hi Tachi seva; ho Korar odik vorteam bhasavnneancher sthaplolo asa.

⁷Khorem mhonn’lear, tea poilea korarak koslich khôdd nasli zalear, dusrea anink korarachi koslich goroz aschi nasli.

⁸Tôr tea lokacho guneanv korun Dev oxem sangta: “Polleiat, Hanv Israelachea ghorannea kodde ani Judachea ghorannea kodde êk novo korar kortolom, te dis ietat — uloita to Sorvespor!

⁹Tancheam purvozanchea hatak dhorun Ejipt desantlim hanvem bhair kaddlim, toslo ho korar zauncho na. Tim Mhojea korarak visvaxi ravlim nant ani hea pasot Hanvem tankam soddun dilim — uloita to Sorvespor!

¹⁰Te dis pavtôch, Israelachea ghorannea kodde Hanv korar kortolom to oslo: — mhonnta Sorvespor — tanchea monant Hanv Mhoje kaide ghaltolom, ani tancheam kallzancher Hanv te boroitolom. Ani Hanv zatolom tancho Dev ani tim zatelim Mhoji porza.

¹¹‘Sorvesporachi ollokh korun ghe’, oxem mhonnun xezarean vô xezarnnin apleam xezareank ani bhavan vô bhoinnin apleam bhavam-bhoinnink anink xikounchi goroz poddchi na: Hanv aplo Dev mhonn tumchê modlim sogllim Mhaka ollkhotelim vhodd-vhodd toxim lhan-lhan mon’xam,

¹²Kiteak Hanv tanche oprad bhôgxitolom ani tancheam patkancho ani-anink ugddas korcho na.”

¹³Novea eka korarachi khobor korta mhonntôch, to poilo korar Devan rôd’d kelo. Tôr kitench pornnem zaun dis bhortat tem xekim nanch zaunk pavta.