Read Goan Konkani Heb 9 Bible Online

Heb 9 - Goan Konkani bible

Heb 9

¹Bhoznne toxench sonvsari povitr- sthana khatir poilea korarant kaide-formavnneô asleô.

²Êk Tombu bandlolo aslo, tachea poilea bhagant dovorlolo aslo êk zhumbôr, ek mez ani Devak bhettoil’le undde: hea Tombuk “Povitr Sthan” mhonntat.

³Dusrea bhagant, podd’dea uprant, “Porom’-Povitr Sthan” vô “Gabharo” mhonnlolo anink êk tombu bandlolo aslo.

⁴Hantum bhitôr dhump zollounk bhangarachi vedi asli ani soglleam vattamnim bhangaran nettoil’li korarachi pett; hê pettent aslem man’na bhôrlelem ek bhangarachem pettul, panam futtleli Aaronachi betkatti ani koraracheô fatriô.

⁵Pettê voir Devachem bhogsonnem ghevpachi êk svat asli, ani thõi mhoimevont Devachem hajirponn dakhounk, pakotte aslele devdut hê svatê voir aple pakotte vistarun astale. Punn hea soglleachi barkaien khobor kaddcho ho vêll nhoi.

⁶Heô vostu hê bhaxen manddleleô astana, aple seveche kaide pallunk iadnik dôr-disa poilea tombunt bhitôr sortat.

⁷Punn dusrea tombunt, fokot porom’-iadnik provês korta, ani tem-i zalear, nennarponan kel’leam apleam ani pojecheam patkam khatir, rogot gheun, vorsak êkuch pavtt bhitor sorta ani tem bhettoita.

⁸Oxem, hea sonvsarantlea Gabhareacho tombu ozun togtalo titlo-i kall sorginchea Gabhareachi vatt ugti zaunk nasli mhonn Povitr Atmo dakhoun dita.

⁹Tacheam team nemam pormannem Devak somorpitat, team danank ani iodnank, bhozpeanchim ontoskornnam sopurnn korchi podvi na mhonn dakhoito atanchea kallachi êk khunna ti hich.

¹⁰Heô soglleô formavnneo kuddichea jivitak lagu zatat tosleô: khannam, pinneam ani kudd nitoll korpacheô veg-veglleô riti; Devan ek novi manddavoll stapit porian kuddichea jivitak lagu zatat teo formavnneo-nem choltat.

¹¹Punn ieuchim aslim team boream denneancho Porom’-Iadnik koso Krist ailo ani odik vortea ani odik sopurnn tea, mon’xamnim bandlolo nhoi tea mhonngê hê rochnnecho nhoi tea Tombuntlean Tannem provês kelo.

¹²Toxench To bokddeanchem vô paddkuleanchem rogot gheun bhitôr vochunk na; punn Aplench rogot gheun sorvkallim Tannem tê êkêch pavttim Gabhareant provês kelo ani sasnnik taronn amkam zôddlem.

¹³Bokddean-chem ani paddkuleanchem rogot ani laslelê paddiecho gobôr oxud’dh asloleancher xitoddaun, tim tancho mhêll kaddun, tankam riti-nemam pormannem xud’dh kortat zalear,

¹⁴Kristan sasnnik Atmea vorvim nixkollonk boli koxi Apnnakuch Devak bhettoilo; mhonntôch, ami jivea Devak bhôzchê khatir, ekdomuch odik Tachem rogot amchim ontoskornnam mornnadik kortubantlim xud’dh kortelem!

¹⁵Adlea korarachea kallar kel’leam opradantli suttka diunk Jezu melo; Devan apoil’leank bhasail’lem sasnnik daiz mellchê khatir, To Novea Koraracho Modêst zalo.

¹⁶Moronn-potr asot thõi, thõi tem potr korun dovorlo to monis mela mhonn ruzu korchi goroz asa.

¹⁷Moronn-potr korta to jivo aso-sôr tem potr upkartelem zaina; fokot tea mon’xachea mornna udexim tem potr upkartelem zata.

¹⁸Heach khatir, poilo korar-ui rogta viret sthapunk na.

¹⁹Tôr, Moizesan Somurtiche soglle kaide akhê porjek vachlea uprant, tannem paddkuleanchem ani bokddeanchem rogot ghetlem, tantum ilem udok misoll kelem, ani tambddi lonv ani xitoddeachi thalli gheun tem Pustokacher toxench sogllê porjecher xitoddaun mhonn’lem:

²⁰“Devan tumchê kodde korar korunk tharaila: tea korarachem rogot hem.”

²¹Têch porim, Moizesan tombucher ani Devak bhozunk vapuddtat team soglleam aidonancher tem rogot xitoddailem.

²²Ani somurti pormannem chodd-chodd vostunchi xud’dhavnni rogot vaprun zata ani rogot vikrailea xivai bhogsonnem na.

²³Atanch sangleat teô vostu sorgincheam vostuncheô proti, ani teô hê bhaxen xud’dh korunk zai aslêo mhonntôch, sorgincheam vostum pasot xud’dhavnni korunk tea-vôn odik vorteam bolidananchi goroz.

²⁴Mon’xa-mnim kel’lo Gabharo khorea Gabhareachem fokot ek chitr: oslea Gabhareant Krist bhitôr sorunk na; To khorem mhon’lear khud sorgar bhitôr sorlo ani oso To atam amchê khatir Deva mukhar ubo zalo.

²⁵Zoxem aplem nhoi tem rogot gheun, vorsachea vorsa porom’-iadnik Gabhareant provês korta, toxem Kristak Apli bhettovnni bogor-bogor korchi goroz na;

²⁶na tôr, sonvsar rochla tê meren Tannem zaitê pavtti sõschem poddto aslem. Punn atam, kallam-iuganchê sompadnnek, Apnnacho iôdn korun, patok kaddun udounk, sorvkallim To tê êkêch pavtti dixtti poddlo.

²⁷Zoxem êk pavtt mon’xak morunk ani tea uprant tanchi zhôddti zaunk nirmilam;

²⁸toxench somestan-chim patkam kaddun uddounk Kristan Apnnakuch êkêch pavtti somorpun dilo; dusrê pavtti, patok kaddunk nhoi, punn Apli vatt polleun asteleank taronn diunk, To dixtti poddtolo.