Read Goan Konkani Jak 1 Bible Online

Jak 1 - Goan Konkani bible

Jak 1

¹Hanv Jakob, Devacho ani Somia Jezu Kristacho sevôk, zollim-mollim ximpoddlelê Devachê akhê porjek noman kortam.

²Mhojeam bhavam-bhoinnimnô, tumcher jin’nsovar koxtt-dogd ietat tedna, khuxal zaunchi gozal mhonn monant dhorat.

³Kiteak mhonn’lear, oslê bhavartachê porikxent Jezucher tumcho bhavart halona zait zalear, bhavarta pasot koslê-i piddapiddê modem tumi odik thir astelet;

⁴oslea thirponnan tumi soglleanch vattamnim Tache poripurnn xis zaunk pavtelet, kosloch sugunn tumkam unno ascho na.

⁵Dev dita ti zannvai tumchê modlea konnank-ui na zalear, tãnnim ti Deva lagim magchi; To ti tankam ditolo, kiteak To soglleank udarponnan borê khuxen dita.

⁶Punn kosloch dubhav dhorinastana, bhavartan ti magunk zai; dubhav dhôrtat tim varean halta-dolta toslea doriachea lhara sarkim.

⁷Doxim-i oddon, sodam othir panvlamnim choltat tosleam mon’xamnim apunn magtat tem Sorvespora koddchem ghetelim mhonn chintunk favo na.

⁹Konnui amcho bhav vô amchi bhoinn gorib zalear, Dev apnnak voir kaddtolo mhonn tannim visvas dhorun sontôs bhogunk zai;

¹⁰toxench konn bhav vô bhoinn girest zalear, Dev tankam khala poddunk dita tedna tannim-i sontôs bhogunk zai. Kiteak tonnachea fula bhaxen girest mon’xam nanch zatelim.

¹¹Suria mollbar voir choddtam-choddtam, tachem koddok vot tonn sukoita, tonnachem ful poddta ani fulachi surupai ubun veta. Oxench, aplo vepar-dhondo korit astana, girest mon’xam bavun-sukun vetelim.

¹²Koxttam-dogdam modem thir ravtat tim subhagi: oslim monxam porikxent iesvont zatat tedna, Aplo môg korteleank bhasail’lo, jivitacho mukutt Sorvespor tankam ditolo.

¹³Apnnacher tallnni ieta tedna, konnench oxem mhonnchem nhoi: “Dev mhaka hê tallnnent ghalta”; kiteak tallnni Devak lagoch na, nhoi mhonn Dev-ui konnakuch tallnnent ghalina.

¹⁴Punn zonn-ekleak ap-apli vondovnni vaittachê vatten ôddta ani bhuloita.

¹⁵Zoxi êk bail gorbest zaun bhurgeak zolm dita, toxi amchi vondovnni vaittacho gôrb dhorun patkak zolm dita, ani magir patka thaun upzota tem sasnnachem moronn.

¹⁶Mhojeam bhov mogacheam bhavam-bhoinnimnô, tumi tumkanch fottoum nakat.

¹⁷Sogllem borem ani sompurnn dennem voir thaun uzvadd rochlelea Bapa thaun denvta. Tache sovem koslench bodlop na.

¹⁸Prothom’ follam vori soglleam Apleam rochnnam modem ami poilim zaunchê khatir, Aplêch khuxechê ievzonnen, sotachea utra vorvim Tannem amkam novo zolm dilo.

¹⁹Mhojeam priticheam bhavam-bhoinnimnô, hacho tumi ugddas dhôrat: ami sogllim aikunk suddsuddit zaunchim, punn ulovpant ani rag dakhovpant amkam uttavollai aschi nhoi.

²⁰Kiteak ami mon’xam ragan kitem-i kortanv tedna, Devak zai tem uttpon zaina.

²¹Hea khatir sogllem mhelleponn ani sogllê torechem khotteponn soddun diat. Devan tumcheam kallzamnim Aplem utor vomplam, ani tumkam taronn diunk xokta tem Utor khaltikaien mandun gheiat.

²²Devachem utor fokot aikun tumkanch fottoum nakat, punn Devachea utra pormannem cholat.

²³Jim konn Utor aikotat punn tem pallinant, tim aplench tondd eka arxeant polleteleam mon’xam sarkim:

²⁴Tãnnim apnnankuch borê bhaxen pollelim, magir tim gelim ani apnnanchem rup koslem aslem tem tim visorlim.

²⁵Punn sot’techi sompurnn somurt niallta ani tika thir rauta ani aikun ticher visôr ghalinastana, apleam kornneamnim ti pallta to apunn korta titleantui axirvadik zatolo.

²⁶Konn apunn bhoktivont mon’xam mhonn chint’tat punn apli jib tim damun dhorinant zalear, tanchi bhokti polki; tim apnnankuch fosoitat.

²⁷Onathanchi ani vidvanchi tancheam trasamnim ani gorzamnim kallji ghevop ani patkak lobhdol’lea sonvsara thaun mekllim ravop, hem ki Deva amchea Bapa mukhar xud’dh ani nixkollonk bhoktiponn.