Read Goan Konkani Jak 2 Bible Online

Jak 2 - Goan Konkani bible

Jak 2

¹Mhojeam bhavam-bhoinnimnô, Jezu Krista, amchea mhoimevont Somiacher, tumi bhavart dovortat zalear, tonddak polleun lokak vagoum nakat.

²Tumchi sobha bhòrta tedna, dogam mon’xam bhitôr sortat mhonn somzat: eklo bhangarachi mudi ani nazuk vostram ghalun, ani dusro bondram nhesun konn gorib monis.

³Borem nhesun ail’leak tumi manan ghetat ani taka mhonntat: “Hê manachê svater bos.” Ani tea goribak mhonntat: “Ho-thõi ubo rav”, vô “hanga sokol, mhojeam pãiam lagim bos.”

⁴Hem kitem? Tumchêch modem vegllochar kortat nhoi tumi? Khotto nêm’ dhorun ho nirnnoi tumi dila!

⁵Aikat, mhojeam bhov mogacheam bhavam-bhoinnimnô: sonvsara porma-nnem konn gorib asat? Tankam Devan vinchun kaddleant ani bhavartachi girestkai dilea mhonn nokllot tumi? Ani hankam ki Tannem Apnnacho môg korteleank, bhasail’lea Rajeachem daiz dilam.

⁶Punn tumi zalear goribank beman kortat. Zobordosten tumkam piddapidd diun neaisobhent oddun vhortat tim konn? Girest lôk nhoi?

⁷Tumchê voir ucharlam tea vondivont Nanvachi ninda kortat tim tinch nhoi?

⁸“Tuzo môg kortai tosoch tujea peleacho kôr!” — ho Povitr Pustokant dil’lo Devachea Rajeacho mukhêl kaido tumi samballxeat zalear, borem kortat.

⁹Punn tumi mon’xank tondda pormannem lêkhtat zalear, tumi pap kortat ani tumkam guneanv asa mhonn Somurt nirnnoi dita.

¹⁰Karonn jim konn akhi Somurt samballtat punn ticho êk nêm’ porian môddtat, tim akhi Somurt môddlelê porim guneanvkar zatat.

¹¹Kiteak Zannem mhonn’lam: “Pordvar korum noiê”, Tannem oxem-i mhonn’lam: “Jivexim marum noiê.” Tunvem pordvar korunk nãi mhonn dhorum-ia punn konnak jivexim marloi zalear, tunvem Somurt môddlich.

¹²Amkam suttka dita tê Somurti pormannem Dev amchi zhôddti kortolo, tôr tê Somurti pormannem uloiat ani cholat.

¹³Peleak doia dakhounk na team mon’xanchi zhôddti kortana Dev-ui tankam doia dakhouncho na. Mhonntoch doia dakhoi ani zott’te disak tuka doia mellteli.

¹⁴Mhojeam bhavam-bhoinnimnô, apnnank bhavart asa mhonn konn-konn mhonntit punn kornneamnim tim aplo bhavart dakhoina zatit zalear, to bhavart tankam kiteak upkarot? Ho bhavart tankam suttka diunk xokta?

¹⁵Êk bhav vô bhoinn vingllim bhonvtat ani tankam dispotto giras na,

¹⁶ani tumchê modlim konn-konn oxem tankam mhonntat mhonn somzat: “Xantin vochat, ubek angak kitem-i ghalat, ani pott-bhôr jevat.” Punn heam tancheam kuddicheam gorzank tumi pavonant zalear, kiteak upkarot?

¹⁷Bhavarta vixim oxench ghòddta: kornneo nant zalear, bhavart mel’lo zata.

¹⁸Ghoddiek konn mhonnot: “Thoddeam amcheam bhavam-bhoinnink bhavart asa, dusrim boreô kornneô kortat. Hachê vixim kitem sangchem?” Boreô kornneo korinant tosleam mon’xank khorench bhavart asa mhonn dakhoixi tum mhaka? Hanv zalear boreô kornneo korun mhaka bhavart asa mhonn dakhoitam.

¹⁹Dev êkuch mhonn tum sotman’tai mum? Borem kortai. Denvchar-ui toxench sotman’tat ani bhirantin koddkoddtat.

²⁰Arê dêddxannea, kornneam vinnem bhavart mel’lo zata mhonn tuka dakhoum?

²¹Amchea bapa, Abrahaman vedicher aplea puta, Izakak somorpun dilo tedna, kornneank lagun taka Devan Apnnak manovlolo korunk na?

²²Hê bhaxen, tacheam kornneam vangdda tacho bhavart vavurtalo, ani teach kornneam vorvim tacho bhavart sompadnnek pavlo, hem lokxant ghe.

²³Oxem hem Povitr Pustokantlem utor ghoddon ailem: “Abrahaman Devacher bhavart dovorlo ani hea bhavartak lagun taka Devan Apnnak manovlolo kelo.” Ani Devan taka Aplo ixtt mhonnlo.

²⁴Mhonntôch bhavarta pasotuch nhoi, punn kornneam pasot mon’xak Dev Apnnak manovlolo korta mhonn tumi polletat.

²⁵Toxench Rahab xindôll bailê vixim ghòddlem: tinnem bhedeank borê bhaxen ghetle ani dusrê vatten tankam dhaddle dekhun, ticheam heam kornneank lagun tika Devan Apnnak manovleli keli, oxem nhoi?

²⁶Zoxi pranna vinnem kudd mel’li zata, tosoch bhavart kornneam vinnem mel’lo zata.