Read Goan Konkani Jak 3 Bible Online

Jak 3 - Goan Konkani bible

Jak 3

¹Mhojeam bhavam-bhoinnimnô, tumchê modlim chodd-xem xikoupi zaunk fuddem sorchim nhoi, kiteak toxem ami odik khôr zhôddtek sampddonk xoktanv mhonn ami zannonv.

²Khorench ami sogllim zaiteam vattamnim chuki kortanv. Utramnim kednanch chuk korinant tim mon’xam sompurnn; apnnankuch tanchean purnntaien domaunk zata.

³Amkam zai tem korunk ghoddeachea tonddant logom’ ghalem mhonntôch, taka soglloch amkam zai toso bhonvddaunk zata.

⁴Vô tarvank polleiat: kedim-i vhodd tim zaum, kitlea-i khôr varean tim lotton vochum, eka dhakktulea verea udexim tanddelan apnnak zai thõi tim vhorunk zata.

⁵Oxench jibê sorim ghòddta: ti êk lhan sandho khoro, punn apnnachich vhôdd boddai ti sangunk xokta. Ujeachi êk dhakttuli kitt koxê bhaxen ek vhoddlem ran lasun uddounk xokta tem chintat.

⁶Jib-ui ujeachêch bhaxen. Amcheam sandheam modem jib apunnuch êk khotteponnacho sonvsar: akhi amchi kudd ti khotaita ani, emkonddantlea ujean apunnuch lason, aplea ujean akhea mon’xakullachea jivitachem chokr ulpaun uddoita.

⁷Sogllê torechi ran’votti mon’zat, suknnim, jivannim ani maslli mon’xanchean domaunk zata ani mon’xamnim domaileant;

⁸punn jib domaunk konnuch xokona. Ti mon’xank thar-dinaslelem vaitt, marekar vikan bhòrlelem.

⁹Tichê udexim Deva, amchea Bapak, ami dhin’vastanv, ani tichêch udexim Devachea sarkeachim rochleleam mon’xank xiraptanv.

¹⁰Axirvad ani xirap teach tonddantle bhair sortat. Mhojeam bhavam-bhoinnimnô, hem oxem zaunk favona.

¹¹Êkêch zhorichea ekach tonddantlean godd udok ani koddu udok kedna tori vhanvtat?

¹²Mhojeam bhavam-bhoinnimnô, eka anjirachea zhaddak dakô zaleô ani êkê dakanchê valik anjiram zalim mhonn asat? Toxench kharem udok vhanvta thõisorlem godd udok vhanvum nozo.

¹³Tumchê modem zannvaiechim ani somjikaiechim asat konn? Tãnnim aplea jivitachê borê chalin, mhonngê nomrutaien ani zannvaien kel’leam kornneam vorvim, apunn toslim mhonn dakhounchem,

¹⁴Punn tumchea kallzant nirddukaiechi kôddsann vô svarti axa asa zalear, tumchi boddai korinakat vo sot tem fottimnim lipoinakat.

¹⁵Osli zannvai sorgar thaun iena ti sonvsarantli, mon’xa-soimbachi ani devcharachi.

¹⁶Zõi nirddukai ani apleponn asat, thõi duspôtt ani sogllê torechem vaitt.

¹⁷Sorgar thaun ieta ti zannvai poilê svater nirmôll; tea bhair xant, dulôb ani bholi; ti konnvallaien bhòrleli ani boream kornneanchem pik dita tosli; ti tonddam polleun kamam korina, ddhongeponnan-ui cholona.

¹⁸Xanti-korpi mon’xam jitlim xantichim biam vompun vetat, titlem Devak man’ta toslea jivitachi pik tim lunvunk pavtat.