Read Goan Konkani Jak 4 Bible Online

Jak 4 - Goan Konkani bible

Jak 4

¹Zhuzam ani zhogddim tumchê mo dem khõi thaun upzotat? Tumchêch bhitôr zhuz kortat team vondovnneam thaun tim upzotat, oxem nhoi?

²Tumkam kitem zai tem, tumkam mellona; mhonntôch tumi dusreacho jiv kaddunk toiar astat. Vhôdd axen kiteachê pattim tumi lagtat, punn ti vôst tumchea hatant poddona; tedna tumi tumchê modem zhogddim ani zhuzam kortat. Tumkam zai tem tumkam mellona, kiteak tumi tem Deva lagim maginant.

³Tumi girestkai magtat ani Dev ti tumkam dina kiteak vaittovea monan tumi magtat: mhonngê tumcheô vondovnneô bhagoun ti girestkai hogddaunk tumchem mon asa.

⁴Tumi Devak ovisvaxi! Hea sonvsarachi ixttagôt Devachi dusman’kai mhonn nokllot tumi? Kiteak khorench, jim konn hea sonvsarachi ixttagôt zôddtat, tim Devachim dusman zatat.

⁵“Devan amchê bhitôr tthikan korunk Aplo Atmo ghala To amchea mogak premaxen otrekta”, oxem Povitr Pustok sangta tem bexttench dista tumkam?

⁶Tori To odik udarponnan Apli doiallai amkam bhogunk dita; hea pasot Povitr Pustok sangta: “Dev gorvixttank zollta ani khalteank Apli doiallai bhogunk dita.”

⁷Oxem tôr, Devak khaltim zaiat; devcharacher zhuz korat ani to tumchê thaun pollun vetolo.

⁸Jitlim tumi Devak lagim sortat, titlo Dev tumkam lagim sortolo. Patkeamnô, tumche hat nitoll korat! Sonvsaracho ani Devacho borabôr môg korunk sôdtat tim tumi, tumchim kallzam xud’dh korat!

⁹Tumchem dolldirponn polleun khontiborit zaiat ani roddat; hanschê svater rudon korat, ani khuxal aschê svater dukh korat.

¹⁰Sorvespora mukhar khaltim zaiat ani To tumkam voir kaddtolo.

¹¹Mhojeam bhavam-bhoinnimnô, ekamekachem vaitt uloinakat. Jim konn aplea bhavachem vô bhoinnichem vaitt uloitat vô tanchi nit kortat, tim Somurticher add uloitat ani tichi nit kortat; ani Somurtichi tum nit kortai zalear, tum ti pallinãi punn ticho mon’subidar zatai.

¹²Dev ekloch Somurt-Datar ani To ekloch Mon’su-bidar. Taka ekleakuch taronn diunk ani nas korunk tank asa. Punn tujea peleachi nit korunk tum konn?

¹³“Az vô faleam omkea nogrant ami vetelenv, thõi ek voros-bhôr ravtelenv, dhondo kortelenv ani khup girestkai zomoitelenv” — oxem mhonntat tim tumi, mhojem aikat.

¹⁴Faleam kitem zatelem tem tumi kãich nokllot. Tumchem jivit mhon’llear kitem? Tem dova sarkem: thoddo vêll to dixtti poddta ani uprant nanch zata.

¹⁵Tumi mhonnchem tem itlench: “Devak zai zalear ami jivim astelenv ani hem vô tem kortelenv.”

¹⁶Punn atam gorvan bhoron tumi boddai sangtat! Osli boddai sodanch vaitt.

¹⁷Mhonntôch, jim konn kitem sarkem tem zannont ani tori tem korinant, tankam guneanv asa.