Read Goan Konkani Jak 5 Bible Online

Jak 5 - Goan Konkani bible

Jak 5

¹Atam tumkam girestank sangtam: tumcher ieunche asat team hal-upodreank lagun vilap ani rudon korat.

²Tumcheô girestkaiô kusun geleat ani tumchim vostram sannxen kheleant.

³Tumcheam bhangarak ani rupeak kollom’ laglea ani tanchi kollom’ tumcher add govai diteli ani tumchem mas khaun uddoiteli. Nimanne dis pavot ietat, ani tumi punzaileat teô girestkaiô team disank tumkanch girasunk êk uzo.

⁴Tumcheam xetanchi lunvnni kelea team vavraddeank tumi mozuri diunk na: tich atam tumcher add bob marta. Tancheam huielincho sad Sorvespora Sorpodvedar Devachea kanar poddla.

⁵Hea sonvsarant tumchem jivit sust-sukhachem ani dobajeachem zalam, ani oxem tumi gorvam bhaxen chorbevun geleant, punn tumkam marun uddovpacho dis lagim asa.

⁶Niropradi mon’xancher formonn marun tankam tumi jivexim marlim; ani tãnnim tumcher add boll korunk na.

⁷Mhojeam bhavam-bhoinnimnô, Somi ie porian sosnnikai dhôrat. Xetkamteacho ugddas korat: zomin utpon korteli tea moladik pikechi axa dhorun, to xorod-kallachea ani vosont-kallachea pausak sosnnikaien ravta.

⁸Toxench tumi-i sosnnikai dhôrat; thir asum tumcho bhorvanso, kiteak Somi ieuncho zalo.

⁹Tumcher khastichem formonn poddona zaunk, bhavam-bhoinnimnô, ekamekacher gunngunnum nakat; ho polle Nitidar tumchea darachea umbrear ubo asa.

¹⁰Mhojeam bhavam-bhoinnimnô, Sorvesporachea nanvan uloileat team provadeancho ugddas korat: tankam khup koxtt-dogd sôsche poddle tedna, tãnnim te vhoddê sosnnikaien ghetle; tôr tanchi dêkh gheiat.

¹¹Tanchê sosnnikaiê pasot tankam ami subhagi mhonntanv. Jobachê sosnnikaiechi khobor tumi aikolea, ani koso Sorvesporan xevottak taka subham’ axirvad dilo, tem tumi zannont. Kiteak Sorvespor konnvallo ani maiêmogacho.

¹²Choddan-chodd, mhojeam bhavam-bhoinnimnô, soput gheum nakat — zaum sorgachean, zaum sonvsarachean, zaum dusrê koslê-i vostuchean. Tumchem ulovop itlench zaum-di: hôi zalear “Hôi”, ani nam zalear “Na”. Na tôr, tumi Devachê nitik sampoddtelet.

¹³Tumchê modem konn trasank sampoddleant? Tãnnim prarthon korchem. Konn khuxal asat? Tãnnim dhin’vasnnechim gitam gavchim.

¹⁴Tumchê modem konn piddest asat? Tãnnim povitr-sobhecheam zannteank apounche: hãnnim tanchêr magnnem korchem ani Somiachea nanvan tankam telan makhchim.

¹⁵Bhavartan kel’lea magnnea vorvim piddest mon’xam piddentlim utthtelim ani Somi tankam novean bholaiki ditolo; ani tãnnim patkam keleant zalear, tankam Devachem bhogsonnem melltelem.

¹⁶Mhonntôch Devan tumkam bholaiki diunchê khatir ekamekak tumchim patkam ucharat ani ekameka pasot magat. Devak manovlelea mon’xachem magnnem bolladik ani gunnvont.

¹⁷Elija amchêch bhaxen monis aslo; paus poddona zaunk tannem khotkhotean maglem ani saddê-tin vorsam prithumer paus poddunkuch na.

¹⁸Uprant tannem novean magnnem kelem ani mollban paus ghalo ani zomnin aplim follam dilim.

¹⁹Mhojeam bhavam-bhoinnimnô, tumchê modlo konn-konn sota thaun koddsorlim zalear ani dusrim konn tankam portun haddtit zalear,

²⁰hãnnim hem motint dhôrchem: jim konn khottea rostean cholteleam patkeank portun haddtat, tim tankam mornnantlim vattaitelim ani zaiteam tancheam patkank Devachem bhogsonnem favo kortelim.