Read Goan Konkani 1 Ped 1 Bible Online

1 Ped 1 - Goan Konkani bible

1 Ped 1

¹Hanv Pedru, Jezu Kristacho apostl, Pontusachea, Galaxiechea, Kapado-xiechea, Aziechea ani Bitiniechea prantamnim ximpoddleleam bhavam-bhoinnink noman kortam. Tumi tumchea khaxa desa thaun pois asleli, Devan vinchleli, vattsur porza.

²Aplê sasnnik ievzonnen Deva, amchea Bapan, tumkam Aplim zaunk vinchun kaddleant; Aplo Atmo tumkam diun Tannem tumkam povitr keleant; Jezu Kristak khaltim zaun, Tannem vikrailelea rogtan tumchim patkam dhuun gelim. Devachi doiallai ani xanti chodd ani chodd tumi bhogunk pavum mhonn hanv magtam.

³Devak, amchea Somia Jezu Krista-chea Bapak, sodanch vakhannum-ia! To amcho chôdd-chôdd môg korta dekhun, Jezu Kristak mel’leantlo punorjivont korun Tannem amkam novo zolm dila. Oxem amkam atam kedinch sorona toslo bhorvanso asa:

⁴mhonngê Devan Apleam bhurgeank bhasaun dovorlelem jivitachem daiz gheunk ami ravtanv. Hem daiz Tannem tumkam sorgar samballun dovorlam: tem kedinch padd zaunchem na, tem sodankal sundor-sobit urtelem, tachem mol kednanch ubun vechem na.

⁵Tumi bhavartan Jezuk mandun ghetat dekhun, Dev tumkam Aplê podven rakhun dovorta. Oxem tumkam toiar kel’li soddvonn bhogunk tumi axeun ravtat. Kallachea xevottak To ti tumkam ugddapi kortolo.

⁶Mhonntôch atam matso vogôt jin’sam-jin’sanche upodre tumi bhôgche poddlear pasun khuxal ravat.

⁷kiteak tanchê vorvim tumchea bhavartachem mol gomun ieta. Sodam togonam tem bhangar porian ujeant ghalun topastat; toxench hal-upodreamnim tumchea bhavartachi topasnni zata. Ani jedna Jezu Krist dixtti poddtolo, tedna tumkam vakhann’nni, mhoima ani bhovman melltolo.

⁸Tumi Taka polleunk na, tori tumi Tacho môg kortat; tumi ozun Taka pollenant zalearui, Tacher tumi bhavart dovortat. Hea pasot tumi itlê ut’tôm’ khuxalkaien bhòrleat ki ti vornnunk utranch mellchim nant.

⁹Ani hea tumchea bhavartachem sompurnn foll, mhonngê tumchem purnn taronn, tumkam melltelem mhonn tumkam khatri asa.

¹⁰Heach taronnak provadi ravtale ani zotnaien te tachi sod korit asle; ani Dev tumkam diuncho aslo tea dennea vorvim tãnnim adim-fuddench bhakitam kelim.

¹¹Kristacho Atmo provadeam sovem aslo ani Kristan koxtt sõsche asle ani uprant Taka mhoima mellchi asli mhonn teach Atmean tankam adinch sanglelem. Hem sogllem kedna ani koxem ghòddto aslem tem te provadi sodun kaddunk vavurle.

¹²Te porgôtt’tale to sondex apleach faideak nhoi, punn tumchea faideak mhonn Devan provadeank kollit kelem. Ani jem kitem tãnnim sangun dovorlem, tench atam xubhvhortoman porgôttlam team mon’xamnim tumkam ugtem kelem. Hem xubhvhortoman porgôtt’tana Devan sorgar thaun dhaddlolo Povitr Atmo tanchim monam uzvaddaitalo. Devdut legun heam vostunchi ollokh axen gheunk sôdtat.

¹³Hea pasot, tumchim monam sarkim mekllim korun aitim ravat, ani Jezu Krist dixtti poddtolo tedna jem soddvonnechem dennem tumkam melltelem, tacher purnn visvas tthevat.

¹⁴Devachim khaltim-pallok bhurgim zaiat, ani tumi sot ollkhonasleat tedna tumi tumcheam moriadi bhaileam vondovnneam pormannem choltaleat toxem atam korinakat.

¹⁵Portench, sogllê tumchê chalint povitrponnim jieiat, kiteak Zannem tumkam apoileant To povitr;

¹⁶oxench Povitr Pustok sangta: “Hanv povitr dekhun tumi-i povitr zaiat.”

¹⁷Omko-tomko mhonn pollenastana zonn-ekleacheam kornneam pormannem zonn-ekleachi nit korta Taka tumi “Bapa” mhonnun ulo martat; tea khatir hea pordesant jietana Tachi khori bhokti korun cholat.

¹⁸Tumi tumcheam purvozam koddchi polkea jivitachi chal ghetleli; tê chalintlim Devan tumkam soddoileant, nhoi koslêch vinaxi vostu vorvim, nhoi mhonn rupea vô bhangara vorvim, punn nixkollonk ani khotavinn Menddreachea, mhonngê Kristachea, omolik rogta vorvim: hacho ugddas dhôrat.

²⁰Sonvsar rochchê adim Devan Kristak nemun dovorlolo, punn hea nimannea kallar tumchê khatir Taka porgôtt kelo.

²¹Tachê udexim tumi atam Devacher bhavart dovorla: khorem mhonn’lear, Devan Taka mornnantlo punorjivont korun mhoimek ubarlo dekhun, tumi Devacher bhavart ani bhorvanso dovrunk pavleant.

²²Sotak khaltim zaun tumi xud’dh zaleant ani atam tumchean khorea monan bhavbhoinn koxim ekamekacho môg korunk zata. Tôr sogllea kallzan ekamekacho môg korat;

²³kiteak tumkam Devan novo zolm dila: Toch tumcho Bap. To vinaxi nhoi punn ovinaxi. Tannem tumkam Aplea sobda vorvim jivit dilam: ho sôbd jivo ani sasnnak jivo.

²⁴Karonn Povitr Pustok oxem mhonnta: “Ak’khem mon’xakull mhonn’lear tonn ani tachi sobitai xetantlea fula itli: tonn sukta, ful bavta,

²⁵punn Devacho sôbd sodam-sorvodam togta.” Teach Sobdachem xubhvhor-toman tumkam porgôttlam.