Read Goan Konkani 1 Ped 3 Bible Online

1 Ped 3 - Goan Konkani bible

1 Ped 3

¹Têch bhaxen, tumi, bailamnô, tumcheam ghovank khalteô zaiat. Oxem tanchê modle konn-ui ozun Sôbd mandun gheunk naslele asat zalear, utram vinnem apleam potinninchê chalinuch te jikon ietele, kiteak apleô potinni mannsugen ani nirmollponnan jietat mhonn te polletele.

³Venttlele kens, bhangarache olonkar, nazuk nhesônn, osleam bhaileam vostunchi tumchi xringarnni zaum noiê.

⁴Tumchi xringarnni zaum-di bhitorli, kallzachi, bigoddna tosli: êk xant ani dulôb sobhav, hi asa Deva mukhar chodd mol asleli xringarnni.

⁵Hêch bhaxen, adlea kallar, Devacher visvas tthevun jietaleô teô bhoktivont ostoreô apleam potink khalteô ravun apli xringarnni kortaleô.

⁶Oxi Sara asli; Abrahamak aplo dhoni mhonn ulo marun, ti taka khalti ravo. Boreô kornneo korun jiexeat zalear, tumi ticheô dhuvô; ani tumche poti amchea bhavartache nhoi zaun tumkam koslem vaitt kortit mhonn koslich bhirant vô husko dhorinakat.

⁷Têch porim, potimnô, tumcheam potinnim vangdda ekamekak somzun jieiat; favo to man tankam diat; bail odik osokt zait, tori poti borabôr ti ekach sasnnik jivitachi daijinn. Oxem korxeat zalear, tumcheam prarthnamnim tumkam koslich addkhôll aschi na.

⁸Xekim, tumi sogllim tumchê modem eka monachim zaiat, dusreanchem sukh-dukh tumchem korat, tumcheam bhavam-bhoinnincho môg korat, peleak konnvallaien vagoiat, khaltea kallzachim zaiat.

⁹Vaitt kodinch vaittan farik korinakat, vô beman bemanan; ufrattim, tankam borem magat. Oxench korunk Devan tumkam apoileant ani hê porim axirvadachem daiz tumchem zatelem.

¹⁰Povitr Pustok oxem mhonnta: “Tujea jivacho tum môg kortai mum? Lamb auk, sukh-sontôs tum axetai mum? Khotteponn pois kôr, tuji jib damun dhôr; fottkirem utor tujea tonddantlem kodinch bhair soro noie;

¹¹sogllem vaitt tem sôdd, borem tem kôr; xanti sodun ticheam panvlamnim chol.

¹²Sorvespor khotteam mon’xank patt korta, Sorvesporache dolle boream mon’xancher asat, tanchea magnneachi bob Tachea kanar pavta.”

¹³Borem korpacher tumchem mon asot zalear, konnachean tumkam vaitt korunk zait?

¹⁴Tori Devak man’ta tê bhaxen jieunchê khatir tumkam kitem-i bhògchem poddlem zalear-ui, tumi khorench subhagi! Mon’xank bhienakat; tanchê pasot akantum nakat.

¹⁵Ufrattim, Krist tumcho Somi mhonn tumcheam kallzamnim Tachi bhokti korat. Ani “Kristacher kiteak mhonn tumi visvas-bhorvanso dovortat?”, oxem tumchê lagim konnem-i vicharlem zalear, osleank zobab diunk sodanch toiar ravat.

¹⁶Punn tumcho zobab dulobaien ani mannsugen diat, ani oxem tumchem ontoskornn guneanva-mekllem astelem. Hê bhaxen, Kristachea ekvottant tumi jietat tea borea jivita pasot jim konn tumcheô chaddiô sangtat, tim lojek sampoddtelim.

¹⁷Ani zôr hi Devachi khuxi, tôr vaitt korun sõschê poros, borem korun koxtt-dogd bhôglear odik borem.

¹⁸Kiteak mhonn’lear, amchim patkam sarkinch nattak korun amkam Deva sorxim pavounchê khatir, khud’ Kristan êkê pavttin moronn sõslem: niropradi zaun, opradeam pasot To melo. To amchea vinaxi mon’xa-soimbacho aslo dekhun, Tacho jiv kaddunk pavle; punn Devan Taka punorjivont kelo tedna, To Atmean bhòrlolo ovinaxi zalo.

¹⁹Ani oso To bondkhonnint asleleam mon’xank soddvonnechi khobor porgottunk gelo.

²⁰Magam, Noa tarum bandtalo tea kallar, Dev ozun sosnnikai dhorun aslo tedna, him mon’xam Devak khaltim zaunk raji na zalim; fokot êk dhaktto atth zannancho zomo udka vorvim vattovlo.

²¹Tem udok atam tumkam taronn ditelea batismachi khunna: ho batism kuddi-bhailo mhêll dhuvun kaddina, punn hea batismant Jezu Kristachea punorjivontponna vorvim amchem ontoskornn nitoll zata, ani ami oslea borea ontoskornnan Jezucho pattlav korunk Devak bhas ditanv.

²²Ho Jezu sorgar bhitôr sorla, ani devdutank, odhikareank ani podveank Apnna khal dovrun Devachea uzveak boslolo asa.