Read Goan Konkani 1 Ped 4 Bible Online

1 Ped 4 - Goan Konkani bible

1 Ped 4

¹Kristan Aplea mon’xasoimbant kosle koxtt-dogd bhôgle hacho ugddas dhôrat, ani oxem korun ghottai gheiat: kiteak jim konn aplea mon’xasoimbant koxtt-dogd sõstat, tim patki-chal ani-anink dhorunk sodinant.

²tim kuddicheam vondovnneam pormannem ani-anink cholonant, punn atam thaun Devachi khuxi korun apnnank hea sonvsarant urleat te dis tim kaddtat.

³Tumi adim onbhavarteanchê chali pormannem jieleant tim puro: tedna tumchem jivit kamchari aslem, tumcheam vaitt vondovnneam porma-nnem tumi choltaleat, bebdikaiek lobhdol’lim asleat, dumxannamnim dis kaddtaleat, ani vitt haddpachi puttleam-murtinchi bhozônn korun bhonvtaleat.

⁴Hea pasot, nisonttonnak pavoita tea lottant, apnnam borabôr tumi kiteak, oddon vochonant tem tankam somzona, ani tea pasot tumcher jasteo marunk lagtat.

⁵Punn Zo jiveanchi ani mel’leanchi mon’subi korunk toiar asa, tea Mon’subidara mukhar tankam hacho hixôb diuncho poddtolo.

⁶Ani heach pasot mel’leank-ui Soddvonnechi khobor porgôtt keli; hê bhaxen, hea sonvsarant soglleam mon’xam porim tankam mornnachem formonn poddlem zalear-ui, tancheam otmeank tori Devachem jivit mellum-iet aslem.

⁷Soglleam vostuncho xevôtt lagim pavla. Hea pasot, favo tê porim prarthon korchê khatir, xant ravat ani zagrutaien cholat.

⁸Bhov-korun, ekamekak vhodda pritimogan vagoiat, kiteak pritimôg khub-khub patkam kaddun uddoita.

⁹Borê khuxen ekamekak biradd diat.

¹⁰Zonn-ekleak Devan êk kherit dennem dil’lem asa; tôr bore karbhari koxe heam veg-veglleam denneancho upêg korun ekamekachi chakri korat.

¹¹Tujem dennem sondêx divpacho? To Devacho sondêx mhonn ollkhun tuzo sondêx di. Tujem dennem seva korpachi? Dev dita tê ghottaien seva kôr. Hê bhaxen soglleam vostumnim Jezu Krista vorvim Devak vakhann’nni mellteli. Takach mhoima ani podvi sasnnachea sasnnak! Amen!

¹²Bhov priticheam bhavam-bhoinnimnô, tumkam ujeant uddoilelê porim tumchi koddok topasnni zata mhonn ojap zaum nakat: hantum kãi vichitr na.

¹³Punn jitlo tumkam Kristacheam koxttamnim vantto mellta, titlim tumi sontosbhorit zaiat; oxem, jedna To mhoimen dixtti poddtolo, tedna tumi-i sontosan murgott’telet.

¹⁴Kristachea nanva khatir tumkam beman bhògcho poddlo zalear, tumi subhagi, kiteak mhoimecho Atmo To, Devacho Atmo, tumcher vosti korun asa.

¹⁵Prannghatki vô chôr vô ghusottnno vô dusrem koslem-i khotteponn korpi mhonnun tumchê modlea konnakuch khast poddchi nhoi;

¹⁶punn Kristachim mhonnun konnank khast bhôgchi poddli zalear, tankam koslich loz na, portench zalear Kristachea nanva khatir Devak argam diat.

¹⁷Kiteak mon’subecho vêll pavlo ani Devachea ghorabea thaun ti suru zateli; ani amchê thaim suru zata zalear, Devachem xubhvhortoman manun ghenant tankam kitem ghòddchem na?

¹⁸Povitr Pustok oxem sangta: “Promannik mon’xak porian soddvônn mellunk avghodd zalear, odhormi ani patki mon’xachem kitem mhonn zaunchem na!”

¹⁹Mhonntôch, jim konn Devachê khuxê pormannem sõstat, tãnnim borem tem korit ravchem ani aplo jiv aplea Rochnnarachea hatant sôddcho, kiteak To Apleô bhasavnneô visvaxiponnan palltoloch.