Read Goan Konkani 1 Ped 5 Bible Online

1 Ped 5 - Goan Konkani bible

1 Ped 5

¹Atam tumchê modem asleleam vhoddilank ulo kortam. Hanv-ui vhoddil ani Kristacheam koxttancho sakxi; prokaschi asa tê mhoiment mhaka-i vantto melltolo. Tôr tumkam oso ulo kortam:

²Tumchê adhin kel’lea Devachea hinddachi gonvlleam vori rakhônn korat: tachi kallji gheiat, kaido pallunk konn tumkam boll korta mhonn nhoi, punn ap-khuxen, Devak zai tea pormannem; mhellê zoddichê axen nhoi, punn kallzachê hurben.

³Tumchê adhin asleleancher zobordosten odhikar choloinakat, punn tumchea hinddache nomunne zaiat.

⁴Ani Porom’ Gonvlli dixtti poddtolo tedna, bigoddna toslê mhoimecho mukutt tumkam melltolo.

⁵Têch bhaxen tumkam, tornna-tteamnô, ulo kortam: zannteank khaltim zaiat. Sodanch ekameka thãi nomrutaien vagat, kiteak Povitr Pustok oxem sangta: “Dev gorvixttank virôdh korta ani vinomr-khalteam kallzancheank Aplem bholeponn dakhoita.”

⁶Hea pasot, Devachea bollixtt hata khal vinomr-khaltim zaiat ani To tumkam Aplea xubh vellar voir kaddtolo.

⁷Povitr Pustok oxem sangta: “Soglleam tumcheam huskeancho bhar Tacher ghalat, kiteak Taka tumchi kallji asa.”

⁸Chotur ravat, zagrut ravat. Devchar, tumcho dusman, gôroz ghaltelea xinva sarko, apnnak konn-ui girasunk sampddot gai mhonn polleun tumchê bhonvtonnim firot asa.

⁹Devacher thir bhavart dovrun, taka virôdh korat. Sonvsarant ximpo-ddleleam tumcheam bhavam-bhoinnink toxench bhògchem poddta mhonn ugddas dhôrat.

¹⁰Dev tumcho chôdd môg korta; Tannench tumkam Krista sovem sasnnachê mhoimek apoileant; tôr matso vogôt tumi koxtt-dogd sõslea uprant, Toch tumkam novean somadhan kortolo, tumkam thir ani ghott korun samballtolo.

¹¹Taka ki adhikar-podvi sasnnachea sasnnak! Amen.

¹²Silvan amcho visvaxi bhav mhonn dhôrtam; tachea adaran hem lhan potr tumkam boroilam. Tumkam dhir diunk ani hench Devachem khorem dennem mhonn govai diunk mhoji khuxi: tem ghott dhorun ravat.

¹³Tumchê bhaxen Devan vinchun kaddleli Babilonient asa ti povitr-sobha tumkam noman korta. Tosoch Marku mhozo put.

¹⁴Ekamekak pritimogachi khunna diat. Kristachea ekvottant asleleam tumam-somestank xanti!