Read Goan Konkani 2 Ped 2 Bible Online

2 Ped 2 - Goan Konkani bible

2 Ped 2

¹Israel-porjê modem kotte provadi ieun gele, toxench tumchê-i modem khotte guru ietele. Te tumchê modem tumchi vatt laitat tosle sota-add xikovnn bhitôr kaddtele, ani apnnank suttka dito Dhoniak patt vollun, apnnachoch rokddo nas korun uddoitele.

²Amchê modlim zaitim zannam tanchi pozddi chal dhôrtelim, ani tankam lagun dusro lôk Sotachê Vattechi ninda korunk pavtolo.

³Tankam duddvanchi vhôdd axa, ani tumkam khotteô xikovnnô diun te tumcheam poixeamnim apnnank faido kaddtele. Punn magam thaun Mon’subidaran tancher formonn marlelem asa, ani tancho nas kortolo To zagoch asa.

⁴Devdutamnim patok kelem tedna Devan tankam bhogsunk nant, punn Zhôddtechea Disa tanchi mon’subi korunk, Tannem tankam norkant xevttile ani kallokachea konddant sôddle;

⁵Devan adlea kallachea lokak-ui bhogsunk na; punn noxtteanchê prithumecher poriallo dhaddlo tedna, fokot Devak man’ta toslea jivitachea porgôttnnara, Noank, ani tachê borabôr anink sat zannank Tannem vattailim.

⁶Fuddaracheam noxtteam mon’xank dêkh xikounchê khatir, Devan Sodom’ ani Gomorra nograncher khastichem formonn marlem ani tancho bhosm kelo;

⁷ani heam noxtteam mon’xanchem pozddem jivit Lotak kanttallo haddtalem mhonnun, Devan hea Apnnak manovlelea mon’xak nivarlo.

⁸Karonn ho sugunni monis tanchê modem jieun, dispottim tanchim noxttim kortubam polleun ani aikun, apnnachêch bhitôr tollmolltalo.

⁹Mhonntôch bhoktivont mon’xank porikxentlim nivarunk Sorvesporak tank asa, ani noxtteank Zhôddtechea Disa khast lavpa khatir dovrunk Taka podvi asa,

¹⁰bhov korun pozddê axen kuddicheam vondovnneank lobhdotat ani Tachea odhikarachi beporva kortat tankam. Ami sangtaleanv te khotte guru, tovnnas ani gorvixtt monis zaun, mhoimevont devdutanchi ninda korunk pattim soronant.

¹¹Punn devdut, odik bollixtt ani podvedar zaun-ui, tancher add Sorvespora mukhar koslench garannem vô firiad korinant.

¹²Ginean-nasleleam mon’zatink lôk dhôrta ani marta, osleam mon’zatim sarke he guru; apnnank ollokh na tachi ninda kortat, punn jem apunn nisonttonn haddunk sôdtat, tea nisonttonnak apunnuch sampoddtele.

¹³Dusreank koxtt dileat dekhun, tankam Dev koxtt diun farik kortolo. Disacho porian kamchar tanchem sukh: khorench mhelle monis te, tanchi chal sarki lojechi. Tumchê borabôr jevnnak bostat tedna porian tumkam fottoun khuxi zatat.

¹⁴Tancheam dolleamnim fokot pordvar ani tanchi patkachi axa kodinch dhadoxi zainam tosli. Othir-osokt mon’xank te fas manddtat. Apli axa bhagounk te ekdom’ huxar. Devacho xirap poddlele monis te!

¹⁵Nitt marôg soddun vatt chukun gele; Bosorachea puta, Balaamachi, tãnnim vatt dhôrli. Apnnak bori mozuri mellteli mhonn axa dhorun patok korunk to toiar aslo;

¹⁶punn tachea gaddvanuch tachi axa vaitt mhonn rokddench taka dakhoun dilem: oxi vacha-naslelea gaddvan mon’xa bhaxen uloun provadeachi pisai addaili.

¹⁷Osle monis sukleleam zhorim sarke, vadollan lottun vhel’leam kupam sarke. Tankam Devan dovorlolo zago mhonn’lear norkantlo kallôk.

¹⁸Kudde-ponnachea kallokant jieteleam modlim halinch sutton ail’leam amcheam bhavam-bhoinnink he monis ghonn-ghonnit punn polkim bhaxonnam kortat ani aplê pozddê chali vorvim tancheô kuddicheô vondovnneô challoitat.

¹⁹Tankam apunn svotontrtai ditat mhonn bhasaitat, punn khorem mhonn’lear te apunnuch kusddepo-nnache gulam’: karonn jim konn kiteak-ui apnnancher odhikar cholounk ditat, tim tachim gulam zatat.

²⁰Amchea Somia ani Soddvonnara Jezu Kristak ollkhun gheun, mon’xam sonvsarantlea mhelle-ponnantlim mekllim zatat; punn uprant konn-ui teach mhelleponnant portun lollonk vetat zalear ani tea mhelle-ponnachim novean gulam zatat zalear, tanchi gôt adlê goti poros paxtt zali.

²¹Devak man’ta toslea jivitachi vatt ollkholea uprant apnnank dil’li povitr adnea soddun diunchê poros, ti vatt tãnnim ollkhunkuch nasli zalear odik borem zatem.

²²Êk khori mhonn’nni asa: “Sunnem apnnench onklelem tachê sorxim portun gelem”; ani anink êk mhonn’nni oxi: “Dukornnik nhavoilea uprant ti novean chiklant lollta.” Hem tankam ghòddlem.