Read Goan Konkani 2 Ped 3 Bible Online

2 Ped 3 - Goan Konkani bible

2 Ped 3

¹Bhov priticheam bhavam- bhoinnimnô, hem mhojem dusrem potr tumkam; donant-ui amchea bhavartacho ugddas haddun, tacho khoro somôz tumchê bhitôr zagounk hanvem sôdlam.

²Jem provadeamnim adinch sangun dovorlelem, tacho ugddas korat; toxench tumcheam apostlamnim tumkam dil’lê amchea Somia ani Soddvonnarachê adneacho-i ugddas korat.

³Poilê svater, nimanneam disamnim amchea bhavartacheô moskoreo korpi zaitim zannam ietelim mhonn visronakat. Tim apleam vaitt vondovnneam pormannem choltelim

⁴ani mhonntelim: “Apunn ietolo mhonn tannem bhas dil’li ti khõi pavli atam? Amche purvoz morun gele tedna thaun sogllem toxench cholta, ani rochnnechea orombak thaun-ui toxench.”

⁵Punn orombak mollob aslem ani Devachea utrak prithum’ udkantli ani udka modem upzoli mhonn tim mud’dom’ visortat.

⁶Ani hea udkachêch buddten tea kallachea sonvsaracho nas zalo.

⁷Punn teach Devachea utran atanchem mollob ani atanchi prithum’ ujean lasun uddounk dovorleant; tea disa onbhavarteanchi zhôddti zaun tancho bhosm zatolo.

⁸Priticheam bhavam-bhoinnimnô, hi êk vôst tumi kodinch visrunk favo na: ki Sorvespora mukhar êk dis hozar vorsam sarko ani hozar vorsam eka disa sarkim.

⁹Kãi zonnam To kallav korta mhonn sangtit, punn Sorvespor Apnnem bhasailam tem pallunk kallav korina. Khorem mhonn’lear, To tumkam sosnnikaien vagoita, kiteak konnachench nisonttonn zal’lem Taka naka, soglleamnim aplem jivit bodôl’lelem Taka zai.

¹⁰Sorvesporacho Dis êk chôr koso ietolo; tea disa mollob goddgoddan nanch zatelem, srixttiche dhatu koddhon vetele, prithumecho ani tantum aslelea sogttacho bhosm zatolo.

¹¹Jea disa mollob agttem zaun nanch zatelem ani srixttiche dhatu lasun koddtele, to Devacho Dis vegim pavum mhonn axeun ravat. Ani sogllem hê bhaxen somptelem mhonntôch, tumchem jivit patkavinn ani Devak manovto zaunk zai.

¹³Ami novea mollbachi ani novê prithumechi vatt polletanv, kiteak oxi Devan amkam bhas dilea: thõi sogllem Devak man’ta toxem zatelem.

¹⁴Dekhun tea mhonnosôr, bhov priticheam bhavam-bhoinnimnô, tumi Taka xantin mellchê khatir, tankta titlê umedin nixkollonkponnan ani guneanva vinnem jieunk vavrat.

¹⁵Sorvespor bhov sosnnikaiecho; hem tachem mhatmeponn tumchê soddvonne khatir mhonn somzat. Toxench apnnak Devan dil’lê zannvaien, amchea bhov mogachea bhava, Paulun, tumkam boroilam.

¹⁶Soglleam apleam potramnim to heam vostunchi gozal korta. Tantum somzunk avghodd kãi vixoi melltat: bhavartant xikovnn ani thirai naslolo lôk tancho, ani heram-i Povitr Pustokancho, sarko ôrth bigddaun uddoitat ani oxem aplench nisontton magun ghetat.

¹⁷Hea pasot, tumi, bhov mogacheam ixttamno, tumkam hanvem xiddkaileant mhonntôch, chotrai dhôrat: na zalear, noxtteam mon’xanchi vankddi vatt dhorun, tumi-i tumchem thirponn sanddun vexeat.

¹⁸Ufrattim Jezu Kristachi, amchea Somia ani Soddvonnarachi, doiallai bhôgat ani Tacho odik-odik onnbhôv korun gheiat. Taka mhoima atam ani sasnnachea sasnnak! Amen!