Read Goan Konkani 1 Ju 2 Bible Online

1 Ju 2 - Goan Konkani bible

1 Ju 2

¹Mhojeam supurleam bhurgeamnô, tumi patok korchem nhoi mhonn hanv hem tumkam boroitam. Punn konn-ui patkant poddlim zalear, Bapa mukhar amkam sogllêch vatten Devak man’ta toslo eklo Xerati asa: to Jezu Krist.

²Toch amchim patkam nattak korta ti Boli: amchinch nhoi, punn akhea sonvsarachim.

³Zôr tôr ami Tacheô adnea palltanv, ami Taka ollkhola mhonn hê khunnê vorvim gomun ieta.

⁴“Mhaka Tachi ollokh asa”, jim konn oxem mhonntat punn Tacheô adnea pallinant, tim mon’xam fottkirim: osleam mon’xam sovem sot na.

⁵Punn Tachea utrak pallo ditat tim Dev amcho kitlo môg korta to sopurnnaien ollkhunk pavleant. Hachêch vorvim ami Tachê sovem asanv mhonn amkam kollon ieta.

⁶Jim konn Deva sovem apunn asat mhonn sangtat, tãnnim Jezu chol’lo toxench cholchem.

⁷Mhojeam mogacheam bhurgeamnô, hanv tumkam novi adnea boroun dhaddinam, punn êk adli adnea, survatek thaun tumi ghetlea tich. Hi adli adnea mhonn’lear tumi poilim thaun ghetlo toch sondêx.

⁸Tori astana, hanv tumkam novean boroun dhaddtam ti khorench novi adnea: karonn kallôk na zata ani khoro Uzvadd porzollunk laglo.

⁹Jim konn apunn Uzvaddant asat mhonntat punn aplea bhavak vô bhoinnik zolltat, tim ozun kallokant asat.

¹⁰Punn jim konn apleam bhavam-bhoinnincho môg kortat, tim Uzvaddant jietat: tankam adllon poddo-xim korunk kãich na.

¹¹Aplea bhavacho vô bhoinnicho dvês kortat tim kallokant asat ani kallokant choltat; oslim mon’xam apunn khõi vetat tem tinch nokllot, kiteak kallokan tanche dolle kurdd’de keleat.

¹²Mhojeam supurleam bhurgeamnô, Tachê nanvim tumchim patkam bhògsoleant dekhun tumkam boroitam.

¹³Avoibapaiamnô, orombak thaun asa Taka tumi ollkhunk pavleant. Tornnatteamnô, tumi Noxtteacher zoit vhelam dekhun tumkam boroitam.

¹⁴Supurleam bhurgeamnô, tumi Bapak ollkhola dekhun tumkam boroitam. Avoibapaiamnô, orombak thaun asa Taka tumi ollkhola dekhun tumkam boroitam. Tornnatteamnô, tumi bollixtt zaleant, Devachem utor tumchê bhitôr riglam ani tumi Noxtteacher zoit vhelam dekhun tumkam boroitam.

¹⁵Sonvsaracho ani sonvsarantleam vostuncho môg korinakat. Sonvsaracho môg kortat team mon’xam sovem Bapacho môg na:

¹⁶kiteak sonvsarant mellta tem itlench: kuddichi moriadi-bhaili vondovnni, dolleanchi lobhi axa ani jivita-boddai. Hem sogllem Bapa-sun nhoi punn sonvsarantlem upzota.

¹⁷Tôr sonvsar ani tacheô vondovnneô don disam bhitôr nanch zatat. Punn jim konn Devachi khuxi palltat, tim sasnnak jietat.

¹⁸Mhojeam supurleam bhurgeamnô, xevottacho kall ho. Eklo Krist-Virodhi ieuncho asa mhonn tumi aikolam. Atanch legun zaite Kristache-virodhi dixtti poddleat: hantum amkam ho xevottacho kall mhonn gomun ieta.

¹⁹Te amchê modle bhair sorleat, punn khorench mhonn’lear amche niz vangddi te nhoi asle; kiteak amche niz vangddi zal’le zalear, amchea sangata te ravto asle; punn sogllech zann amche niz vangddi nhoi mhonn dakhounchê khatir, hem oxem ghoddonk zai aslem.

²⁰Tumkam zalear Kristacho Povitr Atmo diun Devan makhleant ani oxem tumkam soglleank sotachi ollokh mell’lea.

²¹Mhonntôch sotachi ollokh tumkam na zal’lê porim tumkam hanvem borounk na, punn portench tumi sot ollkhotat ani sotantli koslich fôtt upzona dekhun, oxem tumkam boroitam.

²²Fottkirim konn? Jezu, To Krist mhonn mandun ghenant tim. Hinch tim Krist-Virodhi! Bapak toso Putak-ui tim mandun ghenant.

²³Jim konn Putak nakartat, tankam Bap-ui na. Punn jim konn Putak ollkhun ghetat, tankam Bap-ui asa.

²⁴Tumi zalear, zo sondêx orombak thaun aikola, to tumcheam kallzamnim sodam samballat. Survatek thaun aikol’lo sondêx tumchê sovem toglo zalear, tumi-i Puta sovem ani toxench Bapa sovem rigun astelet.

²⁵Tannench tumkam hi bhasavnni kelea: Sasnnik Jivitachi bhasavnni !

²⁶Tumkam fosounk bhonvtat tanchê vixim, itlem tumkam boroilam.

²⁷Deva-koddcho tumi Povitr Atmo ghetla; To tumchê sovem asa mhonntôch dusrea konnachêch xikovnnechi tumkam goroz na. Punn Tacho Atmo tumkam soglli xikovnn dita, ani hi Tachi xikovnn khori, fottkiri nhoi; mhonnun hê Tachê xikovnnê pormannem cholat ani Jezu sovem rigun ravat.

²⁸Hea pasot atam, supurleam bhurgeamnô, Tachê sovem rigun ravat. Hê porim, To dixtti poddtolo tea Tachea ienneachea Disa, vhodda visvasan ami Taka ghetelenv, ani lojen Tachê thaun pois vechim nanv.

²⁹Dev sogllêch vatten boro mhonn tumi zannont; tôr hem-i zanno zaiat: jim konn Devak man’ta toxem jietat, tim sogllim Tachê thaun zolmoleant.