Read Goan Konkani 1 Ju 3 Bible Online

1 Ju 3 - Goan Konkani bible

1 Ju 3

¹Polleiat, Bapan amcho kedo vhod môg korun dakhoilo to, Khud’ Bap amkam Aplim bhurgim mhonnta, ani khorench ami Tachim bhurgim! Taka ollkhunk na dekhun sonvsar amkam-i ollkhona.

²Mhojeam mogacheam bhurgeamnô, atanch thaun ami Devachim bhurgim, punn fuddarak ami kitem zatelenv tem ozun porian ugddapem zaunk na. Punn jea disa tem ugddapem zatelem, tea disa ami Tachê-sarkim zatelenv mhonn amkam khatri asa, kiteak zoso To asa, tosoch ami Taka polletelenv.

³Zoso Jezu nibêl xud’dh, toxem Tacher ho bhorvanso dovrun asat tim sogllim apunn-ui nixkollonk zaunk vavurtat.

⁴Jim konn patok kortat, tim Somurtik patt kortat, kiteak patok mhonn’lear Somurtik patt-korop.

⁵Tôr amchim patkam kaddun uddounk To ailo ani Taka koslench patok na mhonn tumi zannont.

⁶Tachê sovem rigun ravtat tim patok korinant, punn patok kortat tãnnim Taka polleunk na ani ollkhunk-ui na.

⁷Priticheam bhur-geamnô, konnakuch tumkam fosounk dinakat: zoso Krist Devak manovlo, toxench Devachê khuxê pormannem jietat tim Devak manovtat.

⁸Jim konn patok kortat, tim devcharachim, karonn devchar orombak thaun patki. Devcharacheam kortubancho bhosm korchê khatiruch Devacho Put ailo.

⁹Jim konn Deva thaun zolmoleant, tim patok korit rauchinant, kiteak Devachi jinn tanchê sovem asa. Deva thaun zolmoleant dekhun tanchean patok korum nozo.

¹⁰Devachim bhurgim ani devcharachim bhurgim hacheruch ollkhum-ietat: jim konn Devachê khuxê pormannem jienant vô apleam bhavam-bhoinnincho môg korinant, tim Devachim nhoi.

¹¹Ekamekacho ami môg korcho: hoch sondêx tumi survatek thaun aikola.

¹²Kain-a sarkim ami zaum noiê: to Noxtteacho put aslo dekhun, aplea bhavacho tannem jiv kaddlo. Kitea pasot tacho jiv kaddlo zait? Kiteak tachim kortubam baskoll aslim, punn tachea bhavacheô kortubam Devak man’tat toslim aslim.

¹³Bhavam-bhoinnimnô, sonvsar tumcho dvês korta zalear, tumi ojap zaum nakat.

¹⁴Mornnantlim bhair sorun ami Jivitak pavleanv mhonn ami zannonv, karonn amcheam bhavam-bhoinnincho ami môg kortanv.

¹⁵Môg korinant tim mornnantuch asat. Aplea bhavacho vô bhoinnicho dvês kortat tim mon’xam prannghatki; khõicheach prannghatkea sovem Sasnnik Jivit kednanch asona mhonn tumi zannont.

¹⁶Tannem amchê pasot Aplo jiv dilo: hachê velean môg kitem tem ami ollkhunk pavleanv. Toxench ami-i amcheam bhavam-bhoinnim pasot amcho jiv diunk zai.

¹⁷Konna-konnak sonvsarachi girestkai asun-ui gorjek sampoddlelea aplea bhavak vô bhoinnik polleun tanchea kallzant doia-maia upzona zalear, koxê bhaxen Devacho môg tanchê sovem asot?

¹⁸Supurleam bhurgeamnô, khoro môg mhonn’lear utramnim ani jibenuch nhoi, punn kornneamnim ami dakhounk zai.

¹⁹Hê ekêch khunnê vorvim ami sota pormannem choltanv mhonn amkam gomum ietelem ani amchim kallzam Tachê mukhar ami xant kortelenv.

²⁰Devak sogllem tthavem, ani amchem ontoskornn amkam koslo-i guneanv dakhoit zalear porian, amchea ontoskornna poros Devachem kalliz odik doiall-movall.

²¹Priticheam bhurgeamnô, amchem ontoskornn amcho kosloch guneanv dakhoina zait zalear, Deva mukhar amkam purnn visvas asa;

²²ani kitem-i ami Tachê lagim maglem zalear, tem amkam Tachê koddchem melltach, kiteak Tacheô adnea ami palltanv ani Taka mandta tem ami kortanv.

²³Hi tôr Tachi adnea: Tachea Puta Jezu Kristacher ami bhavart dovorcho ani, Tannem amkam adnea dilea tea pormannem, ekamekacho ami môg korcho.

²⁴Ani jim konn Tacheô adnea samballtat, tim Deva sovem jietat ani Dev tanchê sovem jieta. Tannem amkam Aplo Atmo dil’lean To amchê sovem jieta mhonn ami ollkhunk pavtanv.