Read Goan Konkani 1 Ju 4 Bible Online

1 Ju 4 - Goan Konkani bible

1 Ju 4

¹Mhojeam mogacheam bhurgeamnô, Devachea Atmeachem preronn apnnak mell’lam, oxem sangtelea dor-ekleak mandun ghenakat; punn him preronnam kosak lavun, khorench tim Devachea Atmea thaun ietat zalear polleiat, karonn zaite fottkire provadi sonvsarant ailele asat:

²Devachea Atmeachea preronna vorvim êk sondêx ieta zalear, hachê voilean to tumi ollkhunk xoktat: Jezu mon’xasoimbant ail’lo Krist mhonn mandun gheta to sogllo sondêx Deva thaun ieta;

³ani zo sondêx Jezuk oso mandun ghena, to Deva thaun iena: oslo sondêx Krist-virodheacho. Ho Krist-virodhi ieuncho asa mhonn tumi aikol’lem; khorench mhollear, atam legun to sonvsarant ail’lo asa.

⁴Tumi, Supurleam bhurgeamnô, Devachim ani team fottkiream prova-deancher, tumi zoit vhelam. Karonn Zo tumchê sovem asa, To sonvsarant asa tachê poros odik bollixtt.

⁵Te zalear sonvsarantle; dekhun sonvsarachi bhas te uloitat ani sonvsar tanchem aikota.

⁶Punn ami, Devachim, Jezuche sakxidar, ani jim konn Devak ollkhotat, tim amchem aikun ghetat; jim konn Devachim nhoi, tim amkam kan dinant. Hachêch vorvim konnacho sondêx sotacho ani konnacho fottkiro to ami ollkhunk xoktanv.

⁷Mhojeam opurbaiecheam bhur-geamnô, ekamekacho môg korum-ia, kiteak môg mhonn’lear Deva koddchoch ani jim konn môg kortat, tim Deva thaun zolmoleant ani Devak ollkhotat.

⁸Jim konn môg korinant, tankam Devachi ollokh mellunk na, kiteak Dev mhonn’lear Môguch!

⁹Aplea ekleach Puta udexim ami jieunchê khatir, Devan Taka sonvsarant dhaddlo: hantum Dev amcho môg korta mhonn ugddapem zalem.

¹⁰Hanv môg mhonntam to ho: ami Devacho môg kela to nhoi, punn Tannem amcho môg kelo to, amchim patkam nattak korunk, boli koso Apleach Putak dhaddun, Aplo môg dakhoilo to.

¹¹Mhojeam priticheam bhurgeamnô, Devan zôr amcho itlo môg kelo, ami-i ekamekacho môg korunk zai.

¹²Devak konnench kodinch polleunk na. Punn ami ekamekacho môg kelo zalear, Dev amchê sovem jieta ani Tacho môg amchê sovem sompadnnek pavla.

¹³Tannem Aplo Atmo amkam dila: hê khunnê vorvim ami Tachê sovem jietanv ani To amchê sovem jieta mhonn amkam kollon ieta.

¹⁴Bapan Aplea Putak sonvsaracho Tarôk koso dhaddlo mhonn ami amcheam dolleamnim pollelam ani hachi ami govai ditanv.

¹⁵Jim konn Jezu Devacho Put mhonn mandun ghetat, tanchê sovem Dev jieta ani tim Deva sovem jietat.

¹⁶Dev amcho môg korta, ho môg ami ollkhun ghetla ani tacher ami bhavart tthevla. Dev mhollear Môguch! Jim konn mogant jietat, tim Deva sovem jietat ani Dev tanchê sovem jieta.

¹⁷Zhôddtechea Disak purnn visvasan ami ravchê khatir amchê sovem môg sompadnnek pavot asa: karonn hea sonvsarant ami Jezu sarkim zait asanv.

¹⁸Môg asa thõi bhirant na; portench, sopurnn môg bhirant pois korta; kiteak zõi khast asum-iet, thõi bhirant asa; ani zaka bhem dista, tacho môg sompadnnek pavunk na.

¹⁹Tannem poilo amcho môg kelo dekhun, ami-i môg kortanv.

²⁰“Hanv Devacho môg kortam’’, oxem konn mhonntit, punn aplea bhavacho vô bhoinnicho dvês kortit zalear, him mon’xam fottkirim: apunn dekhtat tea bhavacho vô bhoinnicho tim môg korinant zalear, apnnem polleunk na tea Devacho koxim mhonn tim môg kortelim?

²¹Tachê koddchi ami ghetlea ti adnea hi: jim konn Devacho môg kortat, tãnnim apleam bhavam-bhoinnincho-i môg korcho.