Read Goan Konkani 1 Ju 5 Bible Online

1 Ju 5 - Goan Konkani bible

1 Ju 5

¹Jim konn Jezuk Krist mhonn bhavartan mandun ghetat, tim Deva thaun zolmoleant. Ani jim konn Bapacho môg kortat, tim Tacheam bhurgeancho-i môg kortat.

²Ami Devacho môg kortanv ani Tacheô adnea palltanv zalear, dubhava virêt ami Devacheam bhurgeancho-i môg kortanv mhonn amkam kollon ieta.

³Karonn Devacho môg korop mhonngê Tacheô adnea pallop. Ani Tacheô adnea zhodd nhoi,

⁴kiteak zankam Devan zolm dila, tãnnim sonvsaracher zoit vhelam. Sonvsaracher ami zoit vhelam tem hem: amcho bhavart.

⁵Sonvsaracher zoit vhortat tim konn zait? Jezu Devacho Put mhonn bhavart dhôrtat tinch.

⁶Ailo to Jezu Krist; udka ani rogta vorvim To ailo. Udkachêch vorvim nhoi, tôr udka ani rogta vorvim. Ani Povitr Atmo haka govai dita, kiteak Atmo mhonn’lear Sot.

⁷Haka tin govaianchi sakxi asa:

⁸Atmo, udok ani rogot, ani heam tegãichi govaiki êkuch.

⁹Mon’xanchi govaiki ami manun ghetanv; punn Devachi govaiki odik visvas favo asleli. Ani hi govaiki Devan Aplea Puta vixim dil’li asa.

¹⁰Jim konn Devachea Putacher bhavart dovortat, tanchê sovem hi Devachi govaiki asa. Jim konn bhavart tthevinant, tim Devak fottkiro korun sôddtat, kiteak ji govaiki Devan Aplea Puta vixim dilea, ti tãnnim mandun gheunk na.

¹¹Hi asa ti govaiki: Devan amkam Sasnnik Jivit dilam. Ani hem Jivit Tachea Puta sovem asa.

¹²Jeam mon’xam sovem Devacho Put asa, team mon’xank Jivit asa; jeam mon’xam sovem Put na, team mon’xank Jivit-ui na.

¹³Tumchê sovem Sasnnik Jivit asa, kiteak tumi Devachea Putacher bhavart dovorla; hem tumi zanno zaunchê khatir hem sogllem hanvem tumkam boroilam.

¹⁴Kitem-i ami Devachê khuxê pormannem Tachê lagim magum, To amkam aikota: Tacher ho amcho purnn visvas asa.

¹⁵Ani zôr sogllim amchim magnnim To aikota mhonn ami zannonv, tôr jem ami Tachê lagim maglam, tem amkam mell’lem mhonn amkam khatri asa.

¹⁶Jim konn aplo bhav vô bhoinn mornnank pavoina toslem patok korta mhonn polletit, tãnnim tea bhava vô bhoinni khatir prarthon korchem ani oxem tanchê vorvim tea bhavak vô bhoinnik—novean sangtam, mornnak pavoina toslem patok korteleank — Jivit melltelem. Mornnak pavoita toslem patok asa: oslem patok korteleam khatir tumi prarthon korchem mhonn hanv sangina.

¹⁷Koxê-i bhaxen vaitt korop mhonn’lear patok, punn sogllim patkam mornnak pavoita toslim nhoi.

¹⁸Jim konn Devachim bhurgim, tim patok korinant, punn Devacho Put tankam ballgun dovorta, ani Noxtteak tancher hat ghalunk koslich podvi na: hem ami zannonv.

¹⁹Ami Devachim, ani akho sonvsar Noxtteachea tabeant asa: hem-i ami zannonv.

²⁰Anink-ui ami zannonv: Devacho Put ailo ani Khorea Devak ollkhunk Tannem amkam poripurnn somzoni dilea. Hea Deva sovem ani Tachea Puta Jezu Krista sovem ami asanv. Hoch To Khoro Dev ani hench tem Sasnnik Jivit.

²¹Priticheam bhurgeamnô, puttleam-murtim sorxilim tumi pois ravchim.