Read Goan Konkani 3 Ju 1 Bible Online

3 Ju 1 - Goan Konkani bible

3 Ju 1

¹Hanv, Vhoddil, Gaiusak, mhojea bhov mogachea ani khorea ixttak, noman kortam.

²Pritichea ixtta, sogllem tujem borem cholchem mhonn magtam, ani zoxem atmea vatten tum boro asai, toxich tuji kuddichi-i bholaiki bori aschi.

³Sotak tum visvaxi ravtai ani sota pormannem tum choltai mhonn thõicheam kãi bhavam-bhoinnimnim ieun govai dilea; hem aikun mhaka khub anond zalo.

⁴Mhojim bhurgim sota pormannem choltat mhonn aikun, hanv itlo sontoxi zatam, ki mhaka hedo vhôdd sontôs diteli dusri koslich khobor na.

⁵Pritichea ixtta, he bhav bhailea ganvche zaun-ui, tum tanchê pasot ghas ghetai mhonn’lear, hem tujem visvaxiponnachem kortub.

⁶Ak’khê povitr-sobhek te tujea pritimogachi govai ditat. Devak mandta tê bhaxen tankam vattek goroz tem dixi zalear, borem kortoloi.

⁷Te vattek lagle fokot Nanva khatir,[1] ani amchea bhavartachim nhoi team mon’xam koddsun te kãich ghenant.

⁸Osleam mon’xank borê bhaxen gheunk ani sota pasot te vavr kortat tantum tankam sohokar diunk amcho kaido.

⁹Tumchê povitr-sobhek hanvem ek potr boroilam; punn thõi podvi choloun murgott’ta to Diotrefes amcho odhikar manun gheunk toiar na.

¹⁰Hea pasot, hanv iein zalear, to koso cholta tacho soglleank ugddas kortolom, ani amcheô to koxeô chaddiô korta ani amcher koslim boglanttam ghalta, tem-i bhair kaddtolom. Itlench nhoi; punn jim konn amcheam bhavam-bhoinnink gheunk toiar asat, tankam to addaita ani povitr-sobhentlim bhair ghalta!

¹¹Pritichea ixtta, osli vaitt dêkh tum dhorinaka, punn borem tem kôr; jim konn borem kortat, tim Devachim bhurgim; punn jim konn vaitt kortat, tãnnim Devak polleunkuch na.

¹²Demetriusa vixim sogllim borem sangun govai ditat; ani khud’ Sot govai dita. Ami-i tachê vixim govai ditanv, ani amchi govaiki khori mhonn tum zannoi.

¹³Anink-ui zaiteô vostu tuka sangpacheô asleô, punn xaien ani likhnnen sangunk mhaka khuxi na.

¹⁴Khorench mhollear, rokddoch hanv tuka polleunk pavtolom mhonn ravtam, ani tedna tondda-tonddim ami uloitelenv.

¹⁵Xanti tuka! Tuje ixtt ani ixttinni tuka noman kortat; amcheam bhavam-bhoinnink, ek-ekleachem nanv gheun, vicharlam mhonn sang.