Read Goan Konkani Jud 1 Bible Online

Jud 1 - Goan Konkani bible

Jud 1

¹Judas, Jezu Kristacho chakôr ani Jakobacho bhav, Devan apoil’leam somestank hem potr boroita. Deva amchea Bapache opurbaiechim bhurgim tumi ani Jezu Kristachea asrea khal tumi surokxit asat.

²Devachi doiallai tumi odik-odik bhogunk pavum, tumchem jivit sodam xantin-somadhanan cholum ani tumchê modem pritimôg subham’ponnan vaddot vochum: he mhoje otrek. s1 Khotte Guru

³Mhojeam priticheam bhavam-bhoinnimnô, amam-somestanchea taronna vixim hanv tumkam borounk axen otrektalom; punn hea vellar tumkam hanvem borounchi vhôdd goroz asa mhonn mhaka dislem; ani ti mhonn’lear Devacheam soglleam bhoktank sorvkallim dil’lea teach bhavarta pasot tumi dhiran zhuzchem mhonn tumkam ulo marunk.

⁴Tumchê modem kãi zannam guptim ghusleant; magam thaun osleam devdhorm nasleleam mon’xancher khastichem formonn poddlelem asa; amchea Devachi doiallai soddun tim kamcharachi vatt dhôrtat, ani Jezu Krist amcho ekloch Patxai ani Somi mhonn tim mandun ghenant.

⁵Sorvesporan Aplê porjek Ejiptantli soddoili, punn uprant zãnnim bhavart dhorunk na tanchem Tannem nisontton kelem: hem sogllem tumi bêsborim zannont, tori tancho hanv tumkam ugddas kortam.

⁶Devdutancho-i ugddas kortam: tankam vhôdd odhikar dil’lo aslo, punn tãnnim to samballunk na, ani aplem tthikann soddun dilem; Vhoddlea Disachê Zhôddtek Devan tankam kallokachea konddant sasnnak sankllimnim bandun dovorleat.

⁷Têch bhaxen, Sodomacho, Gomorracho ani bhonvtonncheam nograncho lôk pozoddponnant lollon aslo ani soimbacher add xindoll patkam kori, dekhun tankam sasnnachea ujeachi khast poddli: hea lokachi khast amkam soglleank êk xiddkavnni.

⁸Hanv tumkam sangtalom tim devdhorm naslelim mon’xam toxench kortat: apnnankuch fosovpachim sopnnam tanchim. Oslim sopnam gheun tim apleô kuddi bhoxttaitat, Devachea odhikarachi beporva kortat ani mhoimevont devdutank opman’tat.

⁹Mikael mha-devdutan porian oxem korunk na: Moizesachê kuddi vixim devchara kodde vad-vivad kortana, Mikael opmanacheam utramnim tacher khastichem formonn marunk fuddem sorunk na; tannem fokot oxem mhonn’lem: “Sorvespor tujer khastichem formonn marum.”

¹⁰Punn him mon’xam zalear apunn somzonant team vostunchi ninda kortat; thoddeô vostu tim somzotat khorem, punn fokot soimbachea gunnan, ginean-nasloleam mon’zatim bhaxen, punn heôch vostu tancho nas korun uddoiteleô.

¹¹Tanchem kotta! Tãnnim Kain-achi vatt dhôrli; Balaaman kel’lem toxem, duddvachê axek lagun tim tachêch chukik sampoddlim; Korasa bhaxen tim kolpolim ani tachêch bhaxen tanchem nisontton zata.

¹²Tumchê sobhecheam jevnnank tim êk kanttallo: loz nastana pott-bhôr jevtat ani apnnanchoch poramôs kortat. Varem oddun vhorta toslim udok naslelim kupam tim; xorod kallar porian follam dinant toslim zhaddam tim; pallam soit umttun kaddlelim ani sarkinch mel’lim zhaddam tim.

¹³Tim dorianchim unchamboll zal’lim lharam, ani tancho fenno mhonn’lear tanchinch lojechim kortubam. Mollbar zollim-mollim firteleam noketram porim him mon’xam: sasnnak kallka-giddachem kondd tankam nirmil’lem asa.

¹⁴Adanva pattlo satvo mullpurux Enok, hannem tanchê vixim adim-fuddem oxem bhakit korun dovorlam: “Ho polleiat, hozaranche hozar apleam povitr dutank gheun Sorvespor ieta. Soglleanchi mon’subi korunk ani devdhorm nasleleancher tancheam odhormi kortubam pasot ani tãnnim Devachi ninda kel’lea pasot khastichem formonn marunk To ieta.”

¹⁶Him mon’xam sodanch gunngunnit astat ani dusreancher guneanv thaptat; tim apleanch vaitt vondovnneam pormannem choltat; tim apnnanchich boddai sangtat, apleach adavak dusreank fulam malltat.

¹⁷Punn, mhojeam mogacheam bhavam-bhoinnimnô, amchea Somia Jezu Kristacheam Apostlamnim tumkam adim-fuddench sangun dovorlam tacho ugddas korat.

¹⁸Tãnnim tumkam oxem sanglam: “Nimanneam disamnim apleam khotteam vondovnneam pormannem choltat toslim mon’xam dixtti poddtelim ani tim tumcheô moskoreo kortelim.”

¹⁹Tinch tim tumchê modem futti ghaltat tim, soimba pormannem choltat tim; tankam Povitr Atmo na.

²⁰Punn tumi, mhojeam priticheam bhavam-bhoinnimnô, tumchea bhov povitr bhavartacher tumchem jivit bandun haddat ani Povitr Atmeachea preronnan prarthon korat.

²¹Devachea mogant thir ravat, ani amcho Somi Jezu Krist Aplê kaklutin ditolo tea Sasnnik Jivitachi vatt polleit ravat.

²²Zancho bhavart donvddollta, tankam doien somzun gheiat;

²³tankam ujeantlim nivarunk vavrat. Herank chotrai gheun kaklut dakhoiat; tanchea patki jivitacho voso lagla tea angleachi porian vitt dhôrat.

²⁴Atam amchea ekleach Devak ani Tarokak vakhannum-ia! Tumchea bhavartantlim tumi koddsorona zaunk tumkam samballunk Taka podvi asa; toxench Aplea mhoimevont mukhamolla mukhar tumkam niropradi korun ani sontosan bhorun haddunk Taka tank asa.

²⁵Amchea Somia Jezu Krista udexim hea ekleach Devak mhoima, thorponn, odhikar ani podvi asa kallam-iugam adim thaun, toxench atam-i ani sodam sorvodam. Amen.