Read Goan Konkani Prok 10 Bible Online

Prok 10 - Goan Konkani bible

Prok 10

¹Tedna anink eklo bollixtt devdut sorgar thaun denvtalo to hanvem dekhlo. To eka kupan revoddlolo aslo ani tachê toklê bhonvtim ek donddubal aslem; tachem mukhamoll suria vori ani tache pãi ujeache khambe koxe asle.

²Tachea hatant êk usoil’li kovlli asli. Tannem aplo uzvo pãi somdiracher ani dhavo pãi zomnicher dovorlo

³ani xinv gorôz ghaltat tê bhaxen vhoddlea tallean to arddolo. To arddolo tedna sat pauttim goddgodd marlo.

⁴Ani goddgodd bond zatôch hanv borounk vetalom, punn sorgar thaun oxem uloitalo to êk tallo hanvem aikolo: “Sat pauttim goddgodd marla tem gupit samball; tem boroinaka.”

⁵Magir somdiracher ani zomnicher ubo ravlolo hanvem dekhlolo, tea devdutan aplo uzvo hat sorga vatten ubarlo

⁶ani Zo sodam-sorvodam jivo asa Tachea nanvachean, ani Zannem sôrg ani tantum asa tem sogllem, pritvi ani tantum asa tem sogllem, ani somdir ani tantum asa tem sogllem rochlam Tachea nanvachean, tannem oso soput ghetlo: “Anink vogôt ascho na!

⁷Punn jedna satvo devdut apli tuturi vazoitolo, tedna Devan Apleam sevokank, mhonngê Apleam provadeank, kolloilam tea pormannem, Devachi gupit ievzônn sompadnnek pavteli.”

⁸Uprant hanvem sorgar thaun mhojê lagim uloil’lo hanvem aikol’lo to tallo novean mhojê lagim oso uloilo: “Voch ani somdiracher ani zomnicher ubo asa tea devdutachea hatant asa to usoil’lo kovllo ghe.”

⁹Hanv tea devduta-xim gelom ani to daktto kovllo mhaka di mhonn hanvem tachê lagim maglem. Tannem mhaka mhonn’lem: “To ghe ani kha; tujea pottant to ambôtt zatolo, punn tujea tonddant mhonva sarko gôdd.”

¹⁰Devdutanchea hatantlo hanvem kovllo ghetlo ani khelo, ani to mhojea tonddant godd-godd mhonv laglo. Punn to gill’lea uprant, pottant to ambott-ambott zalo.

¹¹Tedna tannem mhaka mhonn’lem: “Anink êk pavtt tunvem zaiteam porzam, desam, bhasam ani patxaiam vixim De vacho sondêx diunk zai.”