Read Goan Konkani Prok 12 Bible Online

Prok 12 - Goan Konkani bible

Prok 12

¹Tedna sorgar êk vichitr khunna dixtti poddli; suriachea porzollan nhesleli êk bail; ticheam pãiam tolla aslo chondrim’ ani tichea mathear bara noketrancho mukutt.

²Ti ballônt zaunchi asli ani apleam porsutt-vennink lagun ti bobô-huieli martali.

³Anink êk khunna sorgar dixtti poddli: ovchituch êk vorixtt tambddo-lal sat tokleancho ani dha xingancho ar; tachê dôr-êkê tokler êk mukutt aslo.

⁴Tannem aplê xempdden mollba veleam noketrancho êk tisro vantto nikllaun prithumer uddoilo; ani porsutt zaunchi asli tê bailek bhurgo zaina fuddem taka girasunk, tichê mukhar to ar ubo ravlo.

⁵Bailek êk bhurgo zolmolo: to lokhonddachê betkattien soglleam porzancher raj choloitolo. Punn hea bhurgeak Deva sorxim ani Tachea xinvasona sorxim nitt ubarun vhelo.

⁶Ti bail apunn oronneant pollun geli; thõi tika baraixim-satth dis udarposonn mellchem mhonn Devan tika êk asro toiar kel’lo.

⁷Uprant sorgar ek zhuz suru zalem. Mikael apleam dutank gheun aracher zhuzlo. Ar apleam dutank gheun tanchê virudh zhuzlo,

⁸punn he harovle ani tankam sorgar anink zago urlo na.

⁹Vorixtt arak bhair uddoilo. Toch to adlo sorôp, ak’khea sonvsarak fosoilo to; tachem nanv Devchar ani Soitan; taka ani tachê borabôr tacheam dutank khala prithumer xevttile.

¹⁰Tedna sorgar oxem vhoddlean mhonntalo to êk tallo hanvem aikolo: “Atam ki amchea Devan Aplê porjechem taronn kelem! Atam Aplea hatant podvi gheun Apunn raza mhonn To dakhoitolo! Atam Tacho Krist sonvsaracher Aplo odhikar cholounk lagtolo! Karonn amcheam bhavam-bhoinnincher add garannem korun tancher amchea Devachea mureant dis-rat arôp ghaltalo taka xevttun uddoilo!

¹¹Tãnnim Menddreachea rogta pasot ani aplê govaikê khatir tacher zoit vhelem, ani morunk porian kobul asun tãnnim aplea jivachi porva keli na.

¹²Hea pasot, sorga ani thõi asleleamnô, sontosbhorit zaiat! Punn prithumechem ani somdirachem kotta! Kiteak devchar bhov ragixtt zaun tumchê modem denvun aila, ani apnnak thoddoch kall asa mhonn to zanno.”

¹³Apnnak prithumer xevttilo mhonn arak koll’lem tedna, bhurgeak zolm dil’lo tê bailecheam pallank to laglo;

¹⁴punn oronneant aplea asrear uddun vochunk te bailek eka vorixtt goruddache don pakotte dile; thõi arachê piddapiddentli meklli zaun saddê-tin vorsam tichi bori poramôs zateli.

¹⁵Tedna ti bail lotton vechê khatir aran ticher êk udkachi nôd koxi aplea tonddantli nettan xevttili.

¹⁶Punn dhortori bailechea adarak aili, kiteak aran aplea tonddantli xevttil’li ti nôd dhortoren tondd ugddun gill’li.

¹⁷Uprant ar bailecher ekdom’ tiddlo ani tichê urlolê sonsticher, mhonngê Devacheô adnea palltat ani Jezun dil’lê govaikek visvaxi ravtat tancher, zhuzunk bhair sorlo.

¹⁸Hanv veller ubo aslom.