Read Goan Konkani Prok 13 Bible Online

Prok 13 - Goan Konkani bible

Prok 13

¹Tedna somdirantlem ek savoz voir sorta tem hanvem pollelem. Taka dha xingam ani sat tokleô asleô; tachea dor-eka xingacher êk mukutt ani dôr-êkê toklecher Devachi ninda kortelem ek nanv aslem.

²Hanv dekhtalom tem savoz bibttea vaga sarkem distalem: tache pãi vansve-lacheam pãiam sarke asle ani tachem tondd xinvachea tondda sarkem. Tea aran tea savozak apli podvi toxench apli sodôr ani aplo vhôdd odhikar dilo.

³Tea savzache êkê toklek êk mornnadik ghavo zala mhonn diso, punn to gombhir ghavo peklolo. Sogllo sonvsar ojaplo ani tea savoza pattlean vochunk laglo.

⁴Sogllo lôk arak saxttangim poddtalo, kiteak tannem aplo odhikar tea savozak dil’lo. Ani lôk savzak-ui saxttangim poddun oxem mhonntalo: “Savza sarko anink konn asa? Tachê lagim zhuzunk konnak tankot?”

⁵Savzak gorvan ulounk ani Devachi ninda korunk rojea dil’li, ani bavêchallis mhoine odhikar cholounk dil’lo.

⁶Tem Devacher, Tachea Nanvacher, Tachea Tombucher ani sorgar ravteleancher jastiô marunk laglem.

⁷Bhoktancher add zhuzunk ani tankam harounk savzak rojea dil’li, ani soglleam kullancher, porzancher, bhasancher ani raxttrancher taka odhikar dil’lo.

⁸Mhonngê, sonvsarachea orombak thaun, jivexim marlelea Menddreachea Jivitachea pustokar zanchim nanvam boroil’lim nant, tim pritumevoilim sogllim mon’xam tea savzak nomoskar kortelim.

⁹Kan asleleamnim aikunchem!

¹⁰Zankam bondkhônn nirmil’li asa, tankam bondkhônn chukchi na; zankam torvarin morunk nirmil’lem asa, tankam torvar chukchi na. Dekhun bhoktank thirai ani ghôtt bhavart asunk zai.

¹¹Uprant anink ek savoz zomnin-tlem voir sortalem tem hanvem dekhlem. Taka eka menddrea vori don xingam aslim, ani tem eka ara bhaxen uloitalem.

¹²Hem dusrem savoz poilea savzacho sogllo odhikar tachêch mukhar choloitalem, ani zacho mornnadik ghavo peklolo, tea poilea savzak bhozunk prithumek ani ticher jietolea sogllea lokak boll kortalem.

¹³Hem dusrem savoz mottim vismitam kortalem, soglleancheam dolleam mukhar tannem sorgar thaun uzo porian prithumer denvo-so kelo.

¹⁴Poilea savza zagear vismitam korunk dil’lim tanchê vorvim, tannem prithumecheam mon’xank fosoilim, ani torvarincho ghavo zal’lo ani tori jivem aslem tea poilea savzachi êk murti korunk sanglem.

¹⁵Poilea savzachê murti bhitôr jivitacho svas ghalun tika ulounk porian diunk dusrea savzak podvi dil’li asli; ani jim konn tê murtik nomoskar korina zatit, tancho jiv-ui kaddunk taka podvi dil’li asli.

¹⁶Lhanank toxem vhoddank, girestank toxem goribank, svadhin mon’xank toxem gulamank, hankam soglleank aplea uzvea hatar vô kopalar êk xik’ko marunk tem boll kortalem.

¹⁷Ani tea savzachea nanvacho vô tachea nanvachea ankddeacho xik’ko aslea bogor konnakuch vikunk vô viktem gheunk rojea nasli.

¹⁸Hem somzunk zannvaiechi goroz asa. Zannar mon’xamnim savzachea ankddeacho odmas korun gheuncho; to eka mon’xachea nanvacho ankddo. To ankddo soixim-sasoxtt (666).