Read Goan Konkani Prok 14 Bible Online

Prok 14 - Goan Konkani bible

Prok 14

¹Magir polle zalear, ovchit Sion Dongracher ubo aslelea Menddreak hanvem dekhlo; Tachê borabôr ekxem-chovêchallis hozar (144,000) lôk aslo: tanchea kopolar Tachem Nanv ani Tachea Bapaichem Nanv boroil’lem aslem.

²Ani udka-ghosghoxeachea avaza bhaxen ani khoddegant goddgoddeachea ghonn-ghonna sarko sorgar thaun ietalo to êk tallo hanvem aikolo; ani toxench hanvem aikolo to avaz kin’noreô vazoiteleanchea nada porim aslo.

³Xinvasona mukhar ani char jiveam rochnnam ani zannteam fuddem ho lôk ek novem git gaitalo; sonvsarantlim soddoun ghetleant team ekxem-chovêchallis hozar mon’xam bhair konnacheanuch tem git xikunk zainaslem.

⁴Him mon’xam sarkinch nirmoll, kedinch boxttonk naslelim; tim sodanch Devachi purnn bhokti korun aileant ani murtim-puttleank tim kedinch bhozunk nant.[1] Zõi Menddro veta, thõi Tachê pattlean tim-i vetat. Devak ani Menddreak bhettoil’lem prothom’ foll koxem mon’xam modlim tankam soddoun ghetleant.

⁵Tãnnim kednanch fôtt marunk na ani tanchea jivitant koslench kollonk-khot na.

⁶Tea uprant anink êk devdut unch varear uddtalo to hanvem dekhlo; prithumer jieteleank, mhonngê dôr-eka desak, dor-eka kullak, dôr-êkê bhaxechea lokak, ani dôr-êkê porjek porgôttchê khatir, tachea hatant sasnnachem xubhvhortoman aslem.

⁷Tannem vhoddlean mhonn’lem: “Devachi bhokti korat ani Taka mhoima diat! Kiteak Tannem mon’subi korcho vêll pavlo. Zannem rochleat sôrg ani sonvsar, somdir ani udkacheô zhori, Taka saxttangim poddun nomoskar korat.”

⁸Dusrea eka devdutan uprant mhonn’lem: “Poddlem! Tem vorixtt Babiloniechem xar poddlem! Tannem aplo soro — aplea kamcharacho khôr soro — soglleam porzank dilo.”

⁹Tedna tisrea eka devdutan tanchê pattlean vhoddlean mhonn’lem: “Jim konn tea savzak ani tichê murtik saxttangim poddun nomoskar kortat ani aplea kopolar vô aplea hatar tacho xik’ko ghetat,

¹⁰tankam-i Devachea krodhacho soro pieuncho poddtolo; to nirbhêl soro Tannem Aplea krodhachea patrant otun dovorla! To soro pietit titlim-i povitr devdutam hujir ani Menddrea hujir ujeant ani gondhokant tollmolltelim,

¹¹tankam tollmollaita tea ujeacho dhunvôr sodam-sodam choddot astolo. Tea savzak ani tachê murtik pãiam poddtat tankam ani tachea nanvacho xik’ko ghetla titleank-ui dis-rat visôv na.

¹²Hea pasot Devacheô adnea samballtat ani Jezucher bhavart tthevtat team bhoktank thirai asunk zai.

¹³Tea uprant sorgar thaun oxem mhonntalo to êk tallo hanvem aikolo: “Hem boroi: Somiachea ekvottant mortat tim subhagi! Khoreponnim sot hem! tanche koxtt ani vavr somple, atam thaun tankam somadhan melltelem, kiteak tim aple bore sevecho fôll gheun vetat. Hôi, khorench tim bhagi, mhonnta Atmo!”

¹⁴Anink-ui polle zalear, ovchit ek dhovem kup mhaka dixtti poddlem ani tacher boslolo konn-eklo mon’xachea puta sarko; tachê tokler êk bhangaracho mukutt ani hatant dharicho êk villo aslo.

¹⁵Tedna anink êk Devdut Gabhareantlo bhair sorlo ani kupacher bosun aslo taka tannem vhoddlean mhonn’lem: “Tuzo villo lai ani lunv, karonn lunvnnecho vêll pavlo ani prithumechem xet pikun suklam.”

¹⁶Uprant kupacher boslolo aslo tannem prithumek aplo villo lailo ani prithumechi lunvnni keli.

¹⁷Tedna sorginchea Gabhareantlo anink êk devdut tosloch dharicho villo gheun bhair sorlo.

¹⁸Magir ujeacher odhikar aslolo anink êk devdut vedi thaun bhair sorlo. Tannem dharicho villo aslelea dutak vhoddlean sanglem: “Tuzo dharicho villo lai ani prithumechê dak-velicheô dakô katrun kadd, karonn dakanche gons pikle.”

¹⁹Tedna devdutan aplo villo prithumek lailo ani prithumechê dak-velicheô soglleô dakô katrun kaddleô ani Devachea krodhachea vhoddlea sorea-ghanneant ghaleô.

²⁰Dakô pãiamnim pillun kaddpacho ghanno xara bhair aslo; thõi teô dakô pillun kaddleô ani tancho rogta-sarko tambddo ros bhair sorlo; rosacho vhall tis kilometranchê lambaiek pavlo ani sumar dêdd metr unch aslo.