Read Goan Konkani Prok 15 Bible Online

Prok 15 - Goan Konkani bible

Prok 15

¹Tedna êk vhôdd ani vichitr khunna hanvem dekhli: sat devdut sat noxttam gheun asle. Him nimannim noxttam, kiteak tanchê vorvim Devachea krodhachi xirantt sompadteli.

²Magir uzo laglelê konvchecho êk doria koso hanvem pollelo; ani zãnnim savzacher ani tachê murticher ani tachea nanvachea ankddeacher zoit vhel’lem, tankam hanvem pollelim: him konvche-chea doria sorxim ubim aslim. Devan dil’leô kin’noriô gheun, tim

³Devachea chakra Moizesachem ani Menddreachem git gaitalim: “Sorvespora, sorvpodvedar Deva, kitlim vhoddlim ani vichitr Tujim kortutvam! Raxttranchea Raia, kitleô nitivontponnacheô ani sotacheô Tujeô vattô!

⁴Sorvespora, konn Tujem bhem dhorina zait? Tuji tust korinastana konn ravot? Karonn Tum ekloch Povitr ani Tujeô formavnneo soglleank tthaveô; dekhun sogllim raxttram ietelim ani Tujê mukhar saxttangim poddtelim.”

⁵Tea uprant sorgar Gabharo, mhonngê, Devachê govaikecho Tombu, ugto zal’lo hanvem dekhlo.

⁶Sat noxttam gheun asle te sat devdut Gabhareantle bhair sorle; te dhovem-ful sonnachem anglem nheslele, ani tanchê chhatiek bhangarache pott’tte bandlele asle.

⁷Tedna char jiveam rochnnantlea ekan sat devdutank sat bhangaracheo vattio dileo: heo sasnnachea sasnnak jietelea Devachea krodhan bhòrleleo asleo.

⁸Devachê mhoimê ani podvê thaun upzol’lea dhunvran Gabharo bhòrlo, ani sat devdutanchim sat noxttam sompado-sôr konnacheanuch Gabhareant bhitôr sorunk zainaslem.