Read Goan Konkani Prok 16 Bible Online

Prok 16 - Goan Konkani bible

Prok 16

¹Tedna Gabharea thaun, team sat devdutank vhoddlean oxem sangto êk tallo hanvem aikolo: “Cholat ani Devachea krodhacheo sat vattio prithumer ôtat!”

²Poilea devdutan vochun apli vatti prithumer ôtli. Savzacho xik’ko aslo tankam ani tachê murti mukhar sorpottalim tankam, kanttalleachim ani vikallim chovnam zalim.

³Dusrea devdutan apli vatti somdi-racher ôtli. Udok mel’lea mon’xachea kinn’nnevlelea rogta sarkem zalem ani somdirantli soglli rochnna meli.

⁴Tisrea devdutan apli vatti nodincher ani udkacheam zhorincher ôtli ani tanchem rogot zalem.

⁵Udkancher odhikar aslelea devdutan oxem mhonnto hanvem aikolem: “Sorvespora, soglleanch Tujeam nirnnoiamnim Tum nitivont, oxe Tuje nirnnoi dekhun, Povitr To Ekloch Tum asai ani Tunch asloi,

⁶kiteak bhoktan-chem ani provadeanchem rogot tãnnim vikrailem ani Tunvem tankam-i rogot pieunk dili. Hôi, hem tankam favo!”

⁷Ani khud ti vedi oxem uloito hanvem aikolem: “Khorench, sotache ani nitiche Tuje nirnnoi, Sorvespora, Sorvpodvedar Deva!”

⁸Choutea devdutan apli vatti suriacher ôtli, ani mon’xank ujea vorvim lasun-bhazun uddounk suriak podvi dili.

⁹Lason-bhazto gormen mon’xam jivit bodlun Devak mhoima diunchê svater, tim heam noxttancho odhikar aslelea Devachi ninda korunk laglim.

¹⁰Panchvea devdutan apli vatti savzachê sodrer ôtli. Savzachea akhea rajeacher kallôk poddlo ani aplê dukhik lagun mon’xam apleôch jibô chabunk laglim.

¹¹Ani apleam kortubam vixim dhuk dhorun, aplem jivit bodôlchê svater, apleam dukhink ani chovnank lagun tãnnim sorginchea Devchi ninda keli.

¹²Sovea devdutan apli vatti vorixtt Eufrat nodicher ôtli. Nôd sukli ani tantuntlean udenticheam patxaiank vatt toiar zali.

¹³Tedna tin mhelle atme hanvem dekhle: te bebe koxe distale. Tantlo êk atmo arachea tonddantlo, dusro savzachea tonddantlo ani tisro khottea provadeachea tonddantlo bhair sorlo.

¹⁴Vismitam kortat tosle devcharanche atme te. Sorpodvedar Devachea Vhoddlea Disak sonvsarantleam razank te tin atme zhuzak ektthãi kortat.

¹⁵“Polleiat! Hanv eka chora porim ietam! Zagrut ravtat ani aplim vostram rakhtat tim subhagi: hê bhaxen tim vingllim bhonvchim nant ani loka mukhar tankam loz bhògchi na.”

¹⁶Tedna team atmeamnim Hebrêv bhaxen Armaged’don mhonntat tea zagear razank ektthãi kele.

¹⁷Tedna satvea devdutan apli vatti varear ôtli. Gabhareantlea xinvasona thaun êk motto tallo gazlo: “Somplem!”

¹⁸Zhoglannim, goddgoddeanche ghonnghonn ani khoddegant dhornn-kamp zalim. Mon’xakull rochlam tê meren hedi motti dhornnkamp kednanch zaunk na; soglleam poros paxtt hi dhornnkamp!

¹⁹Vorixtt Xar futtun tiche tin vantte zale, ani raxttram-raxttramnim xaram padd zalim. Devan xrêxtt Babiloniecho ugddas kelo ani Aplea krodha-soreachea patrantlem tika pieunk dilem.

²⁰Zunve soglle pollun gele ani dongor-porvot nanch zale.

²¹Korveanche vhoddle fator, dôr-êk sumar pon’nas kilogramanchea vozonacho, mollbar thaun mon’xancher poddle. Ani korveanchea pausachea noxttak lagun, mon’xamnim Devachi ninda keli, itlem marekar vign tem.