Read Goan Konkani Prok 17 Bible Online

Prok 17 - Goan Konkani bible

Prok 17

¹Sat vattio gheun asle team sat devdutantlo eklo mhojê-xim ailo; tannem mhaka oxem sanglem: “Zaiteam udkam sorxim aplea asonar bosli asa te nanvoste xindôll-bailek kosli xikxa poddunk veta ti hanv tuka dakhoitolom.

²Tichê kodde prithume-cheam soglleam razamnim kamchar kela ani sonvsarantlo lôk tichê xindollkecho soro pieun bebdo zalo.”

³Tedna Atmeachea ekcharant astana devdutan mhaka oronneant vhelo. Thõi êk bail hanvem polleli; sogllem ang devnindecheam utramnim bhorlelea eka tambddea savzacher ti bosun asli; tea savzak sat tokleô ani dha xingam aslim.

⁴Ti bail zambllea ani tambddea rongachim vostram nhesun asli, tinnem bhangar-xringar ani mannkam-motiam ghal’lim. Tichea hatant ek bhangarachem patr aslem, ani hem tichea kamchari jinnechê ollxiken ani kanttallean bhòrlelem.

⁵Tichea kopalar ek gupit orthachem nanv boroil’lem aslem; tem hem: “Hanv podvedar Babilonia! Sogllê xindollkechi avoi hanv, sonvsarant upzotat titleam-i ollxikank hanvuch zolm ditam.”

⁶Ani bhoktanchem rogot ani Jezucheam sakxidaranchem rogot pieun ti bail bebdi zal’li hanvem polleli. Hanvem tika oxi dekhli tedna, hanv sarkoch thottaklom.

⁷Devdutan mhaka vicharlem: “Tum kiteak itlo thottak zalai? Hê bailecho gupit ôrth ani ti boslea tea sat tokleanchea ani dha xinganchea savzacho gupit ôrth hanv tuka sangtam.

⁸Tunvem dekhlãi tem savoz ekdam jivem aslem, punn atam jivem na; tem patallantlem voir sorchem asa ani tachem nisontton zatelem. Sonvsarachea orombak thaun jeam mon’xanchim nanvam jiveanchea pustokar boroil’lim nant, tim sogllim savzak polleun thottaktelim, karonn tem ekdam jivem aslem, uprant jivem na zalem, punn novean portun dixtti poddtelem.

⁹Hanga zannvaiechi ani somjikaiechi goroz: sat tokleô mhonngê bail bosloli asat te sat dongor. Têch bhaxen sat patxai;

¹⁰tantle panch sorun gele, eklo atam raj choloita, ani nimanno eklo azun ieunk na. To ietolo tedna ilo-so vêll sodrer urtolo.

¹¹Ekdam jivem aslem punn atam jivem na tem savoz, tem-i atthvo patxai, punn tea satantlo eklo, ani tachem nisontton ieunchem asa.

¹²Tunvem polleleãi tim dha xingam dha patxai: te ozun razkarbhar cholounk lagunk nant, punn te savza borabôr ek vor-bhôr razodhikar ghetele.

¹³Apli podvi ani odhikar savzachea hatant ghalunk te soglle ekmotache.

¹⁴Te Menddrea virudh zhuztele, punn Menddro Tannem apoil’leam, vinchloleam, visvaxi pattlavdaram borabôr tankam haroitolo, kiteak To dhoniancho Dhoni ani patxaiancho Patxai.

¹⁵Devdutan mhaka anink-ui sanglem: “Jeam udkam sorxim aplea asonar xindôll-bail bosloli asa mhonn tunvem pollelãi, tim udkam mhonn’lear soglleô porza, urponji, raxttram ani bhasô.

¹⁶Punn tunvem polleleãi tim dha xingam ani savoz xindôll-bailecho dvês kortelim; tichê lagim asa titlem-i luttun kaddtelim, ani tika nagddi korun sôddtelim; tichem mas khatelim ani ujean ticho bhosm kortelim.

¹⁷Kiteak Devachem utor pallon ie porian, Devan Aplo hetu tanchea monant ghala ani oso tãnnim aplo razodhikar savzachê adhin korcho mhonn Tannem tankam ekmotache keleat.

¹⁸Ani tunvem polleleai ti bail pritumecheam patxaiancher razvoddki choloita ti, tem vorixtt xar.