Read Goan Konkani Prok 18 Bible Online

Prok 18 - Goan Konkani bible

Prok 18

¹Tea uprant anink êk devdut sorgar thaun denvun ieto hanvem pollelo. Taka vhôdd odhikar aslo ani tachea tezan sogllo sonvsar jhigjhiglo.

²Tannem vhoddlean oxi bob marli: “Poddlem rê, poddlem! Tem vorixtt Babiloniechem xar poddlem! Tantum atam firtat devchar ani mhelle bhut; tem atam zalam soglleam jin’sacheam ollxikonneam suknneanchem biradd ani mhelleam ani bhirankull zonavorancho vivôr.

³Sogllim raxttram tachea pozoddponnacho khôr soro pielim, prithumecheam soglleam razamnim tachê kodde kamchar kelo; ani tachea nirmoriadi xindollken sonvsarantle veapari girest zale.”

⁴Magir anink êk tallo sorgar thaun oxem sangto hanvem aikolo: “Bhair sorun ie, Mhojê porjê! Thõisorli bhair sor! Ticheam patkamnim tumi vantto gheum nakat; ticher poddlea tê xikxechim tumi bhagidar zaum nakat.

⁵Kiteak ticheam patkanchi ras mollba itli unch pavlea, ani ticheam khotteponnancho Devak ugddas aila.

⁶Ti tumchê kodde vaglea toxench tumi-i tiche kodde vagat; jem sogllem tinnem kelam, tem dupett mapan tika farik korat. Tumkam tinnem aplea patrant pieunk toiar korun dilam, tôr atam don pavtti odik khôr sorean tichem patr bhorun diat.

⁷Jitlea dobajean ani rubapan tinnem apleakuch vaddoilea, titli tika atam tollmolle ani dukh bhogunk diat. Kiteak ti aplea monant oxem mhonnot asa: ‘Sodrer bosloli ranni hanv! Vidva bail nhoi hanv, ani vidvechem dukh kodinch mhaka bhogunk poddchem na!’

⁸Haka lagun ekach disa bhitôr soglleô khasti ticher poddteleô: pidda, dukh ani bhuk; tosoch ujean ticho bhosm zatolo, kiteak ticher khastichem formonn marta to Sorvespor Dev bollixtt!”

⁹“Tichê xindollkent ani dobajeant bhag ghetale te raza, ujean ticho bhosm zatana voir sorto dhunvôr polleun, tichê vixim roddtele ani vilaptele.

¹⁰Tiche vollvolle apnnank-ui lagtit mhonn bhieun, pois-pois ravun te mhonn’tat: ‘Kotta! Babilonia, vortea xarachem kotta! kitlem tezvont asli tum! Ani kitlem podvedar! Tori eka vora bhitôr tujem nisontton zalem!’

¹¹Sonvsarantle soglle veapari tichê pasot roddtat ani vilaptat, kiteak tarvamnim haddlolo tancho mal vikto gheunk ani-anink konnuch na:

¹²Tanchem bhangar, tanchem rupem, tanchim mannkam ani motiam, tanchem sonnachem ani zambllem lugott, tanchem rosmichem ani tambddem lugott, tanchim chondonachim lankddam, tanche hotia-dantache ani moladik lakddache, pitullche, lokhonddache ani pakhonnache nog konnuch ghena

¹³toxench konnuch ghena atam tanchi tiki, mosalo, gondhrôs ani dhump, ani pormollit molôm’; konn ghevpak na tancho soro ani oliv-tel, tanchem pitt and gonv, tanchim gorvam ani menddram, tanche ghodde ani gaddiô, tanchim gulamam ani koidi kel’lim mon’xam.

¹⁴Veapari taka mhonntat; ‘Tum axetali teô moladik vostu nanch zaleô; sogllo tuzo dobazo ani jivitacho porzôll ubun gelo ani anink kednanch te tuka portun mellpache nant!’

¹⁵Tea xarant veapar korun girest zal’le veapari tea xarachê khastichê bhirantin pois-pois ravun oxe pinrgunn vilaptele;

¹⁶te mhonntele: ‘Kotta! Vorixtt xarachem kotta! Tem sonni ani zambllim vostram nhestalem, mannkam-motianchea xringaran jhigjhiktalem!

¹⁷Tori eka vora bhitôr hea sogllea dobajeacho bhosm zalo!’ Tarvanche kopit ani poinnari, tarvotti ani doriantlem aplem udarposonn zôddtat te, borech pois ravun

¹⁸ani bhosm zal’lea xara thaun voir sorto dhunvôr polleun, oxem arddun mhonntele: ‘Hea vorixtt xara oslem ek xar kednanch aslem?’

¹⁹Tãnnim aplê tokler dhull uddoili, ani pinrgun ani vilapun oxi bob marli: ‘Kotta! Tea vorixtt xarachem kotta! Doriantlean firtoleam tarvancheam soglleam dhoniank aplê dobajik jinnê vorvim tem girest kortalem! Tori eka vora bhitôr tem sarkem padd zalem!’

²⁰Sorga, tachea ghorttanna khatir khuxal za! Bhoktamnô, apostlamnô, ani provadeamnô, tumi-i khuxal zaiat! Kiteak tumkam tannem vaitt kel’lê khatir Devan taka ho nisonttonacho nirnnoi dilo!”

²¹Uprant eka bollixtt devdutan danteachea vhodda pedda sarki êk fatôr ghetli ani oxem mhonnun somdirant ti uddoili: “Hê bhaxen ekach faran vorixtt Babiloniechem xar nettan xevtton vetelem ani portem tem kednanch anink dixtti poddchem na.

²²Anink kednanch tujeam rosteancher, Babiloniê, aikunk ieuncho na songitancho nad: vinno vazoitoleancho ani gavpeancho nad, tosoch pirlukecho ani tuturecho avaz! Koslêch torecho kolakar tujê bhitôr anink kodinch dixtti poddcho na! Danteacho avaz anink kodinch tujeam kottam bhitôr aikunk ieuncho na!

²³Anink kodinch tujeam ghoramnim diveacho uzvadd loklokcho na! Anink kodinch tujê-xim aikunk ieunchim nant hoklê-novreachea lognachim khuxal gitam! Tuje vepari sonvsarache kunvor zal’le, ani tujeam ghaddiponnamnim sogllim raxttram fosovlim!

²⁴Ani provadeanchem, bhoktanchem ani sonvsarant jivexim marleant team soglleanchem rogot Babiloniecheam rosteancher vikrail’lem dixtti poddlem.”