Read Goan Konkani Prok 19 Bible Online

Prok 19 - Goan Konkani bible

Prok 19

¹Tedna sorgar asto motte urponjiche boballa sarko hanvem to avaz oso aikolo; “Sorvesporak zôi! Devan amchem taronn kelem, Takach favo mhoima, Tachich soglli podvi!

²Nitin To zhôddti korta ani neaia pormannem To khast laita! Aplea pozoddponnan sonvsar kusoitali te nanvvostê xindôll-bailek Tannem khast laili; Apleam chakranchem tinnem rogot vikrailem dekhun Tannem tika khast laili.”

³Anink êk pavtt tãnnim oxi bob marli: “Sorvesporak zôi! zôi! Babiloniecho dhunvôr voir choddto kednanch thambchona!”

⁴Tedna chovis zann-teamnim ani char jiveam rochnnamnim xinvasonar bosun aslelea Deva mukhar saxttangim poddun oxem mhonn’lem: “Amen! Sorvesporak zôi!”

⁵Uprant, “Sogllim tumi, Devacheam chakramnô, Tachi bhokti kortoleam dhaktteam-vhoddleamnô, amchea Devachi tust korat!”, oxem mhonn’to, xinvasona thaun êk tallo ailo.

⁶Magir eka ghosghoxeachea avaza sarko ani zonnzonnit goddgoddeachea boballa vori êkê vhôdd urponjicho koso êk tallo hanvem aikolo; to oso mhonntalo: “Sorvesporak zôi! Sorvesporan, amchea Sorvpodvedar Devan, Apli razvoddki hatant ghetli!

⁷Khuxal zaum-ia, anondbhorit zaun Devak vakhannum-ia! Kiteak Menddreachea lognacho vogôt pavlo ani Tachi potinn lognak toiar zali.

⁸Jhigjhigit sonnachi dhovi-ful nhesônn Devan tika ghalunk dilea.” Sonnachi nhesônn mhonngê bhoktancheô boreô kornneo.

⁹Tedna devdutan mhaka sanglem: “Oxem boroi: Menddreachea lognachea jevnnak amontronn ghetlam tim subhagi!” Tea bhair tannem mhonn’lem: “Ho khoreponnim Devacho sondêx.”

¹⁰Tea uprant taka nomoskar korunk hanv tacheam pãiam poddlom, punn tannem mhaka sanglem: “Toxem korinaka. Jezuchi sakxi mandun ghetleleam tujeam bhavam-bhoinnim soit, tujê bhaxen, hanv ek chakôr. Devakuch tunvem oso bhôzcho.” Jezuk sakxi ditat tim Atmeachea preronnan aplo sondêx ditat.

¹¹Tedna mhaka sôrg ugto zal’lo dixtti poddlo, ani thõi êk dhovo ghoddo aslo. Tacher boslolo aslo Tachem nanv Visvaxi ani Satvik; To nitivontponnan mon’subi korta ani nitivontponna pasot zhuzta.

¹²Tache dolle ujeachem agttem koxem, ani Tachê tokler zaite mukutt asle. Tacher ek nanv boroil’lem aslem, punn Tachê bhair tacho ôrth konnuch nokllo aslo.

¹³Tannem ghal’lem tem vostr rogtan xitoddail’lem. “Devacho Sôbd” Tachem nanv.

¹⁴Tachê pattlean vetalim dhoveam ghoddeancher bosun ani dhovem-ful sonnachem nhesun sorginchim loskoram.

¹⁵Raxttrank harounk Tachea tonddantli êk pazleli torsad bhair sortali. Êkê lokhonddachê betkattien To tancher raj choloitolo, ani Sorvpodvedar Devachea krodhachea ghanneant dakô mollun soro bhair kaddtolo to Toch.

¹⁶“Tachea vostracher ani Tachea zangllacher boroil’lem asa hem nanv: “patxaiancho Patxai ani dhoniancho Dhoni!”

¹⁷Uprant suriacher ubo aslolo êk devdut hanvem pollelo. Tannem varear uddto soglleam suknneank vhoddlean bob marli: ‘Ieiat, ani Devachea vhoddlea jevnnak ektthãi zaiat!

¹⁸Razanchem, senapotinchem, podvedar viranchem mas, ghoddeanchem ani tancheam ghoddesvaranchem mas, sogllê torechea lokachem, mhonngê svadhin mon’xanchem ani gulamanchem, lhananchem ani vhoddanchem mas, khaunk ieiat.”

¹⁹Uprant savzak ani sonvsarantleam patxaiank ani tancheam loskorank hanvem pollelim; Ghoddesvaracher ani Tachê foujecher zhuz manddunk tim zomlelim.

²⁰Savzak dhôrlem, ani tachê borabôr fottkirea provadeak; savzachea nanvan tannem vismitam kel’lim tanchê vorvim tea savzacho xik’ko ghetleleank ani tachê murtik bhôzleleank tannem fosoil’lim. Ani savzak ani khottea provadeak zolltea gondhokachea ujeachea konddant jivinch xevttun uddoilim.

²¹Ghoddesvarachea tonddantli bhair sorto torsadin urloleam soglleancho jiv kaddlo, ani sogllim suknnim tanchem mas khaun dhadoxi zalim.