Read Goan Konkani Prok 2 Bible Online

Prok 2 - Goan Konkani bible

Prok 2

¹“Efezantlê povitr-sobhechea dutak oxem boroi: ‘Aplea hatant sat noketram dhorun asa ani sat bhangara-cheam divleam modem bhonvta Tacho sondêx ho:

²Tunvem kitem-kitem kam’ kelãi tem Hanv zannom, kitlo bhar tunvem ghetlai ani kitlê thiraien tum vavurlai, tachi mhaka khobor asa; khotte monis tuka manonant mhonn Hanv zannom; ani konn apostl nhoi astana apunn apostl mhonn sangtat tanchi porikxa tunvem keleai, ani te fottkire mhonn tuka kollon ailam.

³Tuka sosnnikai asa, Mhojê pasot tunvem zaitem sõslãi ani kalliz soddunk nãi.

⁴Tori astana, tum poilim Mhozo môg kortaloi toso atam korinãi: hoch tujer add Mhozo xinn.

⁵Tum kitlo khala poddlai tem chint! Tujem jivit bodôl ani poilim kortaloi toxem kôr. Tujem jivit bôdlinam zaxi zalear, Hanv tujê-xim ietolom, tuji divli tichê svatê veli kaddtolom.

⁶Tori hi êk bori vôst tuji: Nikolaitanchea pongddachim mon’xam kortat tacho Mhojêch bhaxen tum dvês dhôrtai.

⁷Jem kitem Atmo povitr-sobhank sangta, tem kan asleleamnim aikunchem: zoit vhortoleank Devachea Voikunttant asa tea Jivitachea rukhachem foll Hanv khaunk ditolom.’ ”

⁸“Smirnentlê povitr-sobhechea dutak oxem boroi: ‘Zo Poilo ani Nimanno, Zo mel’lo ani punorjivont zala, Tacho sondêx ho:

⁹Tuje attevitte Mhaka tthave. Tum gorib mhonn Hanv zannom, punn khorem mhonn’lear tum girest! Judev nhoi astana apunn Judev mhonntat ani tuji ninda kortat tanchi Mhaka khobor asa; khorem mhollear, te Soitanacho êk pongôdd!

¹⁰Tuka sõsunk poddtelem tachi bhirant dhorinaka. Aik! Tumchi porikxa korunk devchar tumchê modleam kãi zannank bondkhonnint uddoitolo; dha dis tumi attevitte kaddche poddtele. Morunk poddlear porian visvaxi rav, ani Hanv tuka jivitacho mukutt ditolom.

¹¹Jem kitem Atmo povitr-sobhank sangta, tem kan asleleamnim aikunchem: zoit vhorteleank dusrea mornnachi bhirantuch na!’ ”

¹²“Pergamachê povitr-sobhechea dutak oxem boroi: ‘Donim-i vattamnim pazleli torsad gheun asa Tacho sondêx ho:

¹³tum khõi ravtai tem hanv zannom: Soitanachem xinvason asa thõi. Mhojem Nanv tum ghott dhorun asai, ani Soitan ravta thõi Mhojea visvaxi sakxidara, Antipasak jivexim marlo tedna porian Mhojer dovorlolo visvas tunvem soddunk nãi.

¹⁴Tori astana tujer Mhaka êk xinn korcho asa: tumchê modem Balaamachim pattlavdar asat; murtim-puttleank voplelim danam khaun ani kamchar korun Israelacheam putam-dhuvank patkachea fasant ghalunk to Balakak xikoitalo.

¹⁵Têch bhaxen Nikolaitanchê xikovnnechim kãi pattlavdaram tumchê modem asat.

¹⁶Hea pasot jivit bodôl, na tôr Hanv rokddo ietolom, Mhojea tonddantli bhair sorta ti torsad gheun tancher add zhuz manddtolom.

¹⁷Jem kitem Atmo povitr-sobhank sangta, tem kan asleleamnim aikunchem: zoit vhorteleank Hanv liplolo man’na ani êk dhovo fatôr ditolom, ani tacher boroil’lem ek novem nanv. Hem nanv ghetlam tankam mat soddun, anink konnak hea nanvachi khobor na.’ ”

¹⁸“Thiatirentlê povitr-sobhechea dutak oxem boroi: ‘Ho sondêx Devachea Putacho; Tache dolle ujea porim jhigjhigtat, Tache pãi nirbhêl kel’lê pitullê sarke chokchoktat.

¹⁹Tum kitem kortai tem hanv zannom. Tum Mhozo môg kortai, tum Mhaka visvaxi ravlai, tum hurben seva kortai, ani koxttam modem thir ravlai: hem sogllem Hanv ollkhotam. Adim poros atam tum odik borem kortai mhonn Mhaka khobor asa.

²⁰Tori astana hem Mhaka tujem manona: ti bail Jezabel apunn provadinn mhonn sangun Mhojeam chakrank pozoddponn korunk ani murtim-puttleank bhettoil’lem khann khaunk xikoita ani oxem tankam fosoita, ani tum tika ogo ravtai!

²¹Aplem jivit bodlunk Hanvem tika vêll dila, punn aplem pozddem jivit bodlunk tika mon na.

²²Polle, Hanv tika pidda dhaddun aplê khatticher uddoitolom, ani tichê borabôr pozoddponn korteleank bharim vollvo-llaitolom; aplim khottim kortubam sanddun aplem jivit tim bôdlinant zalear, Hanv oxem kortolonch.

²³Ticheam bhurgeancho-i Hanv jiv kaddtolom, ani tedna mon’xanchim monam ani kallzam Hanv topasun kaddtam ani zonn-ekleak ap-apleam kornneam pormannem Hanv farik kortam mhonn soglleam povitr-sobhank kollon ietelem.

²⁴Punn tumi heramnim Thiatirent ti khotti xikovnn gheunk na, Soitanache khol gutt mhonntat te tumi xikunk nant, dekhun tumcher anink koslench vozon Hanv ghalcho na.

²⁵Punn Hanv iein porian, tumkam asa to khoro bhavart mat thir samballat.

²⁶Zoit vhorteleank ani xevôtt porian Mhoji chakri korteleank Mhojea Bapa koddsun Hanvem ghetla toch odhikar taka raxttrancher ditolom ani, matiecheam aidonancho churo kortat toxem, to lokhonddachê betkattien tancher raj choloitolo.

²⁸Ani Hanv taka fantea velem Noketr ditolom.

²⁹Jem kitem Atmo povitr-sobhank sangta, tem kan asleleamnim aikunchem.’”