Read Goan Konkani Prok 20 Bible Online

Prok 20 - Goan Konkani bible

Prok 20

¹Tedna aplea hatant patallachi chavi ani êk zôdd sankôll gheun, sorgar thaun denvto êk devdut hanvem pollelo.

²Tedna arak, adlea sorpak — mhonngê Devcharak vô Soitanak — dhôrlo ani taka hozar vorsank sankllin bandun dovorlo.

³Ani tim hozar vorsam soro porian tannem anink raxttrank fosoina zaunk taka patallant xevttilo, tea patallak chavi marun daracher xik’ko marlo. Tea uprant thoddo-so vêll taka soddunk Devachi ievzônn asa.

⁴Uprant hanvem sodrô polleleô, ani je konn tancher boslele tankam Devan zhôddti korchi podvi dili. Toxench Jezuk sakxi dil’lê khatir ani Devachem utor porgôttlam mhonnun zanchem xins kaplelem, tankam hanvem dekhlim. Tãnnim savzak ani tachê murtik bhozunk naslim ani savzacho xik’ko aplea kopolar vô aplea hatar gheunk naslo. Tim sogllim novean jivim zalim ani hozar vorsam-bhôr tãnnim Krista borabôr razvoddki choloili.

⁵Hem poilem punorjivontponn. Hozar vorsam bhòrchê adim her mel’lim mon’xam punorjivont zaunk nant.

⁶Poilea punorjivontponnant zankam vantto mell’lo, tim subhagi ani povitr. Ujeachea konddant dusrea mornnachê podvê khal tim aschim nant, punn Devachi ani Kristachi seva korunk tim iadnik zatelim, ani Tachea sangata êk hozar vorsam raj choloitelim.

⁷Êk hozar vorsam bhòrlea uprant, Dev Soitanak bondkhonnintlo soddoitolo

⁸ani to akhea sonvsaracheam raxttrank fosounk bhair sortolo. Team raxttranchim nanvam Gog ani Magog; Soitan tankam zhuzak ektthãi kortolo; doriachê deger renvecheô konniô asat titli vhôdd team fouzancho ank.

⁹Heô fouzô ak’khea desacher choddun geleô ani bhoktanchea penneak, mhonngê Devachê opurbaiechea Xarak, tãnnim veddho ghalo. Punn sorgar thaun uzo denvlo ani ujean tancho bhosm kelo.

¹⁰Tedna tankam fosoitalo tea devcharak Devan zolltea gondhokachea konddant xevttilo; tantum to savzachea ani khottea provadeachea vangdda dis-rat tollmolltolo sasnnachea sasnnak.

¹¹Uprant hanvem dekhlem ek vhoddlem dhovem xinvason ani tacher bosun aslo Taka hanvem pollelo. Tachê mukha velim prithum’ ani mollob pollun gelim ani tanchi savlli porian urunk na.

¹²Ani mel’leam mon’xank hanvem pollelim, vhoddank toxem lhanank: tim xinvasona mukhar ubim aslelim. Pustokam ugôddlim, ani uprant anink ek pustok ugôddlem; hem mhonn’lear Jivitachem pustok. Pustokancher tancheô kornneo boroil’leô asleô tea pormannem mel’leanchi mon’subi zali.

¹³Aplea pottant aslim tim mel’lim mon’xam somdiran portun dilim. Toxench mornnan ani patallan apnnachê adhin asleleam mon’xank portun dilim. Ani ek-ekleacheam kornneam pormannem Devan tanchi zhôddti keli.

¹⁴Tedna mornnak ani patallak ujeachea konddant xevttilim. (Hem ujeachem kondd mhollear dusrem moronn.)

¹⁵Zanchim nanvam jiveanchea pustokar boroil’lim naslim, tankam soglleank ujeachea konddant xevttilim.