Read Goan Konkani Prok 21 Bible Online

Prok 21 - Goan Konkani bible

Prok 21

¹Hanvem ek novo sorg ani êk novi prithum’ dekhlim. Poilo sorg ani poili prithum’ nanch zalelim, ani thuim ani-anink somdir naslo.

²Aplea nhovreak nettoun toiar kel’lê hoklê porim Povitr Xar, novem Jeruzalem, sorgar thaun Deva koddsun denvto hanvem pollelem.

³“Ho polleiat mon’xam modem Devacho Tombu! To tanchea sangata ravtolo, tim zatolim Tachi porza ani Hoch tanchea-sangata-Dev zatolo tancho Dev. Tancheam dolleantlim sogllim dukam To pusun kaddtolo; moronn anink aschem na, dukh anink korchim nant, rudon somptolem, koxtt-ui anink asche nant. Adlem sogott soron gelem.”, oxem Xinvasona thaun vhoddlean oso uloito, êk tallo-i hanvem aikolo.

⁵Uprant xinvasonar bosun aslo Tannem mhonn’lem: “Polleiat, soglleô vostu Hanv noveô kortam!” Tannem mhaka anink-ui sanglem: “Hem boroun dovor, kiteak him utram khatrechim ani sotachim.”

⁶Ani Tannem mhaka mhonn’lem: “Zalem! Hanv Alfa ani Omega, mhonngê Orômb ani Xevôtt. Jivitachem udok vhanvta tê zhorintlem tanel’leank Hanv funkott pieunk ditolom.

⁷Zoit vhorteleank Mhojê koddsun hem daiz melltelem; ani Hanv tancho Dev zatolom, ani tim zatelim Mhoje put ani Mhojeô dhuvô.”

⁸Punn jim konn sakxi diunk bhirantin pattim sorleant, vô bhavartak visvaxi ravlim nant, jim konn noxtt korun bhoxttotat vô khun kortat, jim konn pozoddponnant lolltat vô ghaddiponn choloitat, jim konn murtim-puttleank bhôztat vô dusreank fosounk bhonvtat — heam soglleanchem daiz, gondhokan zollto ujea-kondd. Hem tem dusrem moronn.”

⁹Nimanneam sat noxttamnim bhòrleleo vattio gheun asleleam sat devdutantlo eklo mhojê-xim ailo; tannem mhaka mhonn’lem: Hanga ie, hanv tuka ti hokol, Menddreachi potinn ti dakhoitam.

¹⁰Tedna, otmea-ekcharant, tannem mhaka eka unch ani vhoddlea dongrachê tonkxer vhelo, ani sorgar thaun, Deva koddsun denvto Jeruzalem, Povitr Xar tem, mhaka dakhoilem.

¹¹Tem Devachê mhoimen porzolltalem toxench tem eka bhov moladik mannka porim, eka gomeda vori, aspas polleunk dita toslea suriakanta bhaxen chok-choktalem.

¹²Taka ek vhoddlem ani unch kott aslem ani kottak bara darvontte asle, ani dôr-êk darvontto rakhunk êk devdut aslo. Darvon-tteancher Israelacheam putam-dhuvan-cheam bara kullanchim nanvam boroil’lim aslim.

¹³Udentik tin darvontte asle, ut’torik tin, dokhinnek tin, ani ostomtek tin.

¹⁴Xarachem kott bara buneadincher bandlelem, ani team buneadincher Menddreacheam bara apostlanchim nanvam boroil’lim aslim.

¹⁵Tea Xarachem, tacheam darvon-tteanchem ani tachea kottachem zok kaddchê khatir, mhojê lagim uloitalo tea devdutachea hatant zok-kaddpa êk bhangarachi boddi asli.

¹⁶Xar sarkem chovkott aslem, êkêch lambaiechem ani rundaiechem. Devdutan tê boddien tea Xarachem zok kaddlem: tem don hozar charxim kilometr lamb aslem; tachi rundai ani unchai titlich.

¹⁷Uprant tannem kottachem-i zok kaddlem: tachem zok charxim trepon metr asle. Devdutan tem mon’xanchea chaltea zokan mêzlelem.

¹⁸Tem kott suriakan-tachem bandlelem, ani xar zalear osol bhangarachem, ani hem bhangar aspas polleunk dita toslê konvchê vori jhigjhigtalem.

¹⁹Kottacheô buneadi soglleam jin’sancheam mannkam-motiamnim nettoil’leô. Poili bunead suriakant, dusri nillrotn, tisri xivdhatu, chovti pach,

²⁰panchvi gomêd, sovi indronill, satvi chondrokant, atthvi berozô, novi hollduvem-mannik, dhavi bhangari mannik, ikravi zambllem-mannik, ani baravi iakutt.

²¹Bara darvontte mhonngê bara motiam, dor-êk darvontto eka motiacho. Xaracho mukhêl rosto osol bhangaracho, konvchê porim aspas polleunk dita toslea bhangaracho.

²²Xarant hanvem Gabharo polleunk na, kiteak tacho Gabharo khud Sorv-podvedar Sorvespor Dev ani Menddro.

²³Xarak suriachea vô chondrachea uzvaddachi goroz na, kiteak Devachi mhoima tacher aplo porzôll ghalta ani Menddro tacho Divo.

²⁴Raxttram tachea uzvaddak bhonvtelim ani pritumeche patxai apli dhon-girestkai taka haddun ditele.

²⁵Xarache darvontte dis-bhôr ugtech astele kiteak thõi rat aschich na.

²⁶Raxttranchi dovlôt ani bhanddaram thõi pavtelim.

²⁷Mhellem kitench Xarant bhitôr sorchem na: jim konn ollxik vô khottepon kortat, tim koxêch bhaxen bhitôr sorchim nant. Zanchim nanvam Menddreachea Jivitachea pustokar boroil’lim asat, fokot him Xarant provês kortelim.